Omukanda Wa Vali wa Samuwele
19 Avapopila Sowambe okuti: “Ohamba ikahi nokulila nokuyavala unene ononkhia mba Ambisalau.”+ 2 Ehambu ankho vena-lio liokwafinda ovilwa* alipu, ovanthu aveho avakala momutambo, mokonda vetyiiva okuti ohamba yeihamenwa unene mokonda yomona wayo. 3 Monthiki oyo omafwalali akondoka* mepunda-umbo+ tyati vala filuu, ngomafwalali akunda mokonda yokwatila kovilwa. 4 Ohamba ailihiki motyipala, otyo ilila nondaka yakaluluka okuti: “Mona wange Ambisalau! Ambisalau mona wange, mona wange!”+
5 Sowambe anyingila mondywo omu ankho ohamba ikahi, ati: “Ove tatekulu ukahi nokukundisa ovaundapi vove aveho vayovola omwenyo wove* hono, nomwenyo wovana* vove+ ovahikwena novakwendye,+ no wovakai vove, no wononthawa mbove.+ 6 Ove uhole vana vekuyele, uyele vana vekuhole, mokonda hono wetyilekesa umwe nawa okuti ononkhalamutwe mbovita viove novaundapi vove kavesilivila-le kwoove, mokonda ame ndyityii umwe nawa, ine Ambisalau oe vala wahupile-po nomwenyo hono, onthwe atuho atunkhi, ove ñgeno wahambukwa. 7 Katuka, enda nopondye, kapameke* ovaundapi vove, na Siovaa umwe una omwenyo, ine kukevepameka petupu ou makala noove tatekulu otyinthiki etyi. Otyo matyikala otyitateka otyinene vali tyipona ovipuka aviho ovivi wamona-mona nkhele tya poukwendye wove atee hono.” 8 Pahe ohamba ayiende aikapumphama kombundi yepunda-umbo, ovanthu aveho avapopilwa okuti: “Ohamba ipumphi kombundi.” Ovanthu aveho avaende kohamba.
Mahi ova Isilayeli ankho vaya-nkholo, atyiti ou wenda no keumbo liae ou wenda no keumbo liae.+ 9 Ovanthu vomihoko aviho viova Isilayeli avahimbika okulitañgunisa na vakwavo, otyo vati: “Ohamba yetuyovola konondyale mbetu,+ tupu yetuvola kova Filisitiya, mahi pahe motyilongo watunda-mo mokonda ya Ambisalau.+ 10 Ambisalau, una twalembula akale ohamba yetu,+ wankhila movilwa.+ Nanyo omokonda yatyi twahalingila tyimwe opo ohamba ikondoke?”
11 Ohamba Ndaviti aitumu vakapopile ovanakwa ovo Sandoke+ na Ambiyatale+ okuti: “Popilei ovakulu vo Sundaa+ okuti: ‘Omokonda yatyi onwe musailililwa okukondola ohamba meumbo liayo, ngwe etyi tyikahi nokupopia ova Isilayeli tyeivala oku ohamba ikala? 12 Onwe tulilandula; twatunda mohonde ike.* Omokonda yatyi musailililwa okukondola ohamba?’ 13 Muna okupopila Amasa+ okuti: ‘Katwatundile mohonde ike?* Huku amonese ononkhumbi, etyindinge nonya ine ove okutuka hono kumalingi omunene wovita viange pomphangu ya Sowambe.’”+
14 Ngootyo omitima viovanthu aveho ova Sundaa avihulu* kohamba Ndaviti, nawike wahupilepo, avatumu okumupopila okuti: “Kondoka, noove novaundapi vove aveho.”
15 Ohamba aikondoka aihiki ko Solondau, ovanthu aveho ova Sundaa avehiki ko Silingale,+ opo velivase nohamba veihindikile atee iyauka ondongi Solondau. 16 Pahe Simei+ omona wa Sela womuhoko wa Mbesamii woko Mbaulii nae aende liwa-liwa novalume vo Sundaa vekelivase nohamba Ndaviti, 17 ankho weya novalume 1.000 vomuhoko wa Mbesamii. Simba+ omukwatesiko wovo meumbo lya Saulu novana vae 15, novakwatesiko vae 20, navo avaende liwa-liwa no ko Solondau etyi ohamba yehenehike-ko. 18 Ngwe ayaukila* potyiyau tyondongi opo akapole veumbo liohamba nokulinga atyiho ohamba ihanda. Mahi etyi ohamba ankho ihungi kokuyauka ondongi Solondau Simei omona wa Sela elipetamena kohamba. 19 Apopila ohamba okuti: “Wahambele onombei, wahahinangele otyivi ame nalinga+ pweetyi tatekulu watunda mo Selusalei. Hamba wehetyipake komutima, 20 mokonda ame muundapi wove ndyityii nawa okuti nalinga onkhali. Otyo natetekelela hono okuya okulivasa nohamba tyipona ku aveho veumbo lya Susee.”
21 Liwa-liwa Ambisai+ omona wa Seluya,+ apopi okuti: “Simei una okwiipawa mokonda wahingana omulembulwa wa Siovaa.”+ 22 Mahi Ndaviti ati: “Onwe mwesuka natyo mokonda yatyi, vana va Seluya?+ Omokonda yatyi mundingila ñgaa hono? Okuti pena omunthu upondola okwipawa mo Isilayeli hono? Musoka okuti ame hityii okuti hono nakondoka kouhamba mo Isilayeli?” 23 Pahe ohamba aipopila Simei okuti: “Ove kumankhi.” Ailekesa okuti maifwisapo etyi yapopia, ayaane.+
24 Mefimbosete+ omutekula wa Saulu nae aende vekelivase nohamba. Ankho weliyeka kalingi nawa konomphai mbae, kaviukisa onondyeli mbae mbo pomayulu, nii kakoho ovikutu viae, okutuka monthiki ohamba yapita atee onthiki yakondoka nombembwa. 25 Etyi ehika* ko Selusalei velivasa nohamba, ohamba aimupulu okuti: “Omokonda yatyi wesalela, atuhaende atuho Mefimbosete?” 26 Ngwe akumbulula okuti: “Omuundapi wange+ wankhemba tatekulu yange hamba. Mokonda nalemana,* ame napopila omuundapi wange* okuti: ‘Mandyitumu vandingile-ko nawa otyimbulu tyange ndyivelame-ko opo ndyende nohamba.’+ 27 Mahi wanthendeleya kwoove tatekulu yange hamba.+ Tatekulu yange ove ukahi ngoandyu ya Huku yotyotyili. Linga etyi wasoka okuti tyaviuka. 28 Ovanthu aveho vo meumbo lya tate ñgeno weveipaa tatekulu hamba. Mahi hatyo-ko walinga tatekulu, wapaka omuundapi wove pokati kovanthu valia komesa yove.+ Opo ñgaa ñgeno ndyiita vali otyipuka tyimwe kohamba?”
29 Ohamba aimupopila okuti: “Tyapwa wahapopie vali natyike. Ame natokola-le okuti ove na Simba muna okulitetela amuho eheke.”+ 30 Mefimbosete apopila ohamba okuti: “Muyeka vala akale nalio aliho, tyeetyi tatekulu yange ohamba wakondoka-le meumbo nombembwa.”
31 Mbalasilai omu Sileyande,+ atundu ko Loselii okwenda no ko Solondau opo alandule ohamba atee ko Solondau. 32 Mbalasilai ankho wakulupa-le; ankho una omanima 80. Mahi oe wapele ohamba okulia etyi ikahi ko Maanaii,+ mokonda ankho omulume umwe wamona unene. 33 Ohamba aipopila Mbalasilai okuti: “Twende atuho, ame mandyikekwavela okulia ko Selusalei.”+ 34 Mahi Mbalasilai apopila ohamba okuti: “Omanima eñgapi ahupako* mandyikala nomwenyo, opo ndyende nohamba ko Selusalei? 35 Ame ndyina-le omanima 80.+ Okuti ndyityivila okupunga otyiwa notyivi? Okuti ndyipondola vali okwiiva omupepo wokulia, nomupepo wokunwa, ine hamwe okwiiva ovaimbi ovakwendye novahikwena?+ Ngootyo, omokonda yatyi omuundapi wove akalela omulemo kwoove tatekulu yange hamba? 36 Komuuundapi wove tyatuuka-le etyi nahindikila ohamba atee ko Solondau. Ohamba yahanda okundyamba ñgaa mokonda yatyi? 37 Yeka omuundapi wove akondoke mbambavo, ndyeke ndyikankhile mepunda-umbo liange, popepi nomaendo ovo tate na mee.+ Mahi pena omuundapi wove apa Kimaa.+ Oe wenda nae tatekulu hamba. Mulingila atyiho wasoka okuti tyaviuka.”
38 Pahe ohamba aiti: “Kimaa matweende nae, mandyimulingila atyiho tyikahi nawa kwoove. Mandyikulingila ovipuka aviho undyita.” 39 Ovanthu aveho avahimbika okuyauka o Solondau pweetyi ohamba maiyauka aihipi ombesu Mbalasilai,+ aimulembula; Mbalasilai akondoka keumbo. 40 Pweetyi ohamba yayauka ondongi ayiende ko Silingale,+ Kimaa nae aende. Ovanthu aveho vo Sundaa novanthu vamwe ova Isilayeli navo avaende nohamba.+
41 Ovanthu aveho ova Isilayeli avaende kohamba, avapulu okuti: “Omokonda yatyi ovanthu vo Sundaa tulilandula navo, vekekupolelele pokamphengi tatekulu avekuyaukisa hamba novanthu aveho vo meumbo liove nomafwalali ove avayauka o Solondau?”+ 42 Ovanthu aveho vo Sundaa avakumbulula ova Isilayeli okuti: “Twalinga ngootyo, mokonda ohamba o wombunga yetu.+ Omokonda yatyi otyo tyimunumanesila? Okuti twalia tyimwe tyohamba ine yetwavela otyiawa tyimwe?”
43 Ova Isilayeli avakumbulula ova Sundaa avati: “Onthwe tu vomihoko 10, ngootyo ohamba Ndaviti yayemba vali kombunga yetu tyipona onwe. Omokonda yatyi mwetutombela? Ankho ñgeno hanthwe tutetekela okukapola ohamba yetu?” Mahi onondaka mbova Sundaa ambupame vali ko* mbova Isilayeli.