Selemiya
8 “Pononthiki opo,” o Siovaa wetyipopia, “omankhipa onohamba mbo Sundaa, nomankhipa ovanene vatyo, nomankhipa ovanakwa, nomankhipa ovauli, nomankhipa o vokukala mo Selusalei, momaendo maakapolwa-mo. 2 Maakahandaulilwa mombwelo yekumbi, mombwelo yohanyi, mombwelo yovita aviho vyo meulu vapanda, vafenda, valandula, vaovola, oku velipetamena.+ Omankhipa oo kaakaongiywa, kaakafifilwa. Maakalinga ombumbi kombanda yeheke.”+
3 “Ava vokwahupa-po pombunga ei ondingavivi, mavapeleya ononkhia omwenyo aveulovola monohika ambuho mandyivetyandyanesa,” o Siovaa womambamba ovita wetyipopia.
4 “Vepopila uti: ‘Etyi otyo tyapopia Siovaa wati:
“Okuti mavatoko umwe avahapinduka-po vali?
Ine umwe ukondoka, okuti mukwavo nae kamakondoka?
5 Oityi ovanthu ava vo mo Selusalei vapangelela umwe vala okunthyindamena?
Ngwe vakakatela mounkhembi;
Vaanya kavahande okukondoka.+
6 Ame natala nawa, andyivetehelela, mahi omupopio wavo kawaviukile.
Nawike ulivela ayeke-po ovivi alinga, nii okulipula-vo vala okuti: ‘Etyi nalinga pahe otyityi?’+
Aveho otyo vala vakalela tyokukondoka mondyila yovaunyingi, uti vala ononkhambe mbuliyumba movilwa.
7 Soka nonkhumbi-nkhumbi umwe meulu, omivo viayo* ivii;
Ekuti, notyimphia-pia, nekulikwata,* kavilimbwa omuvo vikondoka.*
Mahi ovanthu vange kavakungunyika-le omphela ya Siovaa.”’+
8 ‘Pahe onwe oityi-vo tyimupa okupopia okuti: “Onthwe tuvanongo, tuna otyitumino tya* Siovaa?”
Ngwe tyotyili tyatyo, olapi yotyivela+ younkhembi* yovahoneki* vovitumino ihoneka vala omatutu.
9 Ovanongo vakundiswa.+
Vatila owoma, mavakwatwa.
Tala! Vaanya ondaka ya Siovaa;
Ounongo wavo ulipei?
10 Otyo ame mandyipakulila ovakai vavo ku vakwavo,
Omapia avo, mandyikeepa ovanthu ovakwavo.+
Tyihimbikila umwe kovana atee kovakulu vatyo, aveho vamonena moumphulu;+
Tyihimbikila komuuli atee komunakwa, aveho vavaka.+
11 Ovipute viomona omukainthu wovanthu vange vevihakula kombanda otyo vati:
“Ombembwa! Ombembwa!”
Ngwe petupu mbembwa.+
12 Okuti ovipuka vitoyesa valinga vievekundisa-vo?
Ovo kavakundu-ae na kapii vala!
Nii vala tyitiwa okukunda kavetyi-ale!+
Otyo mavakatokelela pu ava vatoka-le.
Otyo mavekelipundukila+ tyina ame nameveetela etyi vehiwa okulingwa,’ o Siovaa wetyipopia.
13 ‘Tyina ame nameveongiya, mandyivemane-ko,’ o Siovaa wetyipopia.
‘Komuti wonouva kamakuhupu onouva, nii omakuyu komukuyu, omafo maakauvuka.
Mavakapeseka kovipuka nevepele.’”
14 “Oityi twapumphamena pano?
Tuliongiyei, atunyingila momapunda-umbo+ okwapama ngamo tukankhila,
Mokonda Siovaa Huku yetu metunyimi-ko.
Siovaa ukahi nokutwavela omaande akola ovanthu, tunwe+
Mokonda twalinga onkhali twemunumanesa.
15 Kukevelelwa ombembwa, mahi katwamwene natyike otyiwa;
Kukevelelwa ononthiki mbokuveluka, mahi tuna vala owoma!+
16 Ko Ndaa kweivalela ononkhambe mbwoononona.
Tyina ononkhambe ononthwei mbukwiilila
Ohi aiho iteketa.
Onondyale mbunyingila, mbuhanya-ko otyilongo etyi atyiho, novipuka aviho vili-mo,
Nepunda-umbo no vokukala-mo.”
17 “Ndyili nokumutuma ononyoka,
Ononyoka mboulio mbuhembetambu,
Mambumunumata,” o Siovaa wetyipopia.
18 Olunuma lwange kaluhakulwa;
Omutima wange wavela.
19 Kotyilongo tyo kokule-kule kwiivalela onkhu
Komona omukainthu wovanthu vange, wati:
“Okuti Siovaa keli ko Siyau?
Ohamba yatyo ha-ko ili?”
“Oityi vanumanesila novilolo viavo viokwanthilwa,
Ono huku mbavo mbononthunda-vilongo mbahasilivila?”
20 “Tyokuteya tyalamba-le, outokotwe wapwa-le,
Mahi nkhele katuneyovolwe!”
21 Ame viendyihama ovipute viomona omukainthu wovanthu vange;+
Neihamenwa unene.
Natila unene owoma.
22 Mutupu omulela wombasamu* mo Sileyande?+
Oityi omona omukainthu wovanthu vange ahavelukila?+