Omukanda Wa Vali wa Samuwele

14 Sowambe omona wa Seluya,+ amono okuti ohamba yeivaluka Ambisalau.+ 2 Sowambe atumu okukaihana omukai umwe walunguka ko Tekowa,+ emupopila okuti: “Mbambavo, vala olutu, olilingisa ngatyina walula; tupu weheliwaveke omulela.+ Kala ngomukai walila ehimbwe ononkhia mbomunthu wankhia-le kohale. 3 Oende kohamba, okatola onondaka mandyikupopila.” Sowambe emupopila etyi makapopia.*

4 Omukai wo ko Tekowa aende kohamba, aikila konongolo elipetamena-po, ati: “Nkhwateseko hamba!” 5 Ohamba aimupulu okuti: “Una otyitateka patyi?” Akumbulula okuti: “Ndyimuhepe. Omulume wange wanyima. 6 Wanthya-po novana vevali. Pahe ovana ovo ankho veli kepia, ngako valwila, ankho kutupu nawike uveanununa. Umwe avange mukwavo, emwipaa. 7 Pahe ombunga yange yamphilukila-po, vena nokupopia okuti: ‘Twavele omona wokwaipaa mukwavo. Matumupolo omwenyo* ngeetyi alinga mukwavo una aipaa. Namphila okwipaa omona oo wahupapo matunyimiko omphinga,+ katwesukile!’ Vahanda okunyima ekala liahupa-po notupia,* omulume wange esala tyehena ou mapindula-po enyina liae, tyehena nawike wahupa* kombanda yohi.”

8 Ohamba aipopila omukai okuti: “Enda keumbo, ame mandyitetulula otyitateka tyove.” 9 Omukai wo ko Tekowa apopila ohamba okuti: “Tatekulu yange hamba, onombei mbulinge mbange, no vomeumbo lya tate, ove notyipundi tyove tyoutumini hamba, mwahavelwe onombei.” 10 Ohamba aimupopila okuti: “Ine umwe upopia vali otyipuka otyo, mweeta kwaame, kametyilinga-linga vali.” 11 Mahi ngwe ati: “Mbambavo hamba, hinangela-vo ku Siovaa Huku yove, vana vayavala omwenyo womona waipawa,+ vahaipae omona wange.” Ohamba aikumbulula okuti: “Na Siovaa umwe una omwenyo,+ petupu oluhuki nalwike lwomona wove malutokela pohi.” 12 Omukai apopi vali okuti: “Mbambavo ndyina vali otyipuka otyikwavo nahanda okupopia, tatekulu hamba.” Ohamba aiti: “Popia!”

13 Omukai ati: “Naina tatekulu, omokonda yatyi wahandela okulinga otyipuka ngootyo ovanthu va Huku?+ Tyina upopia ngootyo hamba, ulikwatesisa nonondaka mbove mwene, tyeetyi wataata omona wove,+ kuhande akondoke. 14 Onthwe atuho umwe matunkhi, matulingi umwe ngomaande anengukila pohi, ehetavela okwevota-po vali. Mahi ine o Huku ñgeno kapolo omunthu omwenyo,* woovola oñgeni makondola kwe una ukahi kokule. 15 Neya tupu kuno otyo neya okukupopila hamba, mokonda natila owoma ovanthu. Ame muumbili wove nasoka okuti: ‘Ndyende ndyikapopile ohamba. Hamwe itavela etyi mandyiiti kwe. 16 Hamwe ohamba maitavela etyi mandyiipopila, aindyovola ku vana vahanda okunyima-ko ame nomona wange ndyina-e wike koumphinga twapewa na Huku.’+ 17 Tupu ame muundapi wove nasoka okuti: ‘Ohamba mapopi onondaka mambumphameka omutima,’ mokonda ove hamba ukahi ngoandyu ya Huku yotyotyili, ityivila okupunga otyiwa kotyivi. Siovaa Huku yove, akale noove tatekulu.”

18 Ohamba aipopila omukai okuti: “Wahaholeke natyike etyi mandyikupulu.” Omukai akumbulula okuti: “Popia tatekulu yange hamba.” 19 Pahe ohamba aimupulu okuti: “O Sowambe wekutuma atyiho etyi wapopia?”+ Omukai akumbulula okuti: “Noove umwe tatekulu una omwenyo* hamba, atyiho wapopia otyo yatyo umwe.* O Sowambe omuundapi wove wandongesa, amphopila onondaka ambuho nekupopila. 20 Omuundapi wove Sowambe walinga ngootyo opo apilulule ovipuka, mahi ove tatekulu yange umunongo ngoandyu ya Huku yotyotyili, ovipuka aviho vikahi nokulingwa motyilongo uvii.”

21 Ohamba aipopila Sowambe okuti: “Tyikahi nawa, mandyilingi etyi wapopia.+ Enda kapole-ko omukwendye Ambisalau.”+ 22 Etyi eiva otyipuka otyo, Sowambe aikila konongolo, elipetamena-po, ahilivika ohamba. Sowambe apopila ohamba okuti: “Hono, ame muundapi wove, netyimona okuti napandwa noove tatekulu yange hamba, mokonda ove hamba wetavela etyi naita.” 23 Pahe Sowambe akatuka, aende ko Sesule,+ akaetako Ambisalau emutwala ko Selusalei. 24 Mahi ohamba aipopi okuti: “Akondoke, mahi ende no keumbo liae, kwaame eheye.” Ambisalau akondoka no keumbo liae, ahaende kohamba.

25 Mova Isilayeli aveho ankho mutupu omunthu nawike uhilivikwa nga Ambisalau mokonda youwa wae. Ankho utupu otyinthembia, okuhimbikila pombalanganga atee konomphai. 26 Tyina akululwa onohuki, (ukululwa apeho konthyulilo yenima mokonda ankho mbulema unene) ankho mbulema onosikulu 200* ngeetyi tyilema emanya liohamba.* 27 Ambisalau akala novana vetatu+ ovakwendye nomukainthu wike utiwa o Tamale, ankho omuwa unene.

28 Ambisalau akala omanima evali mo Selusalei aeho a mundindi otyo ahaende kohamba.+ 29 Ambisalau atumu okukaihana Sowambe opo emutume kohamba, mahi aanye. Emwihana vali lya vali, no ngootyo ehetavela. 30 Pahe Ambisalau apopila ovaundapi vae okuti: “Sowambe una epia lielipalakana* no liange, walima-mo osevata. Endei mukapake-ko otupia.” Ovaundapi vae avaende avapake-ko otupia aveliyoko. 31 Sowambe aende keumbo lya Ambisalau, emupulu okuti: “Omokonda yatyi ovaundapi vove vayokela epia liange?” 32 Ambisalau akumbulula Sowambe okuti: “Natumine ondaka kwoove andyiti: ‘Endyu ndyikutume kohamba ukapule okuti: “Otyityi natundila ko Sesule?+ Hahe vali ankho ndyikale vala ko Sesule. Pahe ndyeke ndyiye kwoove hamba, ine ndyivelwa onombei opo ndyiipawe vala.”’”

33 Sowambe aende kohamba, eipopila onondaka ombo ambuho. Ohamba aiihana Ambisalau, ngwe etavela aende-ko, aikila konongolo elipetamena kohamba. Ohamba aihipi ombesu Ambisalau.+