Omukanda wo Tete wa Samuwele
13 Saulu wakala ohamba, nomanima+ . . .* atumina ova Isilayeli omanima evali. 2 Saulu aholovona ovalume 3.000 mo Isilayeli: 2.000 avakala na Saulu ko Mikimasi no kotyilongo tyonomphunda ko Mbetele, Sonataa akala novalume 1.000+ ko Simbeaa+ ya Mbesamii. Ovalume ovakwavo evetumu vakondoke komakaka avo. 3 Sonataa aipaa ovita viova Filisitiya+ veli mo Semba,+ ova Filisitiya avetyiivi. Saulu atumu ovatumwa-ndaka vahike onkhwino+ motyilongo atyiho okwihana ova Isilayeli, okuti: “Ova Hembeleu vetyiive!” 4 Ova Isilayeli aveho avetyiivi okuti: “Saulu waipaa ovita viova Filisitiya, pahe ova Filisitiya veyele ova Isilayeli.”* Ovanthu avaihanwa opo vende ku Saulu ko Silingale.+
5 Ova Filisitiya navo aveliongiya vakalwise ova Isilayeli, ankho vena omakatemba ovilwa 30.000, novalume 6.000 vokweenda nononkhambe.+ Vena ovita ovinyingi-nyingi vilifwe poluheke lwo kelunga. Aveya, avaongo onthanda ko Mikimasi, koutundilo wo Mbete-Ave.+ 6 Etyi ova Isilayeli vetyimona okuti veli motyitateka, vapondola okwipawa, avakaholama momaleva,+ no momilola, no mononkhanda, no monondywo mbo pohi,* no momatoto. 7 Ova Hembeleu vamwe avatauluka o Solondau okwenda kotyilongo tyo Ngande no tyo Sileyande.+ Mahi Saulu esala mo Silingale aveho vemulandulile vateketele. 8 Akevelela ononthiki epandu-vali atee ononthiki Samuwele alaele mbapwa, mahi Samuwele otyo eheya ko Silingale, ovanthu vena Saulu aveliyandyana. 9 Pahe Saulu ati: “Etei otyilikutila tyokuyokwa novilikutila viombembwa.” Aave otyilikutila tyokuyokwa.+
10 Mahi etyi amana okwaava otyilikutila tyokuyokwa, Samuwele eya. Saulu aende-ko, ekemukukunya. 11 Samuwele emupulu ati: “Walingila-tyi ñgaa?” Saulu ati: “Ovanthu vekahi nokwenda,+ onthiki ove watile oyo moya yalamba-le, ova Filisitiya veliongiya ko Mikimasi.+ 12 Pahe andyisoko andyiti: ‘Ova Filisitiya maveya okundwisila muno mo Silingale, haovolele ehongolelo lya* Siovaa.’ Mokonda yotyo, ame andyiave otyilikutila tyokuyokwa.”
13 Ngootyo Samuwele apopila Saulu okuti: “Ove kwalingile onondunge. Kwetavelele otyitumino Siovaa Huku yove ekwavela.+ Ine wetavelele, ñgeno Siovaa wayeka ouhamba wove autumina ova Isilayeli atee-tee. 14 Mahi pahe ouhamba wove kamautwalako.+ Siovaa mavasi omunthu uhambukiswa omutima wae,+ Siovaa memwavela otyilinga tyounkhalamutwe opo ahongolele ovanthu vae,+ mokonda ove kwetavelele etyi Siovaa ekutuma.”+
15 Pahe Samuwele atundu ko Silingale, aende no ko Simbeaa yo ko Mbesamii, Saulu avalula ovanthu; wesalele novanthu 600.+ 16 Saulu, nomona wae Sonataa novanthu vesalele navo, veli ko Semba+ yo ko Mbesamii, ova Filisitiya vaongelele onthanda ko Mikimasi.+ 17 Ovita viova Filisitiya avitundu monthanda aviliyapuka ovinkhunkha vitatu. Tyimwe atyipolesapo etapalo lyo ko Ofala, kotyilongo tyo Swali, 18 otyikwavo atyipolesapo etapalo lyo Mbete-Oloo,+ tyatatu atyipolesapo etapalo lienda no konondimbu, okuviuka ko Semboii komaluhandya.
19 Motyilongo atyiho tyo Isilayeli kamwali ovanthili vovivela, mokonda ova Filisitiya vapopile okuti: “Tuhayekei ova Hembeleu vanthile omitunga nomaonga.” 20 Ngootyo ova Isilayeli aveho vena okwenda kova Filisitiya opo vakalipike onombiku mbonosaluwa mbavo, nomatyala, nononkhava, nonofoso mbavo. 21 Vena okufeta o pim ike* opo valipike onombiku mbonosaluwa mbavo, nomatyala, nononkhava, nokuhonga onomphandyi, nokulingisa onohako. 22 Ngootyo monthiki yovilwa, ovanthu aveho vena Saulu na Sonataa,+ petupu nawike una omutunga, nii eonga; o Saulu vala nomona wae Sonataa vamanekele ovihongati.
23 Pahe ovita vimwe viova Filisitiya, vaile no komulola wo ko Mikimasi.+