Omukanda wo Tete Ehipululo
28 Ndaviti aongiya ononkhalamutwe ambuho mbova Isilayeli mo Selusalei, ononkhalamutwe mbomihoko, no mbovikundyi+ viokuundapela ohamba, no mbovityita ekwii, no mbotyita,+ nononkhalamutwe mbomalumono aeho, no mbovipako aviho viohamba+ no viovana vae,+ nononkhalamutwe mbo mombala no mbovalume aveho vokwafwapo, vokwapama.+ 2 Ohamba Ndaviti akatuka, ati:
“Nthehelelei vakulu vange, nondenge mbange, vanthu vange. Komutima wange, nahandele okutunga ondywo, mukale Otyikasa Tyomphango tya Siovaa, tupu aikala otyiliatelo tyonomphai mba Huku yetu.+ Pahe, mandyionganeka atyiho itungwe.+ 3 Mahi Huku yotyotyili amphopila okuti: ‘Ove kumatungu ondywo inkhimaneka enyina liange,+ mokonda ove umukwa-vita, wanengula ohonde.’+ 4 Siovaa Huku ya Isilayeli, meumbo lya tate ame akoya-mo opo ndyikale ohamba yova Isilayeli apeho,+ mokonda wakoya Sundaa akale omutumini.+ Meumbo lya Sundaa, wakoya-mo eumbo lya tate,+ povana va tate ame apanda-po, ankhalese ohamba yova Isilayeli aveho.+ 5 Pahe povana vange aveho, mokonda Siovaa wampha ovana ovanyingi,+ wakoya-po Salomau,+ apumphame kotyipundi tyouhamba tya Siovaa, atumine ova Isilayeli.+
6 “Amphopila okuti: ‘Omona wove Salomau, oe matungu ondywo yange, nomapata ange, mokonda nemukoya akale omona wange, ame mandyikala tate yae.+ 7 Ine ukoya-po okutwalako okweendela movitumino viange, nomovitumino viange vionomphela+ ngeetyi ekahi nokulinga pehepano, mandyikapameka ouhamba wae apeho.’+ 8 Pahe, ndyimupopila komaiho ova Isilayeli aveho, ovanthu aveho va Siovaa, otyo Huku yetu etyiivite, okuti: Ovolei okunoñgonoka ovitumino aviho vya Siovaa Huku yenyi, amweendela-mo nawa, na mukale-kale motyilongo etyi otyiwa,+ amutyiavela ovana venyi, atyikakala-kala epingo liavo.
9 “Ove Salomau, mona wange, noñgonoka Huku ya tate yove, omulingila nomutima auho,*+ nohande* ihanda otyiwa,* mokonda Siovaa utala nawa omitima aviho,+ upunga nawa oku kwayembela omalusoko aeho.+ Ine umwovola, momuvasi.+ Mahi ine umuyeka-po, ngwe mekekutoya-toya.+ 10 Noñgonoka okuti, ove Siovaa akoya utunge ondywo, aikala omphangu onthyukuki. Kola omutima, ohimbika okuundapa.”
11 Ndaviti aavela omona wae Salomau omukanda ulekesa+ oñgeni otyikulilo tyokwaya peulu,+ nonondywo mbatyo, novilimba, nonondywo mbo keulu, nonondywo mbo mokati, nondywo yokupata* ononkhali,+ vina okutungwa. 12 Emwaavela vali omukanda ulekesa ovipuka aviho apopilwa etyi afiminwa na Huku: Omapata+ ondywo ya Siovaa, nonondywo mbokulila mbeliseta nayo, novilimba viokupaka omalumono ondywo ya Huku yotyotyili, no viovipuka viapakulwa avikala omalumono akola.+ 13 Tupu, emupopila atyiho konthele yovikundyi viovanakwa+ no viovana va Levii, novilinga aviho vyo mondywo ya Siovaa, novityuma aviho viundapeswa mondywo ya Siovaa. 14 Emupopila otyiñgapi oolu ina okulema (oolu mailingwa ovipuka aviho maviundapeswa movilinga vielikalaila), otyiñgapi ovipuka aviho viopalata vina okupeyala, novipuka aviho viundapeswa movilinga vielikalaila; 15 otyiñgapi okandiyelo keke okalaale koolu+ kena okulema, nomitwe viatyo vioolu; otyiñgapi okandiyelo keke okalaale kopalata nomitwe viako vina okulema, okutalela kweetyi vialingilwa; 16 otyiñgapi omesa ike yoolu yonombolo mbotyiawa+ ina okupeyala; otyiñgapi omesa ike yopalata ina okulema; 17 otyiñgapi omalutwa, novilindo, nomalufo oolu yakangulwa nawa vina okupeyala; otyiñgapi okalindo+ keke koolu kena okupeyala; otyiñgapi okalindo keke kopalata, kena okulema. 18 Tupu emupopila otyiñgapi oolu yakangulwa yomutala wonombao*+ ina okupeyala, no yetuku-tuku liotyilekeso,+ etuku-tuku olio, ono kelumbii+ mboolu mbatandaveka omavava keulu liotyikasa tyomphango tya Siovaa. 19 Ndaviti ati: “Okuvoko kwa Siovaa ankho kuli kwaame, amphe ounongo wokupunga ovipuka opo ndyihoneke+ ovipuka aviho konthele yo ñgeni ondywo ina okutungwa.”+
20 Pahe Ndaviti apopila omona wae Salomau, ati: “Kola omutima, kala tyapama, ohimbika okuundapa. Wahatile owoma wahalinge otyiho, mokonda Siovaa Huku, Huku yange, una ove.+ Kamekusi-po, nii kamekuyeke-po,+ makala no ove atee uvitula otyilinga tyondywo ya Siovaa. 21 Evi ovikundyi viovanakwa+ no viovana va Levii,+ vokulinga ovilinga aviho mondywo ya Huku yotyotyili. Ove una ovanthu veliava, ovanongo vetyivila okulinga ovilinga aviho.+ Tupu una ononkhalamutwe,+ novanthu aveho mavaendela monondonga mbove ambuho.”