Neemiya
5 Ovalume aveliyave unene kova Sundaa vakwavo, navo novakai vavo.+ 2 Vamwe vati: “Tyati vala onthwe, ovana vetu ovakwendye, novakainthu vatyo, tuvanyingi unene. Twahanda ovilia tulie opo twahankhie nondyala.” 3 Ovakwavo vati: “Tukahi nokwava omapia etu, no omiti vionouva, nomaumbo etu, akale opinyolo opo tumone ovilia mokonda tuna ondyala.” 4 Ovakwavo vati: “Twalevala onombongo mbokufeta elilimu Kohamba, atuyeke omapia etu no omiti vionouva vikale opinyolo.+ 5 Tyati vala onthwe, ovava tulilandula navo, tuveimo like, tu vohonde ike,* ovana vetu vekahi ngovana vavo, mahi soka nkhele ovana vetu ovakwendye novahikwena vatyo,+ mavakala ovapika, vamwe povana vetu ovahikwena ovapika-le. Katupopi natyike mokonda omapia etu no omiti vionouva viakala vya vakwetu.”
6 Okwiva ovipuka ovio vamphopaila, andyinumana unene. 7 Andyihimbika okusoka nawa otyipuka otyo, andyipopila omanene-atyo, novakwatesiko vovatumini okuti: “Onwe mukahi nokulia* oluli* vana mulilandula navo.”+
Andyiihana vali ovanthu tuliongiye, vapopilwe otyipuka otyo. 8 Ame andyivepopila andyiti: “Twalinga etyi tuvila, twasoka okufeta tuyovole ova Sundaa vakwetu valandeswa kovanthu vovilongo ovikwavo. Mahi pahe onwe mulandesa vana mulilandula navo?+ Okuti navo matusukisa okuvefetela vayovoke?” Etyi nevepula ngootyo avati vala filuu, etyi mavapopi vetupu. 9 Andyivepopila vali okuti: “Etyi mukahi nokulinga katyaviukile. Kamutili-vo owoma Huku yetu+ opo ovanthu vovilongo ovikwavo, onondyale mbetu vehetulinge omukwele? 10 Ame na vana tulilandula navo, novakwatesiko vange, noonthwe tuvelevalesa onombongo novilia. Mbambavo, tuhevelevalesei vali otyo tuvelinga oluli.+ 11 Mbambavo vekondolelei hono+ omapia avo, no omiti vionouva, no omindyambi viavo, nomaumbo avo, nonombongo mwatyitaisile mwevepola-pola, novilia viavo, novinyu yavo omphe, nomulela wavo, atyiho vafeta.”
12 Ngwe avati: “Onthwe matuvekondolela ovipuka ovio, atuheveiti natyike. Matulingi umwe ngeetyi watola.” Andyiihana ovanakwa, andyiiti ovalume ovo valinge omulao wokuti mavafwisapo etyi vapopia. 13 Naame andyipukumuna otyikutu tyange tyawingwa,* andyiti: “Aveho vana vahafwisapo omulao oo, Huku yotyotyili evetaate momaumbo avo, evepolo ovipuka viavo, aveho vahafwisilepo omulao valinga, vapukumunwe, avakala tyehena natyike.” Ovanthu aveho mewaneno avati: “Amem!”* Avankhimaneka Siovaa, ngeetyi vapopia.
14 Tyihe-otyo vala, okutuka monthiki ampha otyilinga tyokutumina+ otyilongo tyo Sundaa, menima 20+ atee menima 32+ Ohamba Alitaselesi+ eli kovipundi, mokweenda kwomanima 12, tyilinge ame, tyilinge vana tulilandula navo katwalile okulia kuhiwa momutumini.+ 15 Mahi ovatumini valiko tete kwaame, vamonesile emone ovanthu mokuveita onosikulu* 40 mbopalata opo valande okulia, novinyu. Atee umwe ovanene vatyo navo vamonesa ononkhumbi ovanthu. Mahi ame ha ngootyo-ko nalinga+ mokonda ndyina owoma na Huku.+
16 Tyihe-otyo vala, ame nakalele potyilinga tyokutunga otyimato, mahi onthwe katwapolele nawike epia liae,+ ovakwatesiko vange aveho veliongiya opo vaundape. 17 Pena ova Sundaa novakwatesiko vovatumini 150 valia komesa yange, tyihavalula vana vatunda movilongo ovikwavo. 18 Ononthiki ambuho, ame ndyietelwa* ongombe onthwei, novingi epandu vikahi nawa, noviila, tyina pamalambe ononthiki 10 tukala nonovinyu mbatyo ambuho ononyingi. Mokonda ndyina-le ovipuka ovio aviho, hiiti vali okulia kwatokala omutumini, mokonda ovanthu valemenwa-le novilinga. 19 Nthyinangele-vo, Huku yange, yamba ononkhono* ambuho nalingila ovanthu ava.+