Isaiya
62 Mokonda yo Siyau, ame himakati vala filuu,+
Mokonda yo Selusalei, himakakala vala ngootyo tyihapopi natyike,
Atee ouviuki walio uliaima ngotyimimi tyatwa nawa,+
Eyovo liayo alimimikila ngotyihihi.+
2 “Ove mukai, ovanthu vovilongo mavakamona ouviuki wove,+
Onohamba ambuho mambukamona omunkhima wove.+
Ove mokalukwa enyina epe,+
Enyina mokalukwa nomulungu wa Siovaa.
3 Ove mokakala otyuuya* otyiwa peke lya Siovaa,
Mokakala ombuya yohamba peke lya Huku yove.
Mahi, ove mokatiwa Ehambu Liange Lili Mwe,+
Otyilongo tyove atyikatiwa Omukai Wanepwa.
Tyeetyi Siovaa mekekuhambukilwa,
Otyilongo tyove, matyikakala ngomukai wanepwa.
5 Ngeetyi omukwendye anepa omuhikwena uhei omulume,
Ovana vove ovakwendye, mavekekunepa.
Ngeetyi omukwendye unepa ahambukilwa omufikwena anepa,
Tupu Huku yove mekekuhambukilwa.+
6 Ove Selusalei, kovimato viove napaka-ko ovalavi.
Kavapondola okumuta otyinthiki atyiho, notyitenya atyiho.
Onwe vokupopia konthele ya Siovaa,
Muhapululukwei,
7 Muheveyekei vapululukwe, atee apindula-po o Selusalei, eipameka,
Atee eikalesa nomunkhima kombanda yeheke.”+
8 Siovaa waana nenkhanya liae liokulio, nokuvoko kwae kwapama, ati:
“Ovilia viove himekeviavela vali onondyale mbove, avikakala okulia kwavo,
Nii ononthunda-vilongo kamavakanwa-anwa vali ovinyu yove omphe yokwekupwilisa.+
9 Mahi vana vateya ovilia, mavekevilia, avankhimaneka Siovaa.
Vana vanyanga onouva, mavakanwina ovinyu omphe momapata ange akola.”+
10 Lambei, lambelei ponombundi!
Pendyelei ovanthu ondyila.+
Tungei, tungei etapalo.
Polei-mo omamanya.+
Yelulei otyipandyi ovanthu vataleleko.*+
11 Tala! Siovaa wapopila onohika oku kwaoyela ohi okuti:
“Popilei omona wa Siyau omukainthu, uti:
‘Tala! Eyovo liove likahi nokuya.+
Tala! Ondyambi afeta una-yo,
Ondyambi afeta ili kotyipala tyae.’”+