Omukanda wa Vali Ehipululo
21 Seosafaa akapululukwa-po nonombwale mbavo, akapakwa konombwale mbavo Kepunda-umbo lya Ndaviti; omona wae Seolau, emupingi kovipundi.+ 2 Onondenge mbae ankho tyati: O Asaliya, o Seyeli, o Sakaliya, o Asaliya, o Mikaeli na Sefatiya. Aveho ovo, ankho ovana va Seosafaa, Ohamba yo Isilayeli. 3 Tate yavo, weveavelele opalata onyingi, noolu, novipuka oviwa, nomapunda-umbo okwapama mo Sundaa.+ Mahi, ouhamba ewaavela Seolau,+ mokonda ankho oe otyiveli.
4 Etyi Seolau apinga kouhamba wa he, opo apameke outumini wae, aipaa onondenge mbae ambuho nomutunga,+ nononkhalamutwe mbumwe mbo Isilayeli. 5 Seolau wali nomanima 32 etyi akala ohamba, atumina omanima etyinana mo Selusalei.+ 6 Waendelele monondyila mbonohamba mbo Isilayeli,+ walingile ngeetyi veumbo lya Akambe valingile, mokonda wanepele omona wa Akambe;+ walingile ovipuka ovivi komaiho a Siovaa. 7 Mahi Siovaa ankho kahandele okuhanya-po eumbo lya Ndaviti, mokonda yomphango alingile na Ndaviti,+ tyeetyi walaele okupa okandiyelo katema Ndaviti akalingi kae novana vae atee-tee.+
8 Pononthiki mba Seolau, ova Endoo avatyitukila-po o Sundaa,+ avelitaindyila ohamba yavo mwene.+ 9 Seolau aende novanene vatyo vovita, vomatemba ae aeho ovilwa ko Saile, tyina tyiti kounthiki, alwisa ova Endoo evepake pokati kumwe no vomatemba ae ovilwa, ova Endoo avatili-ko. 10 Ova Endoo valwisa ova Sundaa atee onthiki yo hono. Ova Limbina+ navo o pononthiki opo vemutyitukila-po mokonda wayeka-po Siovaa, Huku yovakwaukulu vae.+ 11 Seolau tupu ankho walinga onomphangu mbukola mbaya peulu+ konomphunda mbo Sundaa opo ahongiliye vokukala mo Selusalei okulinga oumbalehi nono huku mbovilongo ovikwavo,* nokuyapula o Sundaa.
12 Konyima, apewa omukanda watunda komuuli Iliya,+ upopia okuti: “Etyi otyo tyapopia Siovaa, Huku ya Ndaviti omukwaukulu wove: ‘Ove kwaendelele monondyila mba tate yove Seosafaa,+ nii monondyila mba Asa,+ ohamba yo Sundaa. 13 Mahi ove weendela monondyila mbonohamba mbo Isilayeli,+ kombanda yove, o Sundaa, no vomo Selusalei valinga oumbalehi nono huku mbovilongo ovikwavo+ ngo veumbo lya Akambe.+ Ove atee umwe waipaa onondenge mbove mwene,+ veumbo lya tate yove, ankho vekahi vali nawa tyipona ove. 14 Siovaa mavange ovanthu vove, novana vove, novakai vove, nomalumono ove aeho. 15 Ove mokala nomauvela omanyingi, tupu mokala nouvela umwe momala mauvili-po nthiki-na-nthiki, atee omala ove eya kondye.’”
16 Siovaa alundu+ ova* Filisitiya,+ nova Alambe+ ankho vakala ponthele yo Etiopia opo valwise Seolau. 17 Avaululila mo Sundaa, aveilwisa, avatyindi omalumono aeho vavasa meumbo liohamba,*+ novana vayo, novakai vayo, apesala vala omona wike, Seowakasi,*+ onkhelo yae. 18 Konyima yovipuka ovio aviho, Siovaa ayumbu Seolau ouvela umwe momala uhahakulwa.+ 19 Mokweenda kwononthiki, etyi palamba omanima evali, omala ae aeya kondye mokonda youvela wae. Ankhi omapita mokonda youvela wae omuvi. Ovanthu vae, pokukemupaka avehemunthiakanena otupia ngeetyi valingaile povakwaukulu vae.+ 20 Etyi alinga ohamba una omanima 32, watuminine mo Selusalei omanima etyinana. Etyi anyima, nawike wemulilile. Avekemupaka Mepunda-umbo lya Ndaviti,+ mahi avehemupake pomaendo onohamba.+