Omukanda wo Tete Ehipululo
21 Satanasi* akatukila o Isilayeli, ahindila Ndaviti opo avalule ova Isilayeli.+ 2 Ndaviti apopila Sowambe+ nononkhalamutwe mbovanthu okuti: “Endei, kavalulei ova Isilayeli, okuhimbikila ko Mbelesemba atee ko Ndaa,+ amuya okumphopila, opo ndyinoñgonoke apa velifwe.” 3 Mahi Sowambe ati: “Siovaa ayawise kovanthu vove, avakala ovanyingi okuwana-wana atyihiki po 100. Tatekulu yange hamba, ovanthu ava aveho ha-vove-ale? Omokonda yatyi wahandela okulinga ngootyo tatekulu yange? Okuti kumaetela ova Isilayeli onkhali?”
4 Mahi, ondaka yohamba aipono ya Sowambe. Ngootyo, Sowambe aenda-enda mo Isilayeli aiho, konyima, akondoka mo Selusalei.+ 5 Sowambe aavela Ndaviti otyifwe tyovanthu aveho vavalulwa. O Isilayeli aiho ankho ina ovalume 1.100.000 vokumaneka omitunga, mo Sundaa ankho muna ovalume 470.000 vokumaneka omitunga.+ 6 Mahi, vomuhoko wa Levii no wa Mbesamii kavavalulilwe,+ mokonda etyi ohamba yatuma, ku Sowambe ankho katyaviukile.+
7 Otyo atyinumanesa unene Huku yotyotyili. Mokonda yotyo, Huku avange o Isilayeli. 8 Ndaviti apopila Huku yotyotyili okuti: “Otyipuka otyo nalinga onkhali onene.+ Pahe, mbambavo, evela-vo onkhali yomuumbili wove,+ etyi nalinga owova.”+ 9 Siovaa apopila Ngande,+ omutali wa Ndaviti, ati: 10 “Enda, okapopila Ndaviti okuti: ‘Siovaa wati: “Povipuka vitatu nahanda okukwetela, koya-po tyike.”’” 11 Ngande aende ku Ndaviti, emupopila okuti: “Etyi otyo tyapopia Siovaa, wati: ‘Koya povipuka evi, 12 pokuti: Omanima etatu ondyala,+ okutila konondyale mbove onohanyi ononthatu otyo vekuvanga nomutunga,+ okuvangwa nomutunga wa Siovaa ononthiki ononthatu — omukihi motyilongo+ — oandyu ya Siovaa yeeta ehanyu motyilongo+ atyiho tyo Isilayeli.’ Pahe soka, opopi etyi mandyikapopila Una wanthuma.” 13 Ndaviti apopila Ngande okuti: “Otyo pahe tyandyihama unene ngatyi! Mbambavo, ndyitokele vala pomavoko a Siovaa, mokonda okankhenda kae okanene unene,+ tyipona okutokela peke liomulume.”+
14 Siovaa atahela ova Isilayeli omukihi,+ mo Isilayeli amunkhi ovanthu 70.000.+ 15 Tupu, Huku yotyotyili atumu oandyu opo ihanye-po o Selusalei. Mahi tyina ihungi umwe kokwihanya-po, Siovaa atyimwiihama unene,* apopila oandyu ikahi nokuhanya-ko+ ovanthu okuti: “Pahe tyapwa!+ Voveka okuvoko kwove.” Opo pahe oandyu ya Siovaa ili-ale ponthele potyipale tya Olinaa+ omu Sembusi.+
16 Ndaviti akatula omaiho, tyina akati ñgaa, oandyu ya Siovaa ili pokati keulu nohi, ina omutunga+ peke waviukiswa mo Selusalei. Ndaviti novakulu, avelipupika-po liwa-liwa.+ Ankho vavala onongosa.+ 17 Ndaviti apopila Huku yotyotyili okuti: “Hame-ko natuma okuvalula ovanthu? Ame nalinga onkhali, ame nalinga etyi tyapenga.+ Mahi oityi onongi ombu mbalinga? Siovaa, Huku yange mbambavo, okuvoko kwove kuye no kwaame no ko veumbo lya tate, wahaetele ovanthu vove ovihuna evi.”+
18 Oandyu ya Siovaa aitumu Ngande+ akapopile Ndaviti okuti ainduke kotyipale tya Olinaa omu Sembusi,+ akatunge-ko omutala wovilikutila wa Siovaa. 19 Ndaviti aende ngeetyi apopilwa na Ngande menyina lya Siovaa. 20 Mononthiki mbatyo ombo, Olinaa aleuka, amono oandyu, ovana vae vekwana ovakwendye ankho ena-vo, avakaholama. Olinaa ankho ukahi nokutyopa otiliku. 21 Olinaa wati vala monee Ndaviti ukahi nokuya, atundu potyipale, aende ku Ndaviti, elipetamena kwe. 22 Ndaviti apopila Olinaa okuti: “Ndandese* ohika ei yotyipale, opo ndyitunge-po omutala wovilikutila wa Siovaa. Indandese onombongo mbata muyo, opo ovanthu vayovoke kovihuna.”+ 23 Mahi Olinaa apopila Ndaviti okuti: “Ilinge-po vala yove, tatekulu yange hamba, olingi-po etyi uhanda.* Onongombe ombombu mbokulinga otyilikutila tyokuyokwa, omavai aa osola yokutyopa,+ alinge ononkhwii. Otiliku, ikale otyiawa tyovilia. Aviho ndyikwavela-vio.”
24 Mahi, Ohamba Ndaviti apopila Olinaa okuti: “Au katyitavela! Ndyina umwe okwilanda onombongo mbata muyo, mokonda hipondola okukupola tyove opo ndyiavele Siovaa, nii okwaava ovilikutila viokuyokwa, nahafetele natyike.”+ 25 Ngootyo, Ndaviti aavela Olinaa onosikulu* 600 mboolu, opo afete ofika. 26 Ndaviti atungila-po Siovaa omutala wovilikutila+ aave ovilikutila viokuyokwa novilikutila viombembwa, ahimbika okuhilivika Siovaa. Ngwe emukumbulula etyi atuma otupia+ twatunda keulu atuyoko ovilikutila vili komutala wovilikutila. 27 Ngootyo, Siovaa atumu oandyu+ ikondole omutunga wayo motyilalo tyao. 28 Etyi Ndaviti amona okuti Siovaa wemukumbululila potyipale tya Olinaa omu Sembusi, ngapo nkhele akala, otyo aava ovilikutila. 29 Pononthiki opo, ekaka liefendelo lya Siovaa Mwisesi atungilile moluhandya, nomutala wovilikutila viokuyokwa, ankho vili komphangu yokwaya peulu ko Simbeau.+ 30 Mahi Ndaviti ehetyivili okwenda-ko opo akaovole Huku, mokonda ankho watila owoma omutunga woandyu ya Siovaa.