Isekiyele
43 Anthwala vali kombundi yokwahula koutundilo.+ 2 Andyimono-ko onohanya mbomunkhima wa Huku ya Isilayeli, mbutunda koutundilo,+ ondaka yae yuuna uti omaande+ apupa. Ohi aiho aipwila monohanya mbomunkhima wae.+ 3 Etyi namona, tyilinga ngeetyi namwene movililenya etyi neile* okuhanya epunda-umbo, tyelifwa neetyi namwene ponthele pondongi yo Kembale;+ ame andyilipupika pohi.
4 Onohanya mbomunkhima wa Siovaa ambukwate kombundi yokwahula koutundilo+ ambunyingila mondywo ya Huku. 5 Omphepo ainkhatula-po, ainthwala mepata lyo mokati, tyina ndyikati ñgana, mondywo ya Huku mweyula onohanya mbomunkhima wa Siovaa.+ 6 Andyiivi omulume umwe mondywo ya Huku upopia naame, omulume oo eya atalama ponthele yange.+ 7 Amphopila ati:
“Mona womulume, apa opo pakala otyipundi tyounene,+ otyiliatelo tyonomphai mbange,+ omo mandyikakala-kala pokati kova Isilayeli.+ Veumbo lya Isilayeli kavakasilaisa vali enyina liange likola,+ navo nonohamba mbavo, kavekelisilisa vali novika-huku viavo, novivimbi vyo nohamba mbavo mbankhia. 8 Vapaka epunduka liavo ponthele pepunduka liange, novipamba vionombundi mbavo ponthele po viange,+ pokati ketu navo apatyiki vala otyimato, vasilisile enyina liange likola movipuka vitoyesa valinga, ame monyengo yange,+ andyivenyimi-ko. 9 Pahe, vapole ponthele yange ovika-huku viavo, novivimbi vyo nohamba mbavo, opo ame ndyikale-kale pokati kavo apeho.+
10 “Ove mona womulume, kungunyikisa eumbo lya Isilayeli+ ondywo ya Huku, opo vakunde mokonda yononkhali valinga-linga,+ vena okwiinoñgonoka omu yanthindilwa.* 11 Ine ovipuka aviho valinga vivekundisa, ove vepopila vakungunyike omu ondywo ya Huku yanthindilwa, omu yatungilwa, nonombundi mbokuyingila no mbokulupuka.+ Uti ovelekesa oñgeni yatungwa novitumino viatyo, ovelekesa oñgeni yatungwa, novitumino viatyo, ovipuka ovio aviho vihonekela umwe momaiho avo, opo vatalele popepi omu yatungilwa, avaendela movitumino viatyo.+ 12 Etyi otyo otyitumino tyondywo ya Huku. Ohika aiho yeliseta nokatanga-tanga komphunda, ikola unene.+ Tala! Otyo otyo otyitumino tyondywo ya Huku.
13 “Omutala wovilikutila waelekwa monokovandu+ (okovandu ike ondaande vali mounthanda wenkhanya).* Ehina liatyo oku upumphi, lina okovandu ike mokwaya no peulu, ike mounthanda. Onondungu mbatyo, mbulifwe mounthanda wenkhanya.* Olio ehina liomutala wovilikutila. 14 Okuhimbikila pehina atee keulu liotyimato otyitutu tyatyo, pena onokovandu onombali, mounthanda pena okovandu ike. Okuhimbikila potyimato otyitutu atee keulu liotyimato otyinene, pena onokovandu ononkhwana, mounthanda pena okovandu ike. 15 Eiko liomutala wovilikutila, lina onokovandu onokhwana mokwaya no peulu, keiko oko kuna onombinga ononkhwana mbatala peulu.+ 16 Eiko liomutala wovilikutila, lina onokovandu 12 moule, 12 mounthanda. Moule no mounthanda, lilifwe vala.+ 17 Omavindi atyo ekwana, ena* onokovandu 14 moule, 14 mounthanda. Komwoyo watyo kuna otyinthimbu tyokovandu, ehina liatyo lina okovandu ike na nthele na nthele.
“Ondondelo yatyo yahula koutundilo.”
18 Pahe amphopila ati: “Mona womulume, etyi otyo tyapopia Tatekulu Ohamba Onene Siovaa, wati: ‘Etyi otyo tyina okulandulwa pokutunga omutala wovilikutila, kulingilwe oviawa viokuyokwa, akunyanywa ohonde.’+
19 “‘Ove una okupakula ondume-tane ilinge otyilikutila tyonkhali+ kovanakwa vomuhoko wa Levii, ava vatuka mu Sandoke,+ vokufwena pwaame opo vandingile,’ o Tatekulu Ohamba Onene Siovaa wetyipopia. 20 ‘Pola katutu pohonde yatyo, oipake konombinga ononkhwana mbomutala wovilikutila, no komavindi ekwana ehina liatyo* oku upumphi, no komwoyo watyo auho, opo uukohe konkhali, upate ononkhali mbao.+ 21 Pahe opolo ondume-tane yotyilikutila tyonkhali, opo ikayokelwe apa mwene panakwa mondywo ya Huku, kondye yomphangu ikola.+ 22 Monthiki ya vali, oave otyinkhombo otyitwei tyakongoka nawa tyotyilikutila tyonkhali; ngwe mavakoho omutala wovilikutila konkhali, ngeetyi wasukulwa konkhali nondume-tane.’
23 “‘Tyina wamamane okuukoha konkhali, opolo motyunda ondume-tane yakongoka nawa, nongi onthwei yakongoka nawa, ombupakula. 24 Ove una okumbupakula ku Siovaa, ovanakwa vena okumbupaka omongwa,+ mbulinge ovilikutila viayokelwa Siovaa. 25 Mononthiki ya pandu-vali, moave otyilikutila tyononkhali,+ monthiki otyinkhombo tyike otyitwei, nondume-tane ike yo motyunda, nongi ike onthwei; ove mokapakula ovipako viehena otyinthembia. 26 Ovipako ovio, mavipate ononkhali mbomutala wovilikutila mononthiki epandu-vali, nokuukoha, nokuukangula. 27 Tyina ononthiki ombo mbamapu, okuhimbikila monthiki ya tyinana,+ ovanakwa mavaave ovilikutila vienyi* viokuyokwa komutala wovilikutila, novilikutila viombembwa, ame mandyikemuhambukilwa’+ wetyipopia o Tatekulu Ohamba Onene Siovaa.”