Okutunda
9 Siovaa apopila Mwisesi okuti: “Enda ku Falaoo, mupopila okuti: ‘Siovaa Huku yova Hembeleu wati: “Yeka ovanthu vange vaye vakafende kwaame.+ 2 Ove ine uveanyena, oheveyeke vaye, ovetyilika, 3 tala! noñgonoka okuti okuvoko+ kwa Siovaa makunyono ovipako viove vikahi komalisilo. Makuya ovihuna* mavinyono ononkhambe mbove, nomambulu, nomakamelu, nonongombe, nonongi.+ 4 Etyi Siovaa malingi ovipako viova Isilayeli hatyo-ko malingi ovipako viova Isitu, natyike povipako viova Isilayeli matyinkhi.”’”+ 5 Okuyawisa kwo otyo Siovaa anake onthiki metyilingi, ati: “Otyo Siovaa muhuka malingi motyilongo.”
6 Muhuka tyee, Siovaa etyilingi, ovinyama vimwe povipako aviho viova Isitu, avinkhi,+ mahi povipako viova Isilayeli natyike tyankhile. 7 Etyi Falaoo atuma vakayongole ovipako viova Isilayeli, avavasi natyike tyankhia-po. Mahi no ngootyo Falaoo atene omutima, ovanthu eheveyeke vaye.+
8 Siovaa apopila Mwisesi na Alau ati: “Pakei etwe lyo mofolono pomavoko enyi apeyula, Mwisesi eliyumbe peulu, Falaoo otyo atala. 9 Malikala ombundu yeheke motyilongo atyiho tyo Isitu. Konyima ovanthu aveho novinyama motyilongo atyiho tyo Isitu alivelingisa ovinthimba vina otulwa.”
10 Avapolo etwe mofolono avaende ku Falaoo; Mwisesi eliyumbu peulu, alikala ovinthimba vina otulwa kovanthu no kovinyama. 11 Ovanakwa vetambu, avehetyivili okutalama pu Mwisesi, mokonda valinga ovinthimba navo nova Isitu aveho.+ 12 Siovaa etyiyeke tya Falaoo okutena omutima, ovo Mwisesi na Alau ehevetavela ngeetyi Siovaa atolelele Mwisesi.+
13 Siovaa atolela Mwisesi ati: “Muhuka kutie vala tyee, oende ku Falaoo, mutolela uti: ‘Siovaa Huku yova Hembeleu wati: “Yeka ovanthu vange vaye vakafende kwaame. 14 Pahe ovihuna mandyiviviukisa mwoove no movaundapi vove, no movanthu vove, utyimone okuti kombanda yeheke kutupu omunthu nawike ulifwe na ame.+ 15 Ame nekulinga vala, ñgeno natandaveka-le okuvoko kwange, andyikutahela ovihuna ovinene, noove novanthu vove, ove ñgeno kombanda yeheke wanyimako-ae.* 16 Ame otyo umwe nekuyekela nkhele ukale-ko: netyilinga ovanthu vamone ononkhono mbange, enyina liange alipopiwa mouye auho.+ 17 Ove nkhele una omalityindailo kuyeke ovanthu vange vaye? 18 Muhuka ngo opo, mankhalokesa ongandavila imwe onene, yeheneloke mo Isitu, okutuka apa o Isitu yahindwa. 19 Tuma vakakongolole ovipako viove aviho, atyiho tyili momapia. Ovanthu mavavasiwa komapia, novinyama viahakongololelwe mavaipawa nongandavila.”’”
20 Vamwe povaundapi va Falaoo, vatila ondaka ya Siovaa, tyahasete avakongolola ovaundapi vavo novipako viavo, avevipake monondywo, 21 mahi vana vehesukile nondaka ya Siovaa avahakongolola ovaundapi vavo nii ovipako viavo momapia.
22 Siovaa atolela Mwisesi ati: “Tandaveka okuvoko no peulu, makuya ongandavila mailoko motyilongo atyiho tyo Isitu,+ aivete ovanthu, novinyama, novifo vikahi momapia omo Isitu.”+ 23 Mwisesi atandaveka otyimuti tyae no peulu Siovaa aeta omitetanena nongandavila; keulu akutundu otupia* atutokela pohi, Siovaa alokesa ongandavila motyilongo tyo Isitu. 24 Akuloko ongandavila, aiya notupia otunene mokati kongandavila. Akuloko ombila onene yongandavila; kakunekale ongandavila nga ina nkhele o Isitu yakalele otyilongo.+ 25 Ongandavila ailoko momapia aeho o motyilongo tyo Isitu, aivete ovanthu novinyama, aiteye ovifo nomiti aviho momapia.+ 26 O kotyilongo tyo Ngosene vala, kukala ova Isilayeli kwahalokele ongandavila.+
27 Pahe Falaoo aihana Mwisesi na Alau evetolela okuti: “Hono netyimona okuti nalinga onkhali. Siovaa omuviuki, ame novanthu vange twapengesa. 28 Kalavandyei Siovaa, itei atalameke omitetanena nongandavila vili nokutunda Kwe. Ame mandyimuyeke mwende mwahakale vali muno.” 29 Mwisesi emupopila ati: “Nga natunda mepunda-umbo mandyikatandaveka omavoko ku Siovaa. Omitetanena mavitalama, ongandavila kamailoko vali, opo ove tatekulu utyimone okuti ohi oya Siovaa.+ 30 Mahi ame no ngootyo ndyityii okuti ove novaundapi vove kamamutili-ale Siovaa Huku.”
31 Olinyu nosevata yahanyaunwa-po, mokonda osevata yatyita, olinyu yatema. 32 Otiliku nosandeyu, ayahahanyauka mokonda nkhele opo kainekule.* 33 Mwisesi atundu ponthele ya Falaoo, aende kondye yepunda-umbo; atandaveka omavoko no ku Siovaa, omitetanena nongandavila avitalama, ombila ayahaloko vali motyilongo.+ 34 Falaoo okutyimona okuti ombila yatya-ko ongandavila nomitetanena viatalama, alingi onkhali ateneka vali omutima wae,+ aveho novaundapi vae. 35 Falaoo ateneka omutima ahayeke ova Isilayeli vaye, ngeetyi Siovaa apopile etyi atuma Mwisesi.+