Neemiya
4 Etyi Sambalaa+ eiva okuti tuli nokupindula-po otyimato ankhi ononyengo, anumana* unene, ahimbika okulinga omukwele ova Sundaa. 2 Apopila pu vakwavo, ponthele pomafwalali o Samaliya ati: “Ova Sundaa ava vatopa ñgaa, oityi vahanda okulinga? Vasoka okuti hamwe mavetyivili okutunga aveke? Okuti mavetyivili umwe okwaava ovilikutila? Okuti mavamane okutunga onthiki ike atyipu? Mavetyivili okupindula-po omamanya okwapia-apia ekahi monthunthu yombuma?”+
3 Tombiya+ omu Amoo,+ uli ponthele yae ati: “Otyimato vatunga nolunga vala okuliatako, omamanya atyo ahanyuka-po.”
4 Andyilikwambela, andyiti: Tehelavo Huku yetu, tukahi nokulingwa onya,+ omukwele vekahi nokutulinga ukondola no kuvo mwene,+ vatwalwe koukonde kotyilongo tyonondyale mbavo. 5 Weheveyeke tyahavelwa onombei, wahanyime-po+ onkhali yavo mokonda vapenya ovaundapi veli nokutunga.
6 Atutwalako okutunga otyimato. Atupate omamphana atyo aeho, atutyitungu atyihikila pokati okwenda no peulu. Ovanthu avasuku natyo tyokutunga.
7 Etyi Sambalaa na Tombiya+ nova Alambia+ nova Amoo nova Asindonde,+ vetyiiva okuti otyilinga tyokutunga ovimato vyo Selusalei tyikahi nokwenda no komutwe, omamphana ekahi nokupatwa, avankhi unene ononyengo. 8 Avelipakela-mo veye okulwisa o Selusalei, opo ovanthu velihanyauke. 9 Mahi, atulikwambela ku Huku yetu, atupake ovanthu mavayungu komutenya no kounthiki.
10 Pahe vamwe povanthu vomo Sundaa avahimbika okupopia okuti: “Ovaundapi* vaponwa unene, pena onthunthu yeheke onene; onthwe kamatutyivili okutunga otyimato.”
11 Onondyale mbetu ankho vapopia okuti: “Tuveyombelei tyina vehetweete, atunyingila pokati kavo, atuveipaa, ovilinga viavo opo vitalame.”
12 Apeho* tyina ova Sundaa vakala popepi no nondyale tyina vanyingila mepunda-umbo, vati: “Mavetuhitikinyina muno.”
13 Andyipake ovayungi, povimato viokwavota na pana pahapamene konyima yotyimato, neveyapaula omihoko nomihoko, ovalume vokwamaneka omitunga, nomaonga, no nonkhondyi. 14 Etyi netyimona okuti vatila owoma, liwa-liwa andyikapopila omanene-atyo novakwatesiko vovatumini,+ novanthu aveho okuti: “Mwehevetilei owoma.+ Hinangelei okuti Siovaa omunene, oe vali utilisa owoma,+ lwei mwamene ovakulu venyi, novana venyi ovakwendye novahikwena, novakai venyi nomaumbo enyi.”
15 Etyi onondyale mbetu mbetyimona okuti twanoñgonoka etyi vahanda okutulinga, Huku yotyotyili watyopola omphango yavo, onthwe atuho atukondoka kotyilinga tyokutunga otyimato. 16 Okutuka opo, ovanthu vamwe ankho vatunga,+ ovakwavo vayunga nomaonga no nondyakulilo peke no nonkhondyi, ankho vavala ovikutu viondyakulilo. Ovatumini+ vakwatesako aveho veumbo lya Sundaa, 17 vana vatunga otyimato. Vokutyinda vaundapa nokuvoko kwike, okukwavo otyo vakwata ovihongati.* 18 Ava vokutunga aveho vamanekele omitunga otyo vaundapa, omulume wokuhika onkhwino+ ankho ukala ponthele yange.
19 Andyipopila omanene-atyo novakwatesiko vovatumini novanthu aveho okuti: “Otyilinga etyi otyinene, otyimato otyilaale, pahe tweliyandyana natyo atyiho, twelikalela unene kokule na vakwetu. 20 Putyina mwameivi onkhwino* endywei no kwoonthwe. Huku yetu metulwila-ko.”+
21 Atulipilika natyo tyokuundapa, otyo vamwe vakwata omaonga pomavoko, okuhimbikila kombimba, atee ononthungululu mbumoneka kongulohi. 22 Pononthiki opo, andyipopila ovanthu okuti: “Ovalume aveho novakwatesiko vavo vakakale mo Selusalei, ngamo valala otyinthiki atyiho. Kounthiki mavakala ovayungi vetu, komutenya avaundapa.” 23 Ame, naava tulilandula navo, novakwatesiko vange,+ novayungi ndyeenda navo, katululu-mo ovikutu. Atuho ankho tukwata ovihongati vietu kokuvoko kwokulio.