Omukanda wa Vali Onohamba

17 Menima 12 Akasi ohamba yo Sundaa eli nokutumina, Oseya+ omona wa Elaa akala ohamba yo Isilayeli mo Samaliya, atumina omanima etyive. 2 Walingile etyi tyapenga komaiho a Siovaa mahi ha ngonohamba ononkhwavo mbo Isilayeli mbatetekelele kwe. 3 Salumanesele ohamba yo Asilia eya okumulwisa,+ Oseya akala omuundapi wae ahimbika okufeta elilimu kwe.+ 4 Mahi ohamba yo Asilia ainoñgonoka okuti Oseya welipaka kumwe novanthu vokwemutyitukila-po, mokonda watumine ovatumwa-ndaka ku Soo ohamba yo Isitu,+ pahe ahatwala-twala vali elilimu kohamba yo Asilia ngeetyi alinga kohale. Mokonda yotyo ohamba yo Asilia aimuyekela mokaleya tyakutwa.

5 Ohamba yo Asilia aiya okulwisa otyilongo atyiho, aihiki ko Samaliya avapake pokati epunda-umbo omanima etatu. 6 Menima lya tyive Oseya atumina, ohamba yo Asilia atambula-ko o Samaliya.+ Pahe aitwala ova Isilayeli koukonde+ ko Asilia aivetwala vakakale mo Alaa nomo Hambole, ponthele pondongi Ngosaa+ no momapunda-umbo ova Mendia.+

7 Valingwa tupu ngootyo omokonda ova Isilayeli valinga onkhali ku Siovaa Huku yavo ou wevepola kotyilongo tyo Isitu,+ vahatuminwe vali na Falaoo ohamba yo Isitu. Vafenda* kovika-huku,+ 8 valandula oviso viovanthu vovilongo Siovaa ataatele komutwe wova Isilayeli, avalandula oviso onohamba mbo Isilayeli mbapakele-ko.

9 Ova Isilayeli vaovolele okukala novipuka viahaviukile komaiho a Siovaa Huku yavo. Vatungile onomphangu mbukola mbaya peulu momapunda-umbo+ avo aeho, okuhimbikila ketala liomulavi atee kepunda-umbo liokwapama.* 10 Avelitungila onomphandyi mbukola novipandyi vikola*+ vili kovipunda aviho viokwaya peulu, no mombwelo yomiti aviho viokwavinda;+ 11 ponomphangu ambuho mbokwaya peulu vatwimina-po ovilikutila ngeetyi tyilinga ovanthu vovilongo Siovaa ataatele komutwe wavo.+ Valingile ovipuka viapenga vanumanese Siovaa.

12 Avatwalako okulingila ovilolo vitoyesa,+ vina Siovaa evepopilile okuti: “Mwahafendei kuvio.”+ 13 Siovaa atwalako okulondola o Isilayeli no Sundaa mokutuma ovauli vae aveho novatali+ aveho okuti: “Yekei-po onondyila mbenyi onombi!+ Endelei movitumino viange no mwetyi ndyipopia, ngeetyi tyipopia otyitumino atyiho napele ovakwaukulu venyi, tyina neveavelele pweetyi natuma ovaundapi vange ovauli.” 14 Mahi ngwe avehetavela avatwalako nonkhango* ngovakwaukulu vavo vahayumbile onthumbi mu Siovaa Huku yavo.+ 15 Vatwaileko okuhetavela ovitumino viae, nomphango+ alingile novakwaukulu vae nomahinangeleso eveavelele opo evelondole,+ valandula ovilolo vihaviukile,+ navo avakala ovanthu vehekahi nawa.+ Vahetekelele ovanthu vovilongo vikala popepi navo, otyipuka Siovaa ailika.+

16 Vayekele-po ovitumino aviho vya Siovaa Huku yavo, avalingi ovilolo vivali viotyivela* vikahi ngonthane+ notyipandyi tyimwe tyikola,*+ avafende komambamba ovita o keulu,+ avaumbila Mbaale.+ 17 Tupu avapake motupia*+ ovana vavo ovakwendye novakainthu, avelipake movitapi,+ avahimbika okutaindya ovatali,* avelipake* mokulinga ovipuka viapenga komaiho a Siovaa opo vemunumanese.

18 Mokonda yotyo Siovaa anumanena unene ova Isilayeli, komaiho ae evenyimi-ko.+ Nawike asile-po, o vomuhoko wa Sundaa vala.

19 Atee umwe ova Sundaa kavaendelele movitumino vya Siovaa Huku yavo,+ navo vaendelele moviso ova Isilayeli valandula.+ 20 Siovaa ayeke-po ovanthu aveho vatuka mo Isilayeli, evekundisa evepakula pomavoko ovifwanga, evetaata ponthele yae. 21 Atukula o Isilayeli meumbo lya Ndaviti, ngwe avapake kouhamba Selombowau omona wa Nembate.+ Mahi Selombowau ayapula ova Isilayeli kokulandula Siovaa, avalingi onkhali onene. 22 Ova Isilayeli avatwalako okulinga ononkhali Selombowau alingile.+ Kavembuyekele-po, 23 atee Siovaa evenyima komaiho ae ngeetyi apopile pweetyi atuma ovaundapi vae aveho ovauli.+ Ova Isilayeli avapolwa motyilongo tyavo, avatwalwa koupika ko Asilia,+ oku vekahi atee hono.

24 Pahe ohamba yo Asilia aipolo ovanthu ko Mbambilonia no ko Kute, no ko Ava, no ko Hamate, no ko Sefalavaii,+ evepake momapunda-umbo o Samaliya pomphangu yova Isilayeli, avapingi mo Samaliya, avakala momapunda-umbo atyo. 25 Etyi vehika-mo, ponthyimbi kavatilile* Siovaa. Siovaa atumu ononkhulika+ ambwipaa vamwe puvo. 26 Ohamba yo Asilia aveipopila okuti: “Ovanthu tatekulu atwala koupika, vana apaka momapunda-umbo o Samaliya kavetyivili okufenda Huku yotyilongo. Huku yatyo ukahi nokutuma ononkhulika mbukahi nokuveipaa, mokonda nawike utyivila okufenda Huku yotyilongo.”

27 Ohamba yo Asilia aitumu okuti: “Kondolei wike povanakwa mwatwala koupika vana mwapola motyilongo otyo, ngako akakala evelongesa oñgeni mavafende Huku yotyilongo.” 28 Pahe wike povanakwa vokwapolelwe ko Samaliya avatwalwa koupika, akondoka ko Mbetele+ ahimbika okulongesa ovanthu oñgeni vena okutila* Siovaa.+

29 Mahi ovanthu atyiti ava valinga huku yavo* ovakwavo valinga huku yavo, avapake ovika-huku monondywo mbokufendela mbo ponomphangu mbukola mbaya peulu mbalingwa nova Samaliya. Ovanthu vovilongo aviho ngootyo valinga mepunda-umbo vakala. 30 Pahe ovanthu vo ko Mbambilonia avalingi Sukote-Mbenote, vo ko Kute avalingi Nelengali, vo ko Hamate+ avalingi Asima, 31 vo ko Ava avalingi Nimbasi na Taletake. Ova Sefalavaii avayoko ovana vavo motupia opo veveave ku Andalameleke na Anameleke ovika-huku vyo ko Sefalavaii.+ 32 Namphila vatila Siovaa, avaholovona ovalume movanthu vavo mwene opo vakale ovanakwa ponomphangu mbukola mbaya peulu, ovanakwa ovo veveitila-ko monondywo mbokufendela mbo ponomphangu mbukola mbaya peulu.+ 33 Vahula umwe okuti vatila Siovaa mahi otyo vafenda ovika-huku viavo, ngeetyi tyilingwa monongeleya* mbovanthu vovilongo oku vatunda.+

34 Atee hono valandula onongeleya* mbavo mbo kohale. Nawike puvo usamba* ku Siovaa nawike ulandula etyi ndyipopia, novitumino viae vionomphela nii Otyitumino tyae. Tupu nawike utavela ovitumino vina Siovaa aavelele ovana va Sakoo una apilululile enyina alikala Isilayeli.+ 35 Etyi Siovaa alingile omphango navo+ wevepopilile okuti: “Muhatilei ovika-huku nii muhelipetamenei kuvio, nii muheviumbilei, nii muheviavelei+ ovilikutila. 36 Mahi muna okutila Siovaa una wemupola kotyilongo tyo Isitu nononkhono mbae ononene nokuvoko+ kwae kwatandavela, o Kwe vala muna okulipetamena,+ oe vala muna okulingila ovilikutila. 37 Apeho muna okutavela etyi apopia, novitumino viae vionomphela, Notyitumino tyae. Tupu muna okutavela ovitumino emuhonekela.+ Mwahatilei ovika-huku. 38 Mwahalimbwei omphango nalinga noonwe,+ tupu mwahatilei ovika-huku. 39 Mahi o Siovaa vala Huku yenyi muna okutila, mokonda oe memuyovola pomavoko onondyale mbenyi ambuho.”

40 Mahi avehemutavela avalandula onongeleya* mbavo mbo kohale.+ 41 Ovanthu ovo vovilongo vatila umwe Siovaa,+ mahi tupu vaumbila ovilolo viavo viahongwa. Atee hono tyilinge ovana vavo tyilinge vana vatuka muvo valinga ngeetyi onombwale mbavo valingaile.