Omukanda wa Vali Onohamba
7 Eliseu apopi okuti: “Tehelelei ondaka ya Siovaa. Siovaa wati: ‘Muhuka ngo opo, pombundi yo Samaliya,* oseaa* ike yofinde yanyetuka, mailande osikulu* ike, onoseaa onombali mbovilia mambulande osikulu ike.’”+ 2 Omuundapi ohamba iyumba onthumbi, apopila omunthu wa Huku yotyotyili okuti: “Siovaa nga ikula ñgoo onombundi mbo keulu, okuti hamwe otyo* tyipondola okumoneka?”+ Eliseu emukumbulula okuti: “Otyo matyimoneka umwe, ove otyimono nomaiho ove,+ mahi ohali-ko.”+
3 Pombundi+ yepunda-umbo pali ovanthu vekwana vena otyilunda, avelipopila okuti: “Pahe matukala umwe vala pano atee tunkhilapo? 4 Okunyingila mepunda-umbo+ matunkhila-mo, namo muna vala ondyala. Mahi tupu okupumphama vala pano ñgaa matunkhi. Nanyo, twendei konthanda yova Silia. Ine vahupisa omwenyo wetu opo matukala nomwenyo, mahi ine vetwiipaa, opo tunkhie vala.” 5 Avaende kounthiki avanyingila monthanda yova Silia. Etyi vehika ponthele yonthanda yova Silia, ankho petupu nawike ukahi-po.
6 Siovaa weivalesa monthanda yova Silia, omatemba ovilwa aviela, nononkhambe, nomafwalali omanyingi+ aviela. Ova Silia avelipopila okuti: “Talei! Ohamba yova Isilayeli yakonga onohamba mbo vomuhoko wa Hete, no nohamba mbo Isitu opo veye okutulwisa.” 7 Avaende-nkholo liwa-liwa kokangulohi, avasi-po omakaka avo, nononkhambe mbavo, novimbulu viavo, omakaka aveesi ngeetyi ankho ekahi. Avaende-nkholo opo vahupise omienyo viavo.*
8 Etyi vouvela wotyilunda vehika ponthanda, avanyingila mekaka limwe avahimbika okulia nokunwa. Avapolo-mo opalata noolu novikutu, avekeviholeka. Konyima avakondoka avanyingila mekaka ekwavo, tupu avapolo-mo ovipuka ankho vikahi-mo avekeviholeka.
9 Avelipopila okuti: “Etyi tukahi nokulinga katyaviukile. Hono onthiki yokwiva otyipuka otyiwa! Ine tukevelela atee kutya, matumoneswa ononkhumbi. Twendei umwe pehepano ñgaa tuketyipopie keumbo liohamba.” 10 Avaende, avaihana ovayungi vo konombundi mbepunda-umbo, avevepopila okuti: “Twanyingila monthanda yova Silia, mahi mutupu nawike, katweivile ondaka naike iivalela-mo. Muna vala ononkhambe novimbulu viakutwa, omakaka veesa vala ngeetyi ankho ekahi.” 11 Ovayungi vo konombundi vati vala ivee ondaka oyo, avekeipopia meumbo liohamba.
12 Ohamba aipinduka-po liwa-liwa kounthiki aipopila ovaundapi vayo okuti: “Etei ndyimupopile etyi ova Silia valinga. Mokonda vetyii okuti onthwe twaliwa nondyala,+ vasa-po omakaka avo avakaholama mohika, vati: ‘Mavatundu mepunda-umbo, onthwe atuvekwata nomwenyo atunyingila mepunda-umbo.’”+ 13 Pahe umwe povaundapi vayo, ati: “Mbambavo yeka ovalume vamwe vapole ononkhambe ononthano pononkhambe mbahupa mepunda-umbo. Ovalume ovo mavankhi ngeetyi ova Isilayeli ovanyingi aveho vahupa-po mavankhi. Mavankhi ngeetyi tyankhia ova Isilayeli ovanyingi aveho vankhia. Eta tuvetume vakatale etyi tyaenda-ko.” 14 Ngootyo avapolo omatemba evali ovilwa, ohamba aivetumu konthanda yova Silia, aivepopila okuti: “Endei katalei-ko.” 15 Avevelandula atee ko Solondau, ondyila aiho ankho yeyula vala ovikutu novipuka ova Silia vasa-po etyi vakahateka mokonda yowoma. Ovatumwa-ndaka avakondoka aveketyipopia kohamba.
16 Ovanthu avaende, avapundu ovipuka momakaka ova Silia. Ngootyo oseaa ike yofinde yokwanyetuka ailande osikulu ike, onoseaa onombali mbovilia ambulande osikulu ike, ngeetyi tyapopile ondaka ya Siovaa.+ 17 Ohamba ankho yapa otyilinga tyokuyunga kombundi, omuundapi umwe ankho iyumba onthumbi, mahi ovanthu avemuliataila pombundi ankhi, ngeetyi omunthu wa Huku yotyotyili apopilile ohamba, etyi yapita kwe. 18 Atyiende umwe ngeetyi omunthu wa Huku yotyotyili apopilile ohamba etyi ati: “Muhuka ngo opo, onoseaa onombali mbovilia mambulande osikulu ike, oseaa ike yofinde mailande osikulu ike, pombundi yo Samaliya.”+ 19 Mahi omuundapi wapopilile omunthu wa Huku yotyotyili okuti: “Siovaa nga ikula ñgoo onombundi mbo keulu, okuti otyipuka otyo tyipondola* okumoneka?” Otyo apopile Eliseu wemukumbululile okuti: “Otyo matyimoneka umwe, ove otyimono nomaiho ove, mahi ohali-ko.” 20 Otyo umwe tyamonekele nae, mokonda ovanthu vemuliatelele pombundi, ngapo umwe ankhila.