Omukanda wa Vali Ehipululo
20 Konyima, ova Moambe,+ nova Amoo,+ kumwe nova Amonii,* aveya okulwisa Seosafaa. 2 Seosafaa apopilwa okuti: “Kukahi nokuya ovanthu ovanyingi-nyingi votyilongo tyo konthele yelunga,* ko Endoo,+ veya okukulwisa, vekahi mo Hasasoo-Tamale, ko Ene-Sendi.”+ 3 Etyi Seosafaa etyiiva atili owoma, aiti* Siovaa emukwateseko.+ Tupu, atumu okupopila ovanthu aveho mo Sundaa vahalie natyike. 4 Ovanthu vo Sundaa aveliongiya opo vaite ku Siovaa.+ Aveho vomapunda-umbo o Sundaa aveya opo vaovole Siovaa.
5 Seosafaa atalama pokati kovanthu vomo Sundaa no vomo Selusalei, mondywo ya Siovaa, komutwe wepata epe, 6 ati:
“Siovaa, Huku yovakwaukulu vetu, have-ko Huku yo komaulu?+ Kutumina omauhamba ovanthu vovilongo?+ Pomavoko ove pena ononkhono, nounongo wokuvila ovipuka, petupu nawike upondola okulwa noove.+ 7 Huku yetu, kwataatele ovanthu vali motyilongo etyi otyo ovanthu vove ova Isilayeli vetyeete? Otyilongo kwetyavelele ovana vatuka mepanga* liove Ambalayau, opo tyikale epingo liavo apeho?+ 8 Pahe omo vakala, vekutungila-mo ondywo ikola inkhimaneka enyina liove,+ avati: 9 ‘Ine tutumbukilwa novihuna viaetwa nomutunga, hamwe atwoongelwa omphela, hamwe omukihi hamwe ondyala, atukala tyitai komutwe wondywo ei no komaiho ove (mokonda enyina liove likahi mondywo ei),+ atuliyavela kwoove opo utukwateseko mononkhumbi mbetu, tutehelele-vo otuyovola.’+ 10 Pahe tala etyi ova Amoo, nova Moambe, novanthu votyilongo tyonomphunda tyo Seili,+ vekahi nokulinga. Ove kwayekele ova Isilayeli valwise ovilongo viavo pweetyi vatunda ko Isitu. Ova Isilayeli avelisete vala navo, avehevehanye-ko.+ 11 Pahe etyi vekahi nokutukondolela, okuya okututaata mohika yove wetwavela opo ikale epingo lietu.+ 12 Huku yetu, kumevekoyesa?+ Ovanthu ava vetukatukila ovanyingi unene, onthwe tutupu ononkhono. Etyi matulingi katutyii,+ omaiho etu atala vala kwoove.”+
13 Pononthiki mbatyo opo, ova Sundaa aveho, novakai vavo, novana* vavo kumwe nononkhupula mbatyo, vetai komutwe wa Siovaa.
14 Mokati kewaneno, ononkhono mba Siovaa ambuya ku Saasiyele omona wa Sakaliya, Sakaliya omona wa Mbenaya, Mbenaya omona wa Seyele, Seyele omona wa Mataniya, watuka mu Levii, umwe povana va Asafe. 15 Saasiyele ati: “Amuho vo Sundaa, noonwe mukala mo Selusalei, Nohamba Seosafaa, tehelelei nawa! Siovaa umupopila okuti: ‘Mwahatilei owoma mwahalingei otyiho mokonda yovanthu ava ovanyingi-nyingi, tyeetyi ovilwa ha-vienyi-ko, ovia Huku.+ 16 Muhuka endei opo mukevelwise. Ngwe mavalondeka nondyila ikwata mo Sisi, mamukevevasa apa pahulila evota,* komutwe woluhandya lwo Seluwele. 17 Onwe kamamusukisa okulwa movilwa evi. Manekei, amukala lutai,+ amutale eyovo litunda ku Siovaa.*+ Ove Sundaa no Selusalei, muhatilei owoma nii muhateketei.+ Muhuka endei opo mukevelwise, Siovaa makala noonwe.’”+
18 Liwa-liwa Seosafaa aikila konongolo elipetamena, o Sundaa aiho no vokukala mo Selusalei, avelipetamena komutwe wa Siovaa opo vafende Siovaa. 19 Ovana va Levii vokwatuka mu Kowate+ no mu Kolaa, avakatuka avahilivika Siovaa, Huku yo Isilayeli, nondaka yakaluluka.+
20 Etyi kwatya, avelimeneka koluhandya lwo Tekowa.+ Tyina vakatuka, Seosafaa atalama ati: “Ove Sundaa noonwe mukala mo Selusalei, nthehelelei! Yumbei onthumbi mu Siovaa Huku yenyi, opo mukale tyapama.* Yumbei onthumbi movatumwa vae,+ opo atyiho tyimweende nawa.”
21 Etyi amana okutomphola novanthu, akoyo ovalume vamwe, opo vaimbile+ Siovaa nokumuhilivika tyavala ovikutu vikola, avakala komutwe wovalume vamaneka oviti, otyo vati: “Pandulei Siovaa, mokonda olwembia lwae olunene lutwalako apeho.”+
22 Etyi vahimbika okwimba nehambu okuhilivika Siovaa, ngwe atele eliva ova Amoo nova Moambe, no vohika yonomphunda yo Seili, vekahi nokuululila o Sundaa, aveliipaa poyavo.+ 23 Ova Amoo nova Moambe, avapilukila-po vohika yonomphunda yo Seili,+ opo veveipae avevehanye-ko. Etyi vamana okwipaa aveho vo ko Seili, navo pahe avelipilukila-po aveliipaa aveho.+
24 Etyi ova Sundaa vehika pomutala womulavi wo moluhandya,+ tyina vakati ñgana, ovanthu aveho ovivimbi vala viakunguvala pohi.+ Petupu nawike una omwenyo. 25 Seosafaa novanthu vae avapundu ovipuka viavo. Vavasile ovipuka ovinyingi oviwa povivimbi, omivalo, novipuka viakolela, avivepono.+ Vakalele ononthiki ononthatu nokututa-tuta ovipuka vapundile, mokonda ovinyingi. 26 Monthiki ya kwana aveliongiya mevota* lyo Mbelaka, avahilivika* Siovaa. Otyo valukila ohika oyo okuti, evota lyo Mbelaka*+ atee hono.
27 Ovanthu aveho vo Sundaa no Selusalei, kumwe na Seosafaa wevekalela komutwe, avakondoka ko Selusalei nehambu, mokonda Siovaa wevehambukiswa etyi atilisa onondyale mbavo.+ 28 Ngootyo, avehiki mo Selusalei otyo vahika ovihumba,+ nononkhwino,+ avaende kondywo ya Siovaa.+ 29 Onohamba ambuho mbovilongo, ambutili owoma Huku, etyi veiva okuti Siovaa walwisa onondyale mbo Isilayeli.+ 30 Ngootyo, ouhamba wa Seosafaa aukala nombembwa, Huku emupululukiswa-po kononthele ambuho.+
31 Seosafaa atwalako okutumina mo Sundaa. Wali nomanima 35 etyi akala ohamba, atumina omanima 25 mo Selusalei. Ina utiwa o Asumba omona wa Sili.+ 32 Waendelele umwe monondyila mba tate yae Asa.+ Kayapukile-mo, walingile umwe etyi tyaviuka komaiho a Siovaa.+ 33 Mahi onomphangu mbokwaya peulu kambahanyenwe-po.+ Ovanthu nkhele kavenetokole momitima viavo okwovola Huku yovakwaukulu vavo.+
34 Ovipuka ovikwavo viehipululo lya Seosafaa, neetyi alingile, okuhimbikila konthyimbi atee konthyulilo, viahonekwa movihonekwa vya Seuu,+ omona wa Hanani,+ navio viahonekwa Momukanda Wonohamba mbo Isilayeli. 35 Mokweenda kwononthiki Seosafaa ohamba yo Sundaa, avalingi oupanga na Akasiya ohamba yo Isilayeli. Akasiya ulinga ovivi.+ 36 Ngootyo, avalingi otyisangela tyokutunga onombaluku mbokwenda ko Talisi,+ vembutungilile ko Esioo-Sembele.+ 37 Ou, Eliyesele omona wa Ndondavau, omu Malesa, aulu konthele ya Seosafaa okuti: “Mokonda ove walinga oupanga na Akasiya, Siovaa mahanyauna etyi watunga.”+ Onombaluku ambunyingila momeva,+ ambehehiki ko Talisi.