Ovilinga Viovatumwa
22 “Vakwe, vanthu vetu, vakulu vange, nthehelelei naame-vo ndyipopie.”+ 2 Etyi vemwiva uli nokupopia melaka lyo Hembeleu, avati umwe filuu, ngwe ati: 3 “Ame ndyimu Sundaa,+ natyitilwa ko Talusu mo Silisia,+ andyiya andyilongeswa mepunda-umbo muno, monomphai mba Ngamaliyeli,+ nalongwa umwe oviso viovakulu Movitumino,+ ankho ndyita ombili Huku ngoonwe umwe etyi muli nokulinga ñgaa hono.+ 4 Ame nahukaisile Ondyila ei, vamwe otyo ndyiipa umwe, ovakwavo andyikutu andyipake mokaleya, novalume novakai,+ 5 tyati umwe nomunene-nakwa novakulu aveho, vetyii. Navo umwe vamphele omikanda ndyivityinde ku vakwetu ko Ndamasiku, hono andyilipake mondyila ndyende nkhevekute-ko aveho veli-ko, ndyiveete mo Selusalei velumone.
6 “Mahi mondyila, tyina pahe ndyihungi umwe mo Ndamasiku, ankho pahe ekumbi lihungi momeliya, nakati vala ñgaa otyitei tyatunda keulu atyimimikila mwaame andyipwila monohanya,+ 7 andyitokela umwe pohi, nkhatehela-ko ondaka iivala okuti: ‘Saulu, Saulu, oityi umonehila ononkhumbi?’ 8 Ame andyimuti: ‘Ove ove-lie Tatekulu?’ Ngwe anthi: ‘Ame Sesusi omu Nasalee ou uli nokumonesa ononkhumbi.’ 9 Ovalume ankho tuna-vo, ovo vamwene vala otyimimi, mahi ondaka ipopia naame aveheiivi. 10 Ame andyiti: ‘Tatekulu, pahe ndyilinga ñgeni?’ Ngwe Tatekulu anthi: ‘Katuka, enda no mo Ndamasiku, enda ukapopilwe ovilinga aviho wanekelwa.’+ 11 Mahi mokonda ankho kuna hikweete mokonda yotyitei otyo, ava twaenda navo avankhwata mokuvoko andyii no mo Ndamasiku.
12 “Pahe omulume umwe utiwa o Ananiya, umwe uta ombili Ovitumino ankho upopiwa nawa nova Sundaa aveho vakala oko, 13 andyendela. Eya atalama pwaame amphopila ati: ‘Saulu, mukulu wange, omaiho ove apatuke!’ Opo yatyo umwe opo, andyitale nkhati ñgaa ndyimweete.+ 14 Ngwe ati: ‘Huku yonombwale mbetu, ove akoya unoñgonoke etyi ahanda, umone ondingaviwa,+ wiive ondaka itunda momulungu wae, 15 ove ove molingi ombangi, umupopie movanthu aveho, upopie ovipuka wamona neevi weiva.+ 16 Ya pahe ñgaa ulinga-tyi vali? Katuka, mbatisalwa, likoha ononkhali mbove+ mokukalavandya enyina liae.’+
17 “Mahi etyi nakondoka ko Selusalei,+ pahe andyiya mondywo ya Huku andyilikwambela, ndyikati ñgaa movililenya 18 oyou ndyimweete upopia naame anthi: ‘Kanyauka, mo Selusalei tunda-mo wahasete, kamavetavela-le oumbangi wove tyina umphopia movanthu.’+ 19 Ame andyiti: ‘Tatekulu, vana ame vendyi umwe nawa, onondywo mbokufendela ankho ndyiti umwe andyii mu ei andyii mu ei otyo ndyiveta, otyo ndyitwala no mokaleya ava vekutavela;+ 20 monthiki ohonde ya Sitevau ombangi yove yamomeswa, ame ankho ndyitai, otyo ndyityihohiya umwe, oku otyo ndyiyunga ovikutu vya ava ankho veli nokumwiipaa.’+ 21 Ngwe anthi umwe vala: ‘Enda, mokonda mandyikutumu kovanthu vomihoko omikwavo.’”+
22 Ovanthu avemutehelela umwe apopi amane. Mahi avakaluluka vali aveho avati: “Omulume oo kouye mupolei-ko, ou ha wokukala nomwenyo!” 23 Mokonda ankho veli vala nokupopila peulu otyo vayumbahi ovikutu viavo vyo kombanda, otyo vayumba eheke meulu,+ 24 omunene watyo womafwalali atumu Paulu atwalwe no mokati, momafwalali, ati una okupulwa otyo avetwa, ankho wahanda anoñgonoke umwe otyityi alinga tyankhindula ovanthu. 25 Mahi etyi vemukuta avetwe, apulu onkhalamutwe yomafwalali utai-po ati: “Kovitumino tyaviuka umwe okuveta omu* Loma apehena etyi alinga tyapenga?”*+ 26 Etyi onkhalamutwe yomafwalali yetyiiva otyo, aiketyipopila omunene watyo womafwalali aiti: “Una ipi pahe, tumulinge ñgeni? Omulume ou naina omu Loma.” 27 Ou omunene womafwalali afwene-po emupulu ati: “Nkhele mphopile, ove umu Loma?” Ngwe ati: “Eenga.” 28 Omunene womafwalali ati: “Ame pala nkhalinge omu Loma nafeta-po onombongo ononyingi.” Ngwe Paulu ati: “Ame ndyityitwa tupu ndyimu Loma-le.”+
29 Ovalume ankho vahanda vali okumupulusuna, otyo vemuveta, okwiiva otyo avekelihaha umwe avemuhondovoka; ou omunene womafwalali nae pahe atili owoma etyi etyinoñgonoka okuti omu Loma, ngwe ankho wemukuta-le nomalienge.+
30 Pahe tyina tyiti onthiki onkhwavo, mokonda ankho wahanda umwe okunoñgonoka oityi ova Sundaa vemuhungila, emukutulula atumu ononkhalamutwe mbovanakwa Nombonge onene veliongiye. Aeta Paulu, emupake pokati kavo.+