Omukanda wa Vali Ehipululo
26 Ovanthu aveho mo Sundaa, avapolo Usiya+ etyi ena omanima 16, avemuvialeka kouhamba, apingi pu Amasiya,+ tate yae. 2 Apindula-po o Elate+ eikondola ko Sundaa etyi ohamba* yakapululukwa-po novakwaukulu vayo.+ 3 Usiya+ wali nomanima 16 etyi akala ohamba, atumina omanima 52 mo Selusalei. Ina o Sekoliya, omu Selusalei.+ 4 Walingile etyi tyaviuka komaiho a Siovaa, ngeetyi tate yae Amasiya alingile.+ 5 Watwaileko okwovola Huku, pononthiki mba Sakaliya, wokwemulongesile okukala nonthilo na Huku yotyotyili. Ononthiki ambuho ankho aovola Siovaa, Huku yotyotyili wemukwatesileko okulinga nawa ovipuka.+
6 Nthiki imwe etyi akalwisa ova Filisitiya,+ atiula otyimato tyo Ngate,+ no tyo Sambinee,+ no tyo Asindonde,+ avikala nomamphana. Konyima, atungu omapunda-umbo mohika yo Asindonde, no yova Filisitiya. 7 Huku yotyotyili atwalako okumukwatesako pokulwa nova Filisitiya, nova Alambia+ vakala mo Ngulembaali, nova Meunii. 8 Ova Amoo+ avahimbika okufeta elilimu ku Usiya. Katutu-katutu, omunkhima wae aukehika ko Isitu, mokonda ankho wakala omunene unene. 9 Tupu, Usiya watungile ovimato viaya unene peulu+ mo Selusalei, ponthele Yombundi yo Pevindi,*+ no ponthele Yombundi Yomulola,+ no ponthele Yondyako, evipameka. 10 Atungu vali ovimato viaya peulu+ moluhandya, aheye-mo* ononyombo ononyingi (mokonda wali novipako ovinyingi.) Tupu ngatyo alinga mo Sefelaa, nomonthanthalahi.* Konomphunda no ko Kalumelu wapakele-ko ovalimi novalume vokuundapa momapia omiti vionouva, mokonda okulima ankho utyihole.
11 Usiya tupu wakalele nomafwalali afwapo opo aye movilwa. Ankho venda aveho movilwa, vatepaulwa ovikundyi-ovikundyi. Vavalulilwe, avahonekwa+ nomuhoneki Seyele+ na Maaseya onkhalamutwe, ankho vahongolelwa na Hananiya, umwe povakwatesiko vohamba. 12 Ononkhalamutwe ambuho ankho mbutumina ovakwa-vita ovo vokwapama, ankho vena 2.600. 13 Ankho vahongolela omaswalali ena 307.500, ovalume vokwafwapo opo vaye kovilwa. Ankho omaswalali amwe okwapama, akwatesako ohamba pokulwisa onondyale.+ 14 Usiya amanekesa omaswalali aeho, onondyakulilo, nomaonga,+ nomakapasete,* novikutu viovilwa,+ nononkhondyi, nononthwala mbokuyumba omamanya.+ 15 Tupu, apake mo Selusalei onomakina mbovilwa, mbanthilwa novanongo. Onomakina ombo, ambupakwa movimato viokwaya peulu,+ no pomavindi* otyimato, ankho mbuyumba onohevo, nomamanya omanene. Ngootyo, omunkhima wae awiivala kokule, mokonda wakwatesilweko unene, ankho wapama unene.
16 Mahi, etyi akala omunene, omutima wae auhimbika okukala nomalityindailo, elietela ehanyu. Kakalele omukwatyili ku Siovaa Huku yae, etyi anyingila mondywo ya Siovaa opo ayoke onombao* komutala wokuyokela onombao.+ 17 Wati vala nyingilee, omunakwa Asaliya, novanakwa ovakwavo va Siovaa vena 80 vokwakola omutima, avemulandula. 18 Avanumanena ohamba Usiya avemupopila okuti: “Usiya, ove have-ko una okuyokela Siovaa onombao!+ Ovanakwa vala vokwasukukiswa vena okuyoka onombao, mokonda vatuka mu Alau.+ Lupuka momphangu onthyukuki, mokonda kwakalele omukwatyili, kumapewa vali omunkhima na Siovaa Huku, mokonda yetyi walinga.”
19 Mahi Usiya anumana unene. Ankho wakwata peke otyilindo tyokuyokela onombao, opo ayoke onombao. Wati vala numanee,+ mombamba yae amutumbu otyilunda,+ otyo eli ponthele yovanakwa mondywo ya Siovaa, ponthele yomutala wonombao. 20 Etyi Asaliya onkhalamutwe yovanakwa, novanakwa ovakwavo vemutala, vakati ñgana, watumba otyilunda mombamba! Avekemukunkhuminya no pondye, mwene nae alupuka-mo liwa, mokonda Siovaa wemuvanga.
21 Ohamba Usiya wakalele notyilunda atee umwe anyima, ankho ikala vala mondywo aike,+ mokonda mondywo ya Siovaa wapolelwe-mo. Omona wae Sotau, ngae usala meumbo liohamba* otyo ateta onomphela mbovanthu motyilongo.+
22 Ovipuka ovikwavo vipopia Usiya, okuhimbikila konthyimbi atee konthyulilo, viahonekwa nomuuli Isaiya,+ omona wa Amosi. 23 Pahe Usiya akapululukwa-po nonombwale mbavo, avekemupaka komaendo onombwale mbavo. Mahi avemupake vala mepia lionohamba, mokonda vati: “Una otyilunda.” Omona wae Sotau,+ emupingi kovipundi.