Omukanda wa Vali Ehipululo
14 Ambiya akapululukwa-po novakwaukulu vae, akapakwa pomaendo onombwale mbavo Mepunda-umbo lya Ndaviti;+ omona wae Asa akala ohamba emupingi kouhamba. Pononthiki mbae, otyilongo tyakalele mombembwa* momanima 10.
2 Asa walingile etyi tyaviuka, walingile etyi tyikahi nawa komaiho a Siovaa Huku yae. 3 Wahanyaunine omitala viovilikutila vyo no huku mbovilongo ovikwavo,+ nonomphangu mbokwaya peulu, ateye-po onomphandyi mbukola,+ atyoka-tyoka ovipandyi vikola.*+ 4 Tupu watumine ova Sundaa vaovole Siovaa, Huku yovakwaukulu vavo, vaendele Movitumino, no mweetyi evepopila. 5 Asa ahanye onomphangu mbokwaya peulu, nomitala vionombao+ momapunda-umbo aeho o Sundaa. Motyilongo tyae amukala vala ombembwa. 6 Watungile omapunda-umbo okwapama mo Sundaa,+ mokonda motyilongo mwali ombembwa, petupu ou wemulwisile mokweenda kwomanima oo, tyeetyi Siovaa wemwavela ombembwa.+ 7 Apopila o Sundaa okuti: “Tutungei omapunda-umbo aa, atwehondyo novimato ovitutu, no viokwaya peulu,+ atweepake omapito* nomakumba. Mokonda otyilongo nkhele tyili pomavoko etu, tyeetyi twaovola Siovaa, Huku yetu. Onthwe twemwovola, ngwe wetwavela ombembwa kononthele ambuho.” Ovilinga viavo viokutunga aviende nawa.+
8 Mo Sundaa, Asa una-mo omafwalali 300.000 okumaneka onondyakulilo ononene nomaonga. Mo Mbesamii muna ovakwa-vita 280.000 vokwapama vokutyinda onondyakulilo ononthutu,* nokumaneka ononkhondyi.*+
9 Konyima, Selaa omu Etiopia eya okumulwisa nomaswalali 1.000.000, nomatemba ovilwa 300.+ Etyi ehika ko Malesa,+ 10 Asa akatuka opo ekemulwise, ngwe avelionganeka Mevota lyo Sefata mo Malesa opo valwe. 11 Asa elikwambela ku Siovaa Huku yae,+ ati: “Siovaa, ove ukwatesako aveho, tyilinge ovanyingi, tyilinge vana vahapamene.+ Tukwateseko Siovaa Huku yetu, mokonda twayumba onthumbi* mwoove,+ tweya okulwisa ovanthu ava ovanyingi-nyingi+ menyina liove. Siovaa, ove, ove Huku yetu, wahayeke omunthu wokunkhia akale vali tyapama kwoove.”+
12 Siovaa apakula ova Etiopia ku Asa no ko Sundaa, avevetilisa, ova Etiopia avakahomboka.+ 13 Asa novanthu ena-vo, avevetaata atee ko Selale.+ Avaipaa ova Etiopia, apahahupu nawike, mokonda o Siovaa novita viae vevemiangaula. Pahe avapundu ovipuka ovinyingi-nyingi. 14 Tupu, avalwisa omapunda-umbo aeho okweliseta no Selale, tyeetyi atila owoma mokonda ya Siovaa. Avapundu omapunda-umbo aeho mokonda muna ovipuka ovinyingi. 15 Avalwisa vali omakaka o vokuna ovipako, avapundu ovipako ovinyingi nomakamelu, avakondoka ko Selusalei.