Ovakoyesi
21 Ova Isilayeli valingilile omphango ko Misipaa+ avaane, avati: “Nawike pwoonthwe manepesa omona wae kovalume vomuhoko wa Mbesamii.”+ 2 Mokonda yotyo ovanthu avaende ko Mbetele+ ku Huku yotyotyili, ngako vapumphama atee kwanthikovela, aveliyave, avalili unene-nene.” 3 Otyo vati: “Siovaa Huku yo Isilayeli, omokonda yatyi mo Isilayeli mwamonekela otyipuka etyi? Omokonda yatyi mo Isilayeli mamupesekela omuhoko umwe?” 4 Monthiki yalandula-ko, ovanthu avapinduka-po komuhuka, avatungu omutala wovilikutila opo valingile-ko oviawa viokuyokwa noviawa viombembwa.+
5 Ovanthu vo Isilayeli avapulu okuti: “Pomihoko vyo Isilayeli, oupi weheile ku Siovaa okuliongiya?” Mokonda vaanene, avati una weheile ku Siovaa ko Misipaa una okwiipawa. 6 Ova Isilayeli avalingi okankhenda Mbesamii una velilandula nae mokonda yeetyi malingwa. Ngwe avati: “Hono mo Isilayeli mwanyimwa omuhoko wike. 7 Opi matukapola ovakai mavanepwa no vokwahupa-po, tyina twaanena menyina lya Siovaa+ atuti kamatunepesa nawike povana vetu kuvo?”+
8 Avapulu okuti: “Olie po vomuhoko wo Isilayeli weheile ku Siovaa ko Misipaa?”+ Nawike po vo ko Sambesi-Sileyande weile pana ovanthu aveho vomewaneno veliongiya. 9 Etyi vavalula ovanthu aveho, avetyimono okuti ovanthu vokukala ko Sambesi-Sileyande nawike uli-po. 10 Ovanthu aveho vokweliongiya, avatumu-ko ovalume vokwapama vali 12.000. Avevetumu okuti: “Endei, kavangei ovanthu vakala ko Sambesi-Sileyande atee umwe ovakai novana vatyo vevangei.+ 11 Muna okulinga ñgaa: Ipaei ovalume aveho, novakai aveho, hupisei vala ovakai vahaendele novalume.” 12 Povanthu vakala ko Sambesi-Sileyande avavasi-po ovakainthu 400 vehei mulume, vana vehenelale nomulume. Aveveeta monthanda yo Silo+ motyilongo tyo Kanaa.
13 Ovanthu aveho veliongiyile avatumu ondaka ko vomuhoko wa Mbesamii veli monkhanda yo Limoo,+ ondaka yombembwa. 14 Pahe ovalume vo momuhoko wa Mbesamii avakondoka kotyilongo tyavo. Aveveavela ovakai vana vahupisile ko Sambesi-Sileyande,+ mahi ovakai avehevetuuka aveho. 15 Ovanthu avalingi okankhenda vomuhoko wa Mbesamii+ mokonda yeetyi valingwa, mokonda Siovaa weveyapulile komihoko viova Isilayeli. 16 Ovakulu veliongiyo avati: “Opi matukapola ovakai mavanepwa novalume ava vahupapo, tyina ovakai aveho vo momuhoko wa Mbesamii vaipawa?” 17 Pahe avati: “Vokwahupa momuhoko wa Mbesamii vena okutwalako okukala nepingo liavo, opo omuhoko wavo wahanyime mo Isilayeli. 18 Onthwe katuveavela ovana vetu vakale ovakai vavo mokonda ovanthu aveho mo Isilayeli vaanene, avati: ‘Una wamanepesa vomuhoko wa Mbesamii ateyelwe onkhano.’”+
19 Pahe avati: “Tala! Kuna otyipito Siovaa alingilwa nima na nima ko Silo+ ikala kombanda mo Mbetele, koutundilo wekumbi ketapalo litunda ko Mbetele okwenda no ko Sikei, kombwelo mo Lembona.” 20 Ngootyo avatumu ovalume vomuhoko wa Mbesamii okuti: “Endei, kaholamei momapia omiti vionouva. 21 Tyina mwamamono ovafikwena* vomo Silo veya potyila tyavo na vanyane, amuho amutundu momapia omiti vionouva, atyiti ou upola-po wae, ou upola-po wae povafikwena vo ko Silo. Pahe amukondoka kotyilongo tyo vomuhoko wa Mbesamii. 22 Ine ovo he, nonomphange mbavo veya, avetyipopi kwoonthwe, onthwe matuvepopila okuti: ‘Tulingei-vo okankhenda, katwavasile ovakai movilwa valinge vavo,+ onwe kamupondola okuveavela ovakai kotyali, amuhavelwa onombei.’”+
23 Ovalume vomuhoko wa Mbesamii aveho avetavela avaende avakapola ovakai povakai vekahi nokunyana. Konyima avakondoka kepingo liavo, avapindula-po omapunda-umbo avo,+ ngamo vakala.
24 Pahe ova Isilayeli avatundu opo, aveho avaende no komihoko viavo, no konombunga mbavo; munthu na munthu aende kepingo liae.
25 Pononthiki opo mo Isilayeli kamwali ohamba.+ Munthu na munthu mwene ulinga vala etyi tyemuviukila.*