Omukanda wa Vali Onohamba
16 Menima 17 Peka omona wa Lemaliya eli nokutumina, Akasi+ omona wa Sotau ohamba yo Sundaa, akala ohamba. 2 Akasi wali nomanima 20 etyi akala ohamba, atumina omanima 16 mo Selusalei. Kalingile etyi tyaviuka komaiho a Siovaa Huku yae, ngeetyi tyalingile+ Ndaviti he-mbwale yavo. 3 Tyehe-otyo vala, waendelele monondyila mbonohamba mbo Isilayeli,+ atee umwe wapakele omona wae motupia*+ okulandula oviso vitoyesa viovanthu+ Siovaa ataatele otyo ova Isilayeli vatala. 4 Tupu wapakulile ovilikutila, alingila ovilikutila viokutwima ponomphangu mbukola mbaya peulu+ no kovipunda no mombwelo yomiti aviho viokwavinda.+
5 O pononthiki opo Lesii ohamba yo Silia na Peka omona wa Lemaliya ohamba yo Isilayeli, vakalwisile o Selusalei.+ Avelisete na Akasi avemupake pokati mahi avehetyivili okuvepola epunda-umbo. 6 Pononthiki opo Lesii ohamba yo Silia aikondola o Elate+ ko Endoo etyi ataata ova Sundaa* ko Elate. Ova Endoo avanyingila mo Elate ngamo vakala atee onthiki yo hono. 7 Pahe Akasi atumu ovatumwa-ndaka ku Tingilate-Pilesele+ ohamba yo Asilia, avemupopila okuti: “Ame ndyimuundapi wove, ndyimona wove. Endyu undyovole pomavoko ohamba yo Silia no pomavoko ohamba yo Isilayeli vekahi nokundwisa.” 8 Akasi apolo opalata noolu ikahi mondywo ya Siovaa no momalumono omondywo* yohamba, eitumu kohamba yo Asilia opo elipume-po.+ 9 Ohamba yo Asilia aitavela etyi yaitwa ayeende aitambula-ko o Ndamasiku, ovanthu vatyo aivetwala koupika ko Kile,+ aiipaa Lesii.+
10 Ohamba Akasi aende ko Ndamasiku avekelivasa na Tingilate-Pilesele ohamba yo Asilia. Etyi amona omutala wovilikutila ukala ko Ndamasiku, Akasi atumu ku Uliyasi omunakwa otyilekeso tyomutala wovilikutila opo atale oñgeni ukahi neetyi walingwa.+ 11 Uliyasi+ omunakwa atungu omutala wovilikutila,+ ngeetyi ohamba Akasi atuma etyi ekahi ko Ndamasiku. Uliyasi amane okutunga omutala wovilikutila etyi ohamba Akasi ehenetunde ko Ndamasiku. 12 Etyi ohamba yatunda ko Ndamasiku aimono omutala wovilikutila, aifwene-po ailingila-ko oviawa.+ 13 Ayokela komutala wovilikutila oviawa viokuyokwa vitunde omwihi noviawa viovilia, tupu anengulila-ko oviawa viovikunwa, anyanye ohonde yovilikutila viombembwa komutala wovilikutila. 14 Pahe apolo-po omutala wovilikutila wotyivela otyitasu+ wali pu Siovaa komutwe wondywo, pokati komutala wae wovilikutila nondywo ya Siovaa, eupake ponthele yomutala wae wovilikutila kombanda. 15 Ohamba Akasi atumu Uliyasi+ omunakwa okuti: “Linga oviawa vyo komuhuka viokuyokwa komutala omunene wovilikutila+ vitunde omwihi noviawa viovilia kokangulohi, tupu notyiawa tyokuyokwa tyohamba notyiawa tyayo tyovilia,+ tupu lingila-ko ovanthu aveho oviawa viokuyokwa noviawa viovilia, noviawa viovikunwa. Tupu una okunyanya ohonde aiho yovilikutila viokuyokwa komutala wovilikutila nohonde aiho yovilikutila ovikwavo. Omutala wovilikutila wotyivela otyitasu, oo mandyiusokela etyi mandyiulingi.” 16 Uliyasi omunakwa alingi atyiho ohamba Akasi yemutumine.+
17 Tyihe-otyo vala, ohamba Akasi aiteta-teta omalutalatu omononthele mboutuku-tuku+ eupolo onombasiya,+ tupu apolo-ko Elunga likahi kombanda yonongombe mbotyivela otyitasu+ mbokweliyaka, elipake pohi pokwatungwa nomamanya.+ 18 Mokonda yohamba yo Asilia, ahanyauna omphangu yokwayambelwa yatungilwe mondywo ya Siovaa, yokwatungililwe mondywo ilingilwa ovilinga motyasapalo, tupu ahanyauna ombundi yo kondye inyingilila ohamba.
19 Ovipuka ovikwavo viehipululo lya Akasi, ovipuka alingile, kaviahonekelwe momukanda Wonohamba mbo Sundaa?+ 20 Pahe Akasi akapululukwa-po nonombwale mbavo, akapakwa komaendo onombwale mbavo Kempunda-Umbo lya Ndaviti, Isekiya*+ omona wae emupingi kovipundi.