Isekiyele

48 “Aa omanyina omihoko, okupolelela konondimbu+ mbo kombanda: Ohika ya Ndaa, ipolesa-po etapalo lyo ko Heteloo atee ko Lembo-Hamate,*+ ko Hasale-Enao, okupolesa-po onondimbu mbo Ndamasiku aiviuku kombanda, konthele ko Hamate; + ihimbikila konondimbu mbo koutundilo aikehika ko mbo koutakelo. 2 Ohika ya Asele yateta onondimbu+ noya Ndaa. Yahimbikila konondimbu mbo koutundilo atee ko mbo koutakelo. 3 Ohika ya Nafitalii yateta onondimbu+ noya Asele. Yahimbikila konondimbu mbo koutundilo atee ko mbo koutakelo. 4 Ohika ya Manasesi yateta onondimbu+ noya Nafitalii. Yahimbikila konondimbu mbo koutundilo atee ko mbo koutakelo. 5 Ohika ya Efalaii yateta onondimbu noya Manasesi.+ Yahimbikila konondimbu mbo koutundilo atee ko mbo koutakelo. 6 Ohika ya Lumbe yateta onondimbu noya Efalaii.+ Yahimbikila konondimbu mbo koutundilo atee ko mbo koutakelo. 7 Ohika ya Sundaa yateta onondimbu noya Lumbe.+ Yahimbikila konondimbu mbo koutundilo atee ko mbo koutakelo. 8 Onondimbu mbohika ya Sundaa, mbuhimbikila po mbo koutundilo atee konondimbu mbo koutakelo, hupisei-po ohika ilinga yotyiawa, ina onokovandu* 25.000 mounthanda,+ moule ina okulifwa ponohika mbo vomihoko omikwavo, okupolelela konondimbu mbo koutundilo atee ko mbo koutakelo. Omphangu ikola ina okukala pokati kayo.

9 “Ohika mamwaavela Siovaa, ikale nonokovandu 25.000 moule, nonokovandu 10.000 mounthanda. 10 Ohika oyo, mailingi yotyiawa tyikola tyovanakwa.+ Maikakala nonokovandu 25.000 kombanda, koutakelo aikala nonokovandu 10.000. Koutundilo maikala nonokovandu 10.000, kombwelo onokovandu 25.000. Omphangu ya Siovaa ikola, maikala pokati kayo. 11 Maikalinga yovanakwa vakohwa vamwe povana va Sandoke,+ vokwalingile nawa ovilinga viange avahayapuka, etyi ova Isilayeli no vomuhoko wa Levii vayapukile.+ 12 Mavakapolelwa kohika yokwaawa ikola unene yotyilongo, yalinga onondimbu nohika yo vomuhoko wa Levii.

13 “Kohika yovanakwa, makulandula yo vomuhoko wa Levii ina onokovandu 25.000 moule, nonokovandu 10.000 mounthanda. (Ohika aiho maikala nonokovandu 25.000 moule, nonokovandu 10.000 mounthanda.) 14 Kavapondola okupola kohika oyo yokwanina nawa yotyilongo avalandesa, hamwe avakumana hamwe aveyaave, mokonda ohika oyo, oya Siovaa ikola.

15 “Ohika ihupa-po yokuna onokovandu 5.000 mounthanda, yokwapolesa-po onondimbu mbokuna onokovandu 25.000, maikakala yepunda-umbo aliho,+ yokukala, nokulisila. Epunda-umbo, malikakala pokati kayo.+ 16 Epunda-umbo malikaelekwa ñgana: Onondimbu mbo kombanda mambukakala nonokovandu 4.500, mbo kombwelo 4.500, mbo koutundilo 4.500, mbo koutakelo 4.500. 17 Ohika yokulisila yepunda-umbo, maikakala nonokovandu 250 kombanda, kombwelo 250, koutundilo 250, koutakelo 250.

18 “Ohika yokwahupa-po, maikelifwa po yotyiawa tyikola,+ maikakala nonokovandu 10.000 koutundilo, koutakelo 10.000. Maikelifwa po yotyiawa tyikola, ovikuna mavikalimwa-mo, mavikakala okulia kwa ava vaundapa mepunda-umbo. 19 Maikalimwa naava vaundapa mepunda-umbo, vatunda momihoko aviho vyo Isilayeli.+

20 “Ohika aiho yokwaawa, ina okulifwa no moule no mousupi ina onokovandu 25.000. Onwe muna okwipola-ko nayo nohika yepunda-umbo, ailingi yotyiawa tyikola.

21 “Ohika ihupa konohika onombali mbohika yotyiawa tyikola, no yepunda-umbo, mailingi yohongoi.+ Maikahula konondimbu mbohika yotyiawa, mbokuna onokovandu 25.000 koutundilo no koutakelo. Maikelifwa po nohika mbelihula nayo, aikakala yohongoi. Ohika yotyiawa tyikola, nomphangu ikola yondywo ya Huku, maikala pokati kayo.

22 “Ohika yo vomuhoko wa Levii nohika yepunda-umbo, mambukakala pokati kohika yohongoi. Ohika yohongoi, mailingi yonondimbu no ya Sundaa+ no ya Mbesamii.

23 “Ava vomihoko viokwahupa-po, ohika ya Mbesamii ihimbikila konondimbu mbo koutundilo atee ko mbo koutakelo.+ 24 Ohika ya Simiyau ilinga yonondimbu no ya Mbesamii,+ okuhimbikila konondimbu mbo koutundilo atee ko mbo koutakelo. 25 Ohika ya Isakale ilinga yonondimbu+ no ya Simiyau, okuhimbikila konondimbu mbo koutundilo atee ko mbo koutakelo. 26 Ohika ya Sembulau ilinga yonondimbu no ya Isakale,+ okuhimbikila konondimbu mbo koutundilo atee ko mbo koutakelo.+ 27 Ohika ya Ngande ilinga yonondimbu no ya Sembulau,+ okuhimbikila konondimbu mbo koutundilo atee ko mbo koutakelo. 28 Onondimbu mbo kombwelo mbukwata konondimbu mba Ngande. Mbuhimbikila ko Tamale+ atee komaande o Melimbate-Kande,+ ambukakwata Kevota,*+ ambukapolesa-po Elunga Enene.*

29 “Etyi, otyo otyilongo muna okutepaulila omihoko vyo Isilayeli,+ tyilinga epingo liavo. Ombo, ombo onohika mbavo,”+ o Tatekulu Ohamba Onene Siovaa wetyipopia.

30 “Onombundi mbepunda-umbo, mambukakala ñgana: Onondimbu mbo kombanda, mambukakala nonokovandu 4.500.+

31 “Onombundi mbepunda-umbo, mambukakala nomanyina omihoko vyo Isilayeli. Kombanda, makukakala onombundi ononthatu, imwe oya Lumbe, imwe oya Sundaa, onkhwavo oya Levii.

32 “Oku koutundilo, kukakala onokovandu 4.500, kuna onombundi ononthatu, imwe oya Susee, imwe oya Mbesamii, onkhwavo oya Ndaa.

33 “Oku kombwelo, kukakala onokovandu 4.500, kuna onombundi ononthatu, imwe oya Simiyau, imwe oya Isakale, onkhwavo oya Sembulau.

34 “Oku koutakelo, kukakala onokovandu 4.500, kuna onombundi ononthatu, imwe oya Ngande, imwe oya Asele, onkhwavo oya Nafitalii.

35 “Otyimato atyiho tyeliseta nepunda-umbo, matyikakala nonokovandu 18.000, okuhimbikila monthiki oyo, epunda-umbo malikatiwa, Siovaa Uli Omo.”+