Ovakoyesi
11 Sefetee+ omu Sileyande wali efwalali liokwapama. Ngwe ina wali ekunga, he ya Sefetee o Sileyande. 2 Mahi, tembwaa Sileyande nae wali novana. Etyi ovana va tembwa Sileyande vekula, avataata Sefetee avemupopila okuti: “Ove kumapiñgana natyike meumbo lya tate yetu mokonda ove umona womukai omukwavo.” 3 Sefetee aende-nkholo vana elilandula navo akakala kotyilongo tyo Tombe. Ovalume vokwaangauluka vala vehena ovilinga aveliwaneka na Sefetee avemulandula.
4 Etyi palamba ononthiki mbumwe ova Amoo avalwisa ova Isilayeli.+ 5 Etyi ova Amoo vahimbika okulwisa ova Isilayeli, ovakulu vo ko Sileyande avakapola liwa-liwa Sefetee kotyilongo tyo Tombe. 6 Avapopila Sefetee okuti: “Endyu ukale onkhalamutwe yetu opo tutyivile okulwisa ova Amoo.” 7 Mahi, Sefetee apulu ovakulu vomo Sileyande okuti: “Hanwe vokundyele, mwanthaata meumbo lya tate?+ Pahe muya kwaame mokonda yeetyi muna ovitateka?” 8 Ovakulu vomo Sileyande avapopila Sefetee okuti: “Otyo onthwe tweila kwoove. Ine twenda atuho atukalwisa ova Amoo, ove molingi onkhalamutwe yovanthu aveho vakala mo Sileyande.”+ 9 Sefetee apopila ovakulu vomo Sileyande okuti: “Ine twenda noonwe atukalwisa ova Amoo, Siovaa ankhwatesako kwaame avatili-ko, opo tyotyili mandyikala onkhalamutwe yenyi!” 10 Ovakulu vomo Sileyande avapopila Sefetee okuti: “Siovaa akale ombangi,* matulingi umwe etyi wapopia.” 11 Sefetee aende novakulu ko Sileyande, ovanthu avemulingi onkhalamutwe maivehongolela. Apopila vali ko Misipaa+ onondaka apopile-ale, otyo Siovaa atala.
12 Sefetee atumu ovatumwa-ndaka kohamba yova Amoo+ vekeipule okuti: “Oityi twelilinga noove etyi walwisa otyilongo tyange?” 13 Ohamba yova Amoo aipopila ovatumwa-ndaka va Sefetee okuti: “Omokonda ova Isilayeli vatambula-ko otyilongo tyange etyi vatunda ko Isitu,+ okuhimbikila ko Alunoo+ atee ko Samboke no ko Solondau.+ Pahe tyimphei kombembwa.” 14 Mahi, Sefetee akondola vali ovatumwa-ndaka vae kohamba yova Amoo, 15 vekemupopile okuti:
“Sefetee wati: ‘Ova Isilayeli kavapolele otyilongo tyova Moambe,+ nii otyilongo tyova Amoo,+ 16 mokonda etyi vatunda ko Isitu ova Isilayeli vakwatele moluhandya atee Kelunga Likuhuka,+ avehiki ko Kande.+ 17 Ova Isilayeli vatumine ovatumwa-ndaka kohamba yo Endoo+ vekeipopile okuti: “Mbambavo eta-vo tukwate motyilongo tyove,” mahi ohamba yo Endoo aihevetavela. Ngatyo ñgoo vakaita kohamba yo Moambe+ nayo ayehevetavela. Ova Isilayeli avatwalako okukala motyilongo tyo Kande.+ 18 Etyi vakwata moluhandya avelisete notyilongo tyo Endoo+ notyo Moambe. O Moambe aveikwata koutundilo wekumbi, avaongo onthanda motyilongo tyo Alunoo; kavanyingilile mo Moambe+ mokonda onondimbu mbo Moambe+ mbaoyela mo Alunoo.
19 “‘Konyima ova Isilayeli avatumu ovatumwa-ndaka ku Siyoo ohamba yova Amoleu itumina o Hesimboo. Ova Isilayeli avapopi okuti: “Mbambavo tuyeke-vo tulambele motyilongo tyove twende no kotyilongo tyetu.”+ 20 Mahi, Siyoo kayumbile onthumbi mo va Isilayeli, eheveyeke valambele motyilongo tyae. Siyoo aongiya ovanthu vae aveho, avaongo onthanda mo Saasi, alwisa ova Isilayeli.+ 21 Siovaa Huku yo Isilayeli, apakula Siyoo novanthu vae pomavoko ova Isilayeli, avatili-ko, ova Isilayeli avatambula-ko otyilongo atyiho mukala ova Amoleu.+ 22 Ngootyo avatambula-ko otyilongo atyiho tyova Amoleu, okuhimbikila ko Alunoo atee ko Samboke, okutuka moluhandya atee ko Solondau.+
23 “‘Siovaa Huku yo Isilayeli, wataatele ova Amoleu kotyipala tyovanthu vae ova Isilayeli,+ pahe ove, ove wahanda okutaata ova Isilayeli? 24 Ove kutambula ovipuka aviho upewa na huku yove Kemosi?+ Ngootyo, noonthwe matutaata ovanthu aveho Siovaa Huku yetu, mataata komutwe wetu.+ 25 Okuti ove umunene vali ku Mbalake+ omona wa Sipole, ohamba yo Moambe? Nthiki imwe weivile-ale okuti una etyi elilinga nova Isilayeli, ine hamwe wevelwisile? 26 Etyi ova Isilayeli vakala mo Hesimboo no monohika mbatyo,*+ nomo Alowele no monohika mbatyo, no momapunda-umbo elikalela popepi no Alunoo omanima 300, omokonda yatyi mwehevetaatelele-mo pononthiki opo?+ 27 Hekulingile natyike, mahi ove ukahi nokulinga etyi tyapenga okundwisa. Siovaa Omukoyesi+ omunene akoyese omphela yovanthu vo Isilayeli nova Amoo.’”
28 Mahi, ohamba yova Amoo, kayetavelele onondaka Sefetee atumine.
29 Omphepo ya Siovaa aiya mu Sefetee,+ aende alambe o Sileyande, notyilongo tya Manasesi, okwenda no ko Misipaa yo Sileyande,+ aende atee kova Amoo.
30 Sefetee alingi omulao+ ku Siovaa ati: “Ine upakula ova Amoo pomavoko ange, 31 una wamatumbuka tete kombundi yeumbo liange, tyina ndyitunda kovilwa nombembwa, pokulwisa ova Amoo, makala wa Siovaa,+ ame mandyimulingi ngotyilikutila tyokuyokwa.”+
32 Ngootyo, Sefetee akalwisa ova Amoo, Siovaa evepakula pomavoko ae. 33 Aipaa ovanthu ovanyingi-nyingi, okuhimbikila ko Alowele atee ko Minite — momapunda-umbo 20 — aipaa atee ko Ambele-Kelamii. Ngootyo ova Amoo avatili-ko kova Isilayeli.
34 Pahe, Sefetee akondoka keumbo liae ko Misipaa,+ tyina ehika kuna omona wae omukainthu uya, weenda nokuhika o pandelu, otyo anyana! Omona oo oe vala ena-e. Utupu vali omona nawike nii omukwendye nii omukainthu. 35 Etyi emumona atandaula ovikutu viae ati: “Tatiii, mona wange! Wateya omutima wange,* ove napakula. Ndyina etyi napopila* Siovaa, hipondola okukondoka konyima.”+
36 Mahi, omona wae emupopila okuti: “Tate, ine ove walinga omulao+ ku Siovaa, ndinge ngeetyi walaa, mokonda Siovaa wekulwisila-ko onondyale mbove ova Amoo.” 37 Apopila he okuti: “Tate ndyikwita vala otyipuka tyike: eta ndyende konomphunda andyikakala-ko onohanyi onombali nokulila, mokonda haendele nomukwendye, atukakala vala atwike novahikwena vakwetu omapanga ange.”*
38 Tate yae emupopila okuti: “Enda!” Emuyeke akakale-ko onohanyi onombali; aende konomphunda na vahikwena vakwavo opo akalile mokonda kaendele nomukwendye. 39 Etyi onohanyi onombali mbalamba akondoka ku he, tate yae afwisapo omulao emulingilile.+ Ngwe kenelale nomulume nawike. Ova Isilayeli avakala notyituwa* etyi: 40 Nima na nima mononthiki ononkhwana menima, ovakainthu vomo Isilayeli vakapila* komona wa Sefetee omu Sileyande vekemupandule.