Isekiyele
7 Ondaka ya Siovaa aindyendela vali aiti: 2 “Mona womulume, etyi, o Tatekulu Ohamba Onene Siovaa wetyitola, upopila otyilongo tyo Isilayeli, wati: ‘Mbehulila! Mbehulila ononthele ononkhwana mbotyilongo, tyeya-po. 3 Pahe onwe apa muhula opapa. Mandyimuuyulila onyengo yange, mandyimukwatesa momphela iyemba konondyila mbenyi, andyimupulu ovipuka vitoyesa mulinga. 4 Eiho liange kamalimulingi onkhenda, nii himemulingi okankhenda,+ mandyimweetela etyi tyata monondyila mbenyi, amutyepe-ko kombanda yovipuka vitoyesa mulinga.+ Onwe mamutyimono umwe okuti ame, ame Siovaa.’+
5 “Wetyitola o Tatekulu Ohamba Onene Siovaa, wati: ‘Tala! Kuli nokuya elamba,+ elamba limwe liehenemonwe. 6 Onthyulilo ili nokuya. Onthyulilo maiya. Onwe mayeendela.* Tala! Oyoo iya. 7 Onthiki yenyi yeya-po, onwe vokukala motyilongo. Omuvo watyo uli nokuya-po, onthiki ili popepi.+ Kwiivalela okuviela konomphunda, mahi ha ndolo-ko yehambu.
8 “‘Apa katutu, mandyimunengulila olunuma lwange,+ andyimuuyulila onyengo yange aiho,+ mandyimukwatesa momphela iyemba konondyila mbenyi, andyimupulu ovipuka vitoyesa mulinga. 9 Eiho liange kamalikemulinga onkhenda,+ nii himemulingi okankhenda. Mandyimweetela etyi tyata monondyila mbenyi, amutyepe-ko kombanda yovipuka vitoyesa mulinga. Onwe mamuketyimona okuti ame Siovaa ndyili nokumuvanga.+
10 “‘Tala, onthiki oyoo iya! Tala, oyoo iya!+ Tyenyi pahe tyeya-po; omphangoti yatumba ononthemo, omakamo apapula. 11 Ovivi viekula, vialinga oluhonge lweevi viapenga.+ Ovanthu ovo kavakahupa, nii olumono lwavo, nii ovanthu vavo ovanyingi-nyingi, nii ounene wavo. 12 Omuvo oyoo uya, onthiki maiya-po. Ou ulanda ahahambukwe, ou ulandesa eheliyave, mokonda kuna onyengo yaendela ovanthu ovanyingi-nyingi.*+ 13 Mokonda, omulandesi kamakondoka vali apa alandesile, nga evelwa umwe ahaipawa, etyi tyamoneka movililenya, tyaendela ovanthu aveho. Nawike makondoka, mokonda yononkhali mbavo,* nawike makahupisa omwenyo wae.
14 “‘Vahika onkhwino,+ aveho vamaneka umwe, mahi nawike ukatuka wenda movilwa, mokonda onyengo yange yaendela ovanthu aveho.+ 15 Kondye kuna omutunga,+ omu mokati muna omukihi nondyala. Ava veli mohika mavakankhia komutunga, vokuli mokati, avakankhia kondyala, avakankhia komukihi.+ 16 Vokwahupa, vetyivila okuhomboka, mavakaya no monomphunda, mavakalinga lwonopomba mbo momalola, munthu na munthu makakema kombanda yononkhali mbae.+ 17 Omavoko avo aeho maakayendyelela, ponongolo mbavo ambuho mapakatoka omaande.*+ 18 Vavala monosaku,+ veli nokuteketa otyinene.* Aveho mavakakundiswa, omitwe viavo mavikakala nomapela.*+
19 “‘Opalata yavo mavekeiyumbahi momatapalo, oolu yavo mavekeitoya. Opalata yavo kaikeveyovola, nii oolu yavo monthiki yonyengo+ ya Siovaa. Kamavekekuta,* nii kamavekeyulisa ovihapu viavo, mokonda opalata yavo noolu yavo pahe yalinga yokuvetokesisa, yevelingisa onkhali. 20 Velimphandela oviwa viavo viomatepo, ovio vatunga navio* ovilolo viavo vitoyesa, ovika-huku viavo ovivi.+ Otyo, otyo opalata yavo noolu yavo mandyiityitulila ovipuka vitoyesa aveitoyo. 21 Mandyikeipakula* pomavoko ononthunda-vilongo, aveipundu. Maikapundwa, aikakala pomavoko ovakalavi vakala kombanda yohi, avekeisilisa.
22 “‘Ame otyipala tyange mandyiketyipola-ko kuvo,+ ngwe mavakasilisa omphangu yange yokwaholama,* otyimphulu matyikanyingila-mo, atyiisilisa.+
23 “‘Nthila omalienge,*+ mokonda otyilongo tyeyula onomphela+ mbohonde, epunda-umbo lieyula ovivi.+ 24 Mandyikaeta omuhoko umwe omukalavi vali,+ aupingi momaumbo avo,+ andyikamana-ko omakamo, no vokwakola kwatyo, ombu onomphangu mbavo mbukola, mambukasiliswa.+ 25 Tyina onongembia mbameya, mavakaovola ombembwa, mahi vetupu apa mavekeivasa.+ 26 Ovihuna mavikelilundikinya vala, mavakati vala katehele oku, katehele oku, ovanthu mavakaovola omamonekelo komuuli,+ mahi otyitumino* movanakwa tyikavomba-mo, onondunge mbokulondola* movakulu+ kambukakala-mo. 27 Ohamba maikalula,+ ou omunene watyo okuhulilwa tyikalinga omuvalo wae,* omavoko ovanthu votyilongo maakateketa tyowoma. Mandyikevelinga etyi tyata monondyila mbavo, andyikeveongela omphela ngeetyi ngwe valingaile vakwavo. Mavakankhola umwe okuti ame, ame Siovaa.’”+