Selemiya
13 Etyi otyo Siovaa amphopila wati: “Enda, kalande epoha liomulinya, olivale, mahi wehelipake momaande.” 2 Andyilande epoha ngeetyi Siovaa amphopilile, andyilivale. 3 Ondaka ya Siovaa aindyendela vali aiti: 4 “Kwata epoha eli walanda, olio wavala, enda kondongi Eufalate, oliholeka mekomo lionkhanda.” 5 Etyi natunda opo, andyeende, andyikeliholeka ko Eufalate ngeetyi Siovaa anthuma.
6 Apakala umwe ononthiki, pahe Siovaa amphopila ati: “Enda ko Eufalate, kapole-ko epoha lina natile keliholeke.” 7 Andyeende ko Eufalate, andyilififulula-po andyilipolo apa neliholekele, tyina ndyikati ñgana, epoha liavola; kalisilivila umwe vali.
8 Pahe ondaka ya Siovaa aindyendela vali aiti: 9 “Etyi otyo Siovaa apopia wati: ‘Ongootyo mandyimane-ko omakamo a Sundaa, omakamo o Selusalei.+ 10 Ovanthu ava onondingavivi, vehetavela onondaka mbange,+ vena onkhango, valandula omitima viavo mwene,+ valandula ovika-huku, ngavio valingila otyo velipetamena kuvio, mavakakala ngepoha eli liahasilivila vali.’ 11 ‘Mokonda, ngeetyi epoha likakatela omunthu monomanekelo, otyo nalinga aveho veumbo lya Isilayeli, no veumbo lya Sundaa vakakatele mwaame,’ o Siovaa wetyipopia, ‘opo kwaame valinge otyilongo,+ valinge omunkhima wange,+ ehiliviko liange, valinge otyipuka otyiwa, mahi ngwe kavetavelele.’+
12 “Ove vepopila umwe ondaka ei uti: ‘Siovaa Huku yo Isilayeli wati: “Omalufo aeho omanene ena okuyuliswa owalende.’” Ngwe mavekupulu mavati: ‘Wati katutyii okuti omalufo aeho omanene ena okuyuliswa owalende?’ 13 Ove vepopila uti: ‘Siovaa wati: “Mandyikoleswa* unene ovanthu votyilongo etyi aveho,+ nonohamba mbupumphama kotyipundi tya Ndaviti tyounene, novanakwa, novauli, novanthu aveho vakala mo Selusalei. 14 Mandyikevetyatyaula, okuvepuma-puma kumwe, novana novo he yatyo,” o Siovaa wetyipopia.+ “Himeveevela, kamatyindyihama, nii himeveetehila-mo okankhenda; natyike matyinthyilika anehevehanye-ko.”’+
15 Tyiivei, tehelelei nawa.
Mwehelipindaulei-po mokonda o Siovaa wapopia.
16 Hilivikei Siovaa Huku yenyi,
Tyina nkhele eheneete enthiki,
Tyina nkhele onomphai mbenyi mbehenelipunduke monomphunda kokawiwii.
17 Ine onwe kamutehelela,
Ame mandyililila* momutima mokonda onwe mwelipakako.
Mandyikatokesa ononkhuka ononyingi;* momaiho ange mamukamoma ononkhuka,+
Mokonda otyuunda tya Siovaa+ tyatwalwa koukonde.
18 Popila ohamba, na ina-hamba uti:+ ‘Pumphama pohi,
Mokonda otyuuya tyove otyiwa, komutwe matyitoko-ko.’
19 Omapunda-umbo o kombwelo aikwa,* petupu ou utyivila okweeikula.
Ova Sundaa aveho vatwalwa koukonde; vatyindwa-po aveho, vapwa-mo.+
20 Tala peulu, tala ovo vena nokutunda kombanda.+
Otyuunda wapelwe tyili-pi, onongi mbove onongwa mbuli-pi?+
21 Oityi molingi tyina ononkhumbi mbove mbamehiki-po,
Ombu mambutundu ku ava watekula nawa, omapanga uhole?+
Okuti ove kumakaihamenwa unene ngomukai ukutula?+
22 Tyina wamelipopila momutima wove oti: ‘Otyipuka etyi ndyimona otyityi?’+
Noñgonoka okuti omokonda yovivi walinga otyo wapolelwa omatati ove,+
Ovikomeko* viove otyo vialingilwa onya.
23 Okuti omu Kuse* utyivila okupilulula otyivala tyae, onkhapi ityivila okupilulula omavala ayo?+
Opo noonwe, mutyivila okulinga oviwa,
Namphila mwalongeswa ovivi.
24 Otyo mandyiveyandyanesila ngeyungu litwalwa nomphepo moluhandya.+
25 Tyove otyetyi, etyi nekutepulila-ko,” o Siovaa wetyipopia,
26 Otyo mandyiyelula peulu omatati ove, aekuhiki motyipala,
Olukundo lwove alukala poluhandya,+
27 Evi walingaile vionombalehi,+ nokukulumba kwove ngonkhambe ihanda okunamatwa,
Noukunga wove wasila.*
Kovipunda no momapia,
Namonena-ko onontheto mbove mbutoyesa.+
Eloo haa, ove Selusalei!
Atee-pi motwalako tyasila?”+