Isaiya
18 Otyilongo tyokuvielelwa nounyama wokunthanana,
Mofika yonondongi mbo Etiopia, ngongo yatyo!+
2 Utuma ovatumwa-ndaka vae, vakwate melunga,
Avayauka no nombaluku mbonole, otyo ati:
“Endei onwe vatumwa-ndaka vokuhateka unene,
Endei kovanthu ovalaale vokuna olutu lwasesa,*
Vokutilwa owoma kononthele ambuho,+
Ovanthu vokwapama, vokutilisa vakwavo,*
Vokwateyelwa otyilongo tyavo nonondongi.”
3 Onwe amuho vokukala motyilongo, noonwe vokukala kombanda yohi,
Etyi mweete, matyikakala ngenyingilikilo liapakwa* kombanda yonomphunda,
Mamukeiva etyi tyiviela ngonkhwino ihika.
4 Mokonda Siovaa wamphopila okuti:
“Mandyiti vala filuu, andyitalela* pomphangu yange mwene,
Ngomutenya watokota wotyimimi tyekumbi,
Ngekaka lieyombo poutokotwe wo pomuvo wokuteya.
5 Tyina omuvo wokuteya wehenehike-po,
Tyina ondyovo yamalambe, onouva mbamahimbika okupia,
Onomphapule mambukatetwa-ko notisola yokulombolola omiti,
Onongola mbatyo mambukatipulwa, ambupolwa-ko.
6 Aviho ovio, mavikasilwa omalukoi omonomphunda,
Novinyama vyo kombanda yohi,
Omaila maakakala kombanda yavio okwenye akuho,
Ovinyama aviho kombanda yohi, mavikakala kombanda yavio omuvo auho wokuteya.