Isekiyele
47 Ankhondola vali kombundi yondywo ya Huku,+ tyina ndyikati ñgana, pepunduka liondywo ya Huku patundilila ondongi iviuka koutundilo, mokonda ondywo ya Huku+ yapilukila koutundilo. Ondongi oyo, yatunda kondywo ya Huku okutala kokulio kwondywo aikwate komutala wovilikutila kombwelo.
2 Pahe ngwe ankhwatesa kombundi+ yo kombanda, anthwala no kondye, atulisete nae kondye, atukaya atee kombundi yo kondye yokwahula koutundilo,+ ame andyimono ondongi ina omeva aenda, itundilila kokulio.
3 Etyi omulume oo aviuka koutundilo nongoi yokweeleka atyinda peke,+ aeleka ondongi, ina onokovandu* 1.000, andyaula andyiyauka ondongi; omeva atyo aanthi poukeho.
4 Aeleka vali ondongi, ina onokovandu 1.000. Andyaula andyiyauka ondongi, andyiti monongolo.
Aeleka vali onokovandu 1.000, andyaula andyiyauka ondongi, andyiti monomanekelo.
5 Etyi aeleka vali onokovandu 1.000, pahe omaande alinga omanyingi, anehetyivili okweeyauka, okuyauka ndyina okuyoa, mokonda papita unene kohi, omaande atyo kaevilwa vali okweeyauka.
6 Ngwe amphulu ati: “Mona womulume, wetyimona?”
Andyendaisa, ankhondola vali kehimba liondongi. 7 Etyi nakondoka, andyimono omiti ominyingi vili momahimba atyo evali ondongi.+ 8 Amphopila ati: “Ondongi ei, yenda no koutundilo, ikakwata ko Alambaa,*+ ikauyulila no melunga. Tyina yamatwala no melunga,+ omeva akavasiwa-mo maahakulwa. 9 Apa omeva oo amakwate,* mapakakala ovipuka vina omwenyo.* Melunga mamukakala ombisi onyingi, mokonda omeva aa omo maaende na-mo. Omaande omelunga maakahakulwa, atyiho tyili apa omaande oo akwata matyikakala nomwenyo.
10 “Vokufwa ombisi mavakakala komakomo elunga, okupolelela ko Ene-Sendi atee ko Ene-Engalaii,+ oku makukakala onomphangu mbokunyaneka omawanda okufwa. Mamukakala ombisi onyingi-nyingi yelikalaila, ilinga ngombisi Yomelunga Enene.*+
11 “Kongengeso yelunga makukakala omaiva nomatala, mahi oo, kamaakahakulwa. Maakakala umwe vala nomongwa.+
12 “Komahimba aeho ondongi, makukakala omiti aviho viokuliwa. Omafo avio kamaakakukuta, apeho mavikaima ovinyango. Onohanyi ambuho mavikaima ovinyango, mokonda mavikayavekwa nomeva atunda momphangu ikola.+ Ovinyango viatyo mavikalinga viokulia, omafo atyo maakakala ovihemba.”+
13 Etyi, otyo tyapopia Tatekulu Ohamba Onene Siovaa, wati: “Ei, oyo ohika mamukatepaulila omihoko 12 vyo Isilayeli, aikalinga epingo liavo, mahi Susee makakala nonohika onombali.+ 14 Mamukeipiñgana, amukapewa onohika mbulifwe.* Ame naanene andyiti mandyipe onombwale mbenyi+ otyilongo etyi, pahe otyetyi muli nokutyitepaulilwa,* tyilinge tyepingo lienyi.
15 “Otyilongo oku kombanda matyooyela apa: tyihimbikila Kelunga Enene, atyikwate metapalo liokwenda no ko Heteloo,+ atyikaviuka ko Sendande,+ 16 ko Hamate,+ ko Mbelota,+ no ko Simbilai ikala pokati okuti oku otyilongo tyo Ndamasiku oku o tyo Hamate, atyikakwata ko Hasele-Atikoo ponondimbu mbo Haulaa.+ 17 Onondimbu mbuhimbikila kelunga atee ko Hasale-Enao,+ ponthele ponondimbu no Ndamasiku, okuviuka kombanda, konondimbu no Hamate.+ Ombo, onondimbu mbotyilongo kombanda.
18 “Koutundilo, mbukwata pokati no Haulaa no Ndamasiku, ambukapolesa-po ondongi yo Solondau, pokati no Sileyande+ notyilongo tyo Isilayeli. Elekei okuhimbikila ponondimbu atee kelunga lyo koutundilo.* Ombo, onondimbu mbo koutundilo.
19 “Onondimbu mbo kombwelo, mbuhimbikila* ko Tamale ambukakwata komaande oko Melimbate-Kande,+ ambukalambela Kelola* atee Kelunga Enene.+ Ombo, onondimbu mbo kombwelo.*
20 “Koutakelo, kuna Elunga Enene okuhimbikila konondimbu atee kohika yo komutwe wo Lembo-Hamate.*+ Ombo, onondimbu mbo koutakelo.”
21 “Onwe litepaulilei otyilongo etyi, okutyitepaulila omihoko 12 vyo Isilayeli. 22 Muna okulitepaulila-tyo noonwe nononthunda-vilongo vakala pokati kenyi vena ovana atyikala epingo lienyi; ononthunda-vilongo, mavakala vala ngovatyitwa-tyilongo ova Isilayeli. Mavakapelwa kumwe noonwe epingo pokati komihoko vyo Isilayeli. 23 Muna okutetela onthunda-vilongo ohika ilinge epingo liae, mohika yomuhoko akala,” o Tatekulu Ohamba Onene Siovaa wetyipopia.