Isekiyele
29 Menima 10, mohanyi 10, monthiki 12, ondaka ya Siovaa aindyendela aiti: 2 “Mona womulume, pilukihila otyipala ku Falaoo ohamba yo Isitu, opopi etyi makalingwa, neetyi matyilingwa o Isitu aiho.+ 3 Popia onondaka ombu, uti: ‘Etyi otyo tyapopia Tatekulu Ohamba Onene Siovaa, wati:
“Ame nekunumanena Falaoo hamba yo Isitu.+
Nyama enene liomelunga lilangi pokati komeva o Nilu*+ yalio,
Liokuti: ‘Ondongi Nilu mwene oyange.
Ame neilinga o yange.’+
4 Mahi mandyikuhake nonondyolo momulungu, ombisi ili mo Nilu yove, mandyiikakanyesila momakakava ove.
Mandyikupolo mo Nilu yove, noove nombisi aiho yomo Nilu yakakanyena momakakava ove.
5 Mandyikekusa moluhandya, noove nombisi aiho yomo Nilu yove.
Mokatokela motyipembe, okahiwa pohi, ohapolwa-po.+
Mandyikekupakula kovinyama viomohika no koviila vyo meulu,+ okalinga okulia kwavio.
6 Opo pahe, aveho vakala mo Isitu mavakankhola umwe okuti ame, ame Siovaa.
Mokonda veumbo lya Isilayeli vokweliyeka muvo, veliyeka vala motyingenge.*+
7 Etyi vakakatela mokuvoko kwove, ove oteke,
Oveteye epepe.
8 “‘Etyi otyo tyapopia Tatekulu Ohamba Onene Siovaa wati: “Ame ndyikahi nokukukatulila omutunga,+ mwoove mandyikanyima-mo ovanthu novinyama. 9 Otyilongo tyo Isitu matyikahanyauka atyikalinga ekongola;+ mavakankhola umwe okuti ame, ame Siovaa, mokonda ove* wati: ‘Ondongi Nilu mwene oyange; ame mwene neilinga.’+ 10 Ame nekunumanena, noove no Nilu yove, mandyihanye otyilongo tyo Isitu andyityikukutisa, atyilingi oluhandya ekongola,+ okuhimbikila mo Mingindole+ atee ko Siyene,+ no konondimbu mbatyo no Etiopia. 11 Kamukakwata omunthu nii otyinyama,+ mamukakala omanima 40 tyehena munthu. 12 Otyilongo tyo Isitu mandyiketyityitula ekongola atyivilipo kovilongo ovikwavo, omapunda-umbo atyo maakalinga vali unene ekongola komapunda-umbo omakwavo momanima 40;+ ova Isitu mandyikevetyandyanesa movanthu vovilongo, andyikevetwala-twala movilongo.”+
13 “‘Etyi otyo tyapopia Tatekulu Ohamba Onene Siovaa, wati: “Tyina pamakala omanima 40, mandyikakongolola ova Isitu movanthu nevetwaile-twaile namo.+ 14 Mandyikakondola ova Isitu ononkhwatwa motyilongo tyo Patolo,+ otyilongo vatukile, oko, okutumina kwavo kutupu etyi makukalinga. 15 O Isitu maikalinga onthutu vali komauhamba omakwavo, kamaikatumina vali ovanthu vovilongo ovikwavo,+ mandyikevetepulula unene, opo vehetyivile okutumina ovilongo ovikwavo.+ 16 Eumbo lya Isilayeli+ kamalikayumba vali onthumbi mo Isitu, mahi ova Isilayeli mavakahinangailila-ko vala onkhali yavo etyi vakaululile kova Isitu veye vevepopile. Mavakankhola umwe okuti ame, ame Tatekulu Ohamba Onene Siovaa.”’”
17 Menima 27, mohanyi yo tete, monthiki yo tete, ondaka ya Siovaa aindyendela aiti: 18 “Mona womulume, Ohamba yo Mbambilonia Nambukondonosole,*+ watuma ovita viae valinge otyilinga tyimwe otyinene tyokulwisa o Tilu.+ Omitwe aviho vialinga omapela, omapepe aeho atomoka. Mahi Nambukondonosole novita viae, kavatambulile ondyambi motyilinga otyinene valinga mo Tilu.
19 “Etyi otyo tyapopia Tatekulu Ohamba Onene Siovaa wati: ‘Otyilongo tyo Isitu ndyili nokutyipa Nambukondonosole* Ohamba yo Mbambilonia,+ ngwe makatyinda-mo olumono lulimo, makapunda-mo ovipuka ovinyingi; ovipuka ovio, ovio vikalinga ondyambi yovita viae.’
20 “‘Ondyambi yae, mandyimupe otyilongo tyo Isitu motyilinga otyinene alinga, okwiilwisa,* mokonda ame vaundapela,’+ o Tatekulu Ohamba Onene Siovaa wetyipopia.
21 “Monthiki oyo, mandyikatumbisa ombinga yeumbo lya Isilayeli,*+ andyikekupa ombundi upopile pokati kavo; ngwe mavakankhola umwe okuti ame, ame Siovaa.”