Esitala
9 Etyi ovipuka ovio viapwa okulingwa, liwa-liwa ononkhalamutwe aveya kwaame avati: “Ova Isilayeli, novanakwa, no vomuhoko wa Levii, kaveliyapukile novanthu vovilongo ovikwavo, valinga ovipuka ovivi vilingwa novanthu ovo,+ ovivi viova Kanaa, nova Hete, nova Peliseu, nova Sembusi, nova Amoo, nova Moambe, nova Isitu,+ nova Amoleu.+ 2 Vanepa ovanthu vovilongo ovio, avanepesa-ko ovana vavo.+ Pahe ovanthu vomuhoko* ukola,+ velihonyeka novanthu vovilongo ovikwavo.+ Ovanene vatyo, no vokukwatesako ovatumini, haunene ovo valinga vali ovipuka ovivi.”
3 Etyi neiva otyipuka otyo, andyitandula omuvalo wange, nekapote liange, andyilitunya-tunya onohuki momutwe, nonondyeli mbange andyipumphama nokweihamenwa unene. 4 Ovanthu aveho vena onthilo* nonondaka mba Huku yo Isilayeli, aveliongiya ponthele yange, mokonda yovivi ovanthu vokwatundile koukonde valingile. Ame andyipumphama nokweihamenwa unene atee twalinga otyiawa tyovilia kokangulohi.+
5 Etyi oola yehika-po yotyiawa tyovilia kokangulohi,+ namphila tyankhundisile unene andyikatuka nomuvalo wange watanduka nekapote liange liatanduka. Andyiikila konongolo andyitandaveka omavoko ange ku Siovaa, Huku yange. 6 Andyiti: “Huku yange nakunda unene, nokuyelulila otyipala tyange kwoove hityivili, Huku yange, mokonda ononkhali mbetu mbeliyawisa unene pomitwe vietu, tuvelwa onombei ononyingi mbuhika atee keulu.+ 7 Okutuka pononthiki mbovakwaukulu vetu atee hono, tuvelwa unene onombei.+ Mokonda yononkhali mbetu, onthwe, no nohamba mbetu, novanakwa vetu, tuhole okupakulilwa onohamba mbovilongo ovikwavo, otyo tumona ononkhumbi komutunga,+ no koukonde,+ no kokuvakwa,+ no kolukundo, ngeetyi tukahi hono.+ 8 Mahi pahe mokamuvo kehehi, twapandwa na Siovaa, Huku yetu, wakwatesako vamwe avahupu, wetwavela omphangu* yokwapama mondywo yae ikola,+ opo aliaimise omaiho etu, Huku yetu, na tupulukwe-po katutu koukonde wetu. 9 Namphila tuvapika,+ Huku yetu, ketuyekelele koukonde. Mahi mokonda una olwembia olunene noonthwe, wetukwatesako tupandwe no nohamba mbo Pelesa+ mbutupameke, opo ondywo ya Huku italame,+ ovimato viayo viokwatoka avipindulwa-po, etwavela ovimato viomamanya* ko Sundaa, no ko Selusalei.
10 “Mahi pahe Huku yetu, oityi matupopi? Twayeka-po ovitumino viove 11 wapele ovaundapi vove ovauli avetwavela-vio, viati: ‘Otyilongo mukahi nokunyingila mamupiñgana tyasila, mokonda yovivi ovanthu vovilongo ovikwavo valinga, evi valinga viasila unene, okutuka nthele imwe yotyilongo atee onthele onkhwavo, otyilongo otyo atyiho tyeyula ovivi valinga.+ 12 Muhanepesei ovana venyi novana vavo, tupu mwehetavelei ovana vavo vanepwe novana venyi,+ mwahaovolei ombembwa, amuhande omwenyo ukahi nawa kuvo. Ngootyo onwe mamukala tyapama,+ amuli ovipuka oviwa motyilongo, amutyipiñgana atyikala tyovana venyi atee-tee.’ 13 Mu aviho vietumonekela mokonda yovivi twalinga, nononkhali mbetu ononene,+ Huku yetu, kwetulingile etyi tyatokala mononkhali mbetu wakwatesako onthwe tukahi pano tuhupe.+ 14 Okuti matuliatela vali kovitumino viove, atulinepe novanthu* vokulinga ovipuka ovio ovivi?+ Okuti kumetunumanena unene, otuhanye-ko atuho, ohahupisa-po nawike? 15 Siovaa Huku yo Isilayeli, ove umuviuki,+ mokonda wetuhupisa hono tuna omwenyo. Pahe tukahi pano, tweya kwoove, tutyii okuti twapengesa mokonda yonkhali oyo,+ katyapepukile okukala lutai kotyipala tyove.”