Omukanda wa Vali Ehipululo
19 Konyima, Seosafaa Ohamba yo Sundaa akondoka tyili nawa*+ keumbo liae* ko Selusalei. 2 Seuu+ omona wa Hanani+ omutali, aende akahonyena nohamba Seosafaa, emupulu okuti: “Okuti ove una umwe okukwatesako onondingavivi?+ Okuti una okukala nokankhenda na vana veyele Siovaa?+ Siovaa wekunumanena. 3 Mahi Huku wavasa ovipuka oviwa momutima wove,+ mokonda onomphandyi mbukola* motyilongo ove wembuhanya-mo, tupu omutima wove watokola okwovola* Huku yotyotyili.”+
4 Seosafaa atwalako okukala mo Selusalei, akatalelapo ovanthu aveho okupolelela ko Mbelesemba atee kotyilongo tyonomphunda tyo Efalaii,+ opo evekwateseko okufenda vali Siovaa, Huku yovakwaukulu vavo.+ 5 Tupu, apake ovakoyesi motyilongo atyiho, momapunda-umbo aeho okwapamekwa o Sundaa.+ 6 Apopila ovakoyesi okuti: “Talei nawa etyi mukahi nokulinga, mokonda kamukoyesila omunthu, mahi mukoyesila Siovaa. Ngwe una onwe tyina mukoyesa.+ 7 Pahe, kalei nonthilo na Siovaa.+ Lungukei kovipuka aviho mulinga, mokonda Siovaa Huku yetu, utupu onya,+ utupu okapungulula,+ nii kelipumwa-po.”+
8 Tupu, Seosafaa wakoyele ovana vamwe va Levii, novanakwa vamwe mo Selusalei, nononkhalamutwe mbumwe mbomaumbo ovohe ova Isilayeli, opo vakale ovakoyesi va Siovaa, na vatetulule onomphela mbovanthu vakala mo Selusalei.+ 9 Evepopila okuti: “Etyi, otyo onwe muna okulinga nonthilo na Siovaa, noukwatyili, nomutima wenyi auho:* 10 Apeho tyina vana mulilandula navo vamaeta omphela ya umwe wamomesa ohonde,+ ine omphela konthele yovitumino vimwe, hamwe ovitumino vionomphela, muna okuvepakaila-mo, opo vahavelwe onombei komaiho a Siovaa. Ine kamulingi ngootyo, Huku memunumanena kumwe na vana mulikwai navo. Otyo, otyo muna okulinga opo muhavelwe onombei. 11 Amaliya onkhalamutwe yovanakwa, onkhalamutwe yenyi movilinga aviho vya Siovaa.+ Sembandiya omona wa Isimayeli, oe onkhalamutwe meumbo lya Sundaa, movilinga aviho viohamba. Ovana va Levii mavakala ovakwatesiko venyi. Kalei tyapama, himbikei okuundapa, Siovaa akale na vana valinga otyiwa.”*+