Neemiya
6 Etyi vetyipopila Sambalaa, na Tombiya,+ na Sesei omu Alambia,+ nonondyale mbetu ononkhwavo okuti ame natunga otyimato,+ tyitupu vali omamphana (namphila nehenepake-po omapito),+ 2 Sambalaa na Sesei vati vala tyiive, avatumu kwaame ondaka, avati: “Endyu kuno tulipakele-mo onthiki matuliongiya mepunda-umbo Lionthanthalahi Komulola wo Ono.”+ Vekahi nokundyondya opo vandinge omapita. 3 Andyitumu ovatumwa-ndaka vekevepopile okuti: “Ame ndyikahi motyilinga tyimwe otyinene, kamatyitavela ndyende. Ñgaa tyaviuka umwe ovilinga vitalame, ame andyitundu-po tyatiwa tukelivasa noonwe?” 4 Avanthumu vali tukwana onondaka vanthumine-ale, ame otyo ndyivepopila vala otyipuka tyike.
5 Pahe Sambalaa atumu vali omukwatesiko wae tya tano, aeta omukanda wahaikilwe muna onondaka ngo ombu vapopile-ale. 6 Momukanda oo, mwahonekelwe okuti: “Twiva movanthu, Sesei+ nae ukahi nokutyipopia okuti ove nova Sundaa mwapanga okutyitukilapo ohamba.+ Otyo mutungila otyimato otyo; ovanthu vati tyatiwa ove, ove mokala ohamba yavo. 7 Tupu tyatiwa ove waholovona ovauli opo vekekupopie mepunda-umbo aliho lyo Selusalei okuti: ‘Mo Sundaa muna ohamba!’ Ovipuka ovio maviivala kohamba. Endyu kuno tulipakele-mo.”
8 Ame andyitumu vevepopile okuti: “Atyiho uli nokupopia omatutu vala; atyiho otyo, ove vala wetyihinda.”* 9 Vahandele okututilisa owoma, otyo vati: “Kamavakala nononkhono mbokutwalako notyilinga otyo* atee tyipwa, mavetyiyeke-po.”+ Ame andyiti: ‘Huku yange, mphameke!’*+
10 Andyende keumbo lya Semaiya wahatundu meumbo omona wa Ndelaiya, Ndelaiya omona wa Meetambele. Ngwe ati: “Tulipakele-mo tukelivase kondywo ya Huku yotyotyili, atunyingila mokati kondywo, atwiki omapito ondywo ya Huku mokonda maveya okukwipaa. Maveya kounthiki.” 11 Mahi ame andyiti: “Omulume ngaame ndyenda-nkholo? Ine ndyinyingila mondywo ya Huku, mandyikala nomwenyo?+ Himanyingila-mo!” 12 Pahe andyityinoñgonoka okuti ha Huku-ko wemutuma, wafetelwe na Tombiya na Sambalaa+ opo eye okumphopila otyipuka otyo. 13 Wafetelwe opo eye okunthilisa owoma, andingisisa onkhali. Vahandele okusilisa enyina liange nokunthombesisa.
14 Andyilikwambela okuti: “Huku yange, wahalimbwe-ko etyi Tombiya+ na Sambalaa valinga, netyi tyalinga omukai omuuli Noandiya, novauli ovakwavo vanthilisa owoma ononthiki mbatyo ambuho.”
15 Otyimato tyatungwa mononthiki 52, twetyimanuhula monthiki 25 ya Elule.*
16 Etyi onondyale mbetu mbeiva otyipuka otyo, novanthu vovilongo vyo popepi avetyimono, atyivekundisa,*+ avetyinoñgonoka okuti twetyivila okutunga atumane mokonda twakwateswako na Huku yetu. 17 Mononthiki ombo,+ omanene-atyo mo Sundaa atumikisa omikanda ominyingi ku Tombiya, Tombiya otyo evikumbulula. 18 Ovanyingi mo Sundaa valaa okuti mavakala ovakwatyili kwe, mokonda o he-ivi ya Sekaniya, Sekaniya omona wa Alaa.+ Omona wae Seowanaa wanepele omona wa Mesulau, Mesulau+ omona wa Mbelekiya. 19 Tyihe-otyo vala, vamphopilile okuti ukahi nawa, otyo vekemupopila etyi ame ndyipopia. Tombiya watumine omikanda kwaame opo anthilise owoma.+