Omukanda wo Tete Ehipululo
22 Ndaviti ati: “Pano mapakala ondywo ya Siovaa Huku yotyotyili, opo mapakala omutala wovilikutila viokuyokwa wova Isilayeli.”+
2 Ndaviti aihana ovanthu aveho ononthunda-vilongo+ vakala mo Isilayeli, evepe otyilinga tyokuhonga omamanya, nokweviukisa nawa, opo atunge ondywo ya Huku yotyotyili.+ 3 Ndaviti tupu aongiya ovivela ovinyingi viokunthila onopeleko mbomapito o konombundi, novivela viokukwata ovipuka, novitasu ovinyingi viehevilwa okweelekwa,+ 4 nomavai omanyingi omisendulu,+ mokonda ova Sindone+ nova Tilu,+ vaetelele Ndaviti omavai omanyingi omisendulu. 5 Ndaviti ati: “Omona wange Salomau, nkhele omututu, kei nawa ovipuka,*+ ngwe ondywo maitungilwa Siovaa ina okukala onene unene,+ opo omunkhima wayo, nouwa wayo,+ unoñgonokwe movilongo aviho.+ Mokonda yotyo, mandyimwonganekela-ko ovipuka.” Ngootyo, Ndaviti aonganeka ovipuka ovinyingi tyina nkhele ehenenkhie.
6 Konyima, aihana omona wae Salomau, emupopila opo atunge ondywo ya Siovaa, Huku yo Isilayeli. 7 Ndaviti apopila omona wae Salomau okuti: “Mwene etyi ame nahandele komutima wange, okutunga ondywo inkhimaneka enyina lya Siovaa, Huku yange.+ 8 Mahi, Siovaa amphopila okuti: ‘Ove wanengula unene ohonde, welipaka-paka movilwa ovinene. Ove kumatungu ondywo inkhimaneka enyina liange,+ mokonda wanengula unene ohonde komaiho ange kombanda yohi. 9 Tala! Ove mokala nomona omukwendye,+ makakala omunthu wombembwa,* mandyikemupululukiswa-po konondyale mbae ambuho mbeliseta nae,+ mokonda enyina liae makatiwa o Salomau.*+ Mononthiki mbae, mandyikaeta ombembwa netuliyo mo Isilayeli.+ 10 Omona oo, oe makatunga ondywo mainkhimaneka enyina liange.+ Makakala omona wange, ame andyikakala tate yae.+ Mandyikapameka otyipundi tyouhamba wae mo Isilayeli apeho.’+
11 “Pahe mona wange, Siovaa akale noove, atyiho tyikweende nawa, tunga ondywo ya Siovaa, Huku yove, ngeetyi apopia konthele yove.+ 12 Siovaa ekukwateseko okukala tyalunguka, nokukala nenoñgonoko+ tyina amekwavela outumini mo Isilayeli, opo weendele movitumino vya Siovaa, Huku yove.+ 13 Atyiho matyikweende vala nawa, tyina weendela nawa-nawa movitumino,+ nomovitumino vionomphela Siovaa atumine Mwisesi evipopile ova Isilayeli.+ Kola omutima, kala tyapama. Wahatile owoma, nii wahatekete.+ 14 Nalinga ononkhono mbokwonganeka ovipuka viokutunga ondywo ya Siovaa: Onotalendu* 100.000 mboolu, no notalendu 1.000.000 mbopalata, novitasu, novivela+ ovinyingi-nyingi, vihevilwa okupeyalwa. Tupu naonganeka omavai, nomamanya,+ mahi ove moyawisa-ko vali. 15 Ove una ovaundapi ovanyingi: Vokuhonga omamanya,+ nomavai, no vokutunga ovimato. Una ovaundapi vatyo aveho ovanongo.+ 16 Oolu, nopalata, novitasu, novivela, kavilifwe pano.+ Pahe, katuka, ohimbika okutunga, Siovaa akale noove.”+
17 Ndaviti atumu ononkhalamutwe ambuho mbo Isilayeli mbukwateseko Salomau, omona wae, ati: 18 “Okuti Siovaa Huku yenyi, kekahi noonwe, kemupululukisilwe-po kononthele ambuho? Ovanthu aveho vokukala motyilongo etyi, wevepakula kwaame, atuvetilisa otyo Siovaa novanthu vae vetyeete. 19 Pahe, mwene koyei nomutima wenyi auho, nohande* yenyi aiho, okwovola Siovaa Huku yenyi,+ amuhimbika okutunga omphangu ikola ya Siovaa Huku yotyotyili,+ opo mutwale otyikasa tyomphango tya Siovaa, novityuma vikola vya Huku yotyotyili,+ mondywo maitungwa, ainkhimaneka enyina lya Siovaa.”+