Isekiyele
26 Menima 11, monthiki yo tete yohanyi, ondaka ya Siovaa aindyendela aiti: 2 “Mona womulume, Tilu wakwela o Selusalei+ etyi ati: ‘Wolo! Ombundi yovanthu yateywa-po,+ pahe atyiho matyilingi tyange, mandyilingi omuhona, mokonda pahe yahanywa-po’; 3 otyo Tatekulu Ohamba Onene Siovaa atila: ‘Ove Tilu, ame nekunumanena, mandyikukatulila ovanthu ovanyingi vovilongo, mandyilingi lwelunga likatula omanyonda alio. 4 Mavakahanya-po ovimato vyo Tilu, mavakateya-po omatala atyo,+ mandyikakombolola-mo eheke liatyo, maikalinga onkhanda yasesa. 5 Maikalinga ohika yokunyaneka omawanda okufwa mokati kelunga.’+
“‘Ame, ame mwene netyipopia,’ wetyitola o Tatekulu Ohamba Onene Siovaa, ‘maikapundwa novanthu vovilongo. 6 Ovilongo* viatyo viae mavikankhia komutunga, ovanthu avakankhola okuti ame, ame Siovaa.’
7 “Etyi otyo tyapopia Tatekulu Ohamba Onene Siovaa, wati: ‘Ame uno ndyili nokweeta ohamba Nambukondonosole* ohamba yo Mbambilonia, ilwise o Tilu itunda kombanda;+ oe ohamba yonohamba,+ uya nononkhambe,+ nomatemba ovilwa,+ no vokweendela kononkhambe, novita ovinyingi-nyingi.* 8 Makahanya-ko omapunda-umbo otyilongo nomutunga, mekekutungila ongandyo yotyimato, nondondelo yokulwila, nondyakulilo imwe onene. 9 Makateya-po ovimato viove nepundi* liokuhanya ovimato, akahanya-po omatala ove nononkhava.* 10 Ononkhambe mbae mambukalinga ononyingi okepwila mombuma, omuhindo wononkhambe, no womalola, no womatemba, maukahiñginya ovimato viove tyina vanyingilila ponombundi mbove, vakalinga ngovalume vaululila mepunda-umbo liovimato viateka-teka. 11 Omakondyo ononkhambe mbae maakaliata-liata momatapalo ove aeho;+ ovanthu vove mekeveipaa nomutunga, onomphandyi mbove mbokwapama, mambukatokela pohi. 12 Mavakatyinda-po olumono lwove, mavakapunda ovitele yoniñgoso yove;+ mavakatokesa ovimato viove, mavakahanya-po onondywo mbove onongwa; pahe avakayumba momeva omamanya ove, nomavai ove, neheke liove.’
13 “‘Mandyikamana-ko oviimbo viove, kamamukeivalela vali ovihumba* vihikwa.+ 14 Mandyikekulinga onkhanda yasesa, ove okalinga ohika yokunyanekwa omawanda okufwa.+ Ove kumakapindaulwa-po vali, mokonda ame Siovaa, ame mwene netyipopia,’ wetyipopia o Tatekulu Ohamba Onene Siovaa.
15 “Tatekulu Ohamba Onene Siovaa wapopila o Tilu wati: ‘Tyina ove wamatoko, na tyina vokwavangwa veli opo* nokukema, mokati kove amwiipawa ovanthu ovanyingi, atyiivala kovilongo viokuli pokati kelunga, okuti kavipipililwa?+ 16 Ovatumini aveho vomelunga,* mavakatoka kovipundi viavo viokutumina, mavakalula-mo ovikutu viavo,* nomivalo viavo viokwatungilwa omahiwe, avapipililwa.* Mavakapumphama pohi, otyo vateketa vatala kwoove, mavakukuta omate.+ 17 Mavekekwimbila ongengeya*+ mavati:
“Waomba-po,+ ove ukalwa novalume vo melunga, punda-umbo liokuhilivikwa;
Noove naava vakalelele mwoove,* mwali vononkhono melunga,+
Mwahahanesile owoma movanthu aveho vakala kombanda yohi!
18 Ovilongo vyo pokati kelunga, mavikateketa, apa ove utoka,
Ovilongo vyo pokati kelunga, mavikahahavala tyina ove wamaombo-ko.”’+
19 “Etyi, otyo tyapopia Tatekulu Ohamba Onene Siovaa, wati: ‘Tyina ame namekuhanye, andyikulingi ngomapunda-umbo ahakalwa vali, tyina namekunyingiya onthwitwi momeva, okasambwilikita momeva ononkhono,+ 20 mandyityindi umwe noove naava veli nokwenda no metoto,* andyimutwala omu muli ovanthu vo kohale; mandyikekutwala mombwelo-mbwelo ngako ukakala, mankhulingi lwonohika mbo kohale mbahanyauka, mankhuhulisa ko vokwenda no metoto,+ opo mwoove mwahakale-kale vali ovanthu. Pahe mandyihilivika* otyilongo tyo vokuna omwenyo.
21 “‘Mandyikekwetela ovihuna ovinene, ove kumakakala-kala-ko vali.+ Mavekekwovola, mahi kumakavasiwa vali,’ o Tatekulu Ohamba Onene Siovaa wetyipopia.”