Ovakoyesi

20 Ova Isilayeli aveho avatundu ko Ndaa+ no ko Mbelesemba, no motyilongo tyo Sileyande,+ avelipakela-mo aveliongiya* aveho kotyipala tya Siovaa ko Misipaa.+ 2 Ononkhalamutwe, novanthu vomihoko aviho viova Isilayeli, avakala ponomphangu mbavo meliongiyo liovanthu va Huku; avakala omaswalali ena 400.000 okweendela pohi amaneka omitunga.+

3 Vomuhoko wa Mbesamii avetyiivi okuti ovalume ova Isilayeli veya ko Misipaa.

Ova Isilayeli avati: “Tupopile, otyipuka ngootyo otyivi, tyaenda ñgeni?”+ 4 Womuhoko wa Levii+ omulume womukai wokwaipawa ati: “Twalalele ko Simbeaa+ ya Mbesamii nonthawa yange. 5 Ovanthu vokukala* mo Simbeaa aveya kounthiki avetuhitikinyina mondywo. Vahandele okundyipaa, etyi vahandyipaele avakwata kononkhono onthawa yange avalala nae, atee anyima.+ 6 Pahe andyikwata otyivimbi tyatyo, andyityityoka-tyoka ovinthimbu-ovinthimbu, andyivitumu komapunda-umbo aeho epingo liova Isilayeli,+ mokonda etyi valinga mo Isilayeli tyakundisa, katyaviukile. 7 Pahe onwe amuho vomo Isilayeli popiei etyi mwasoka neetyi mamulingi.”+

8 Ovanthu aveho avelikwata okapandi* avakatuka avati: “Kamatwende komakaka etu nii komaumbo etu. 9 Etyi matulingi ova Simbeaa otyetyi: Matutalesa atukevelwisa.+ 10 Momihoko aviho vyo Isilayeli, povalume 100 matukapola-po 10, povalume 1.000 matukapola-po 100, povalume 10.000 atukapola-po 1.000, atukongolola okulia kwomafwalali opo valwise o Simbeaa ya Mbesamii mokonda etyi valinga mo Isilayeli tyikundisa.” 11 Ovanthu aveho vo Isilayeli avelipake kumwe ngomapanga* opo vakalwise epunda-umbo olio.

12 Vomihoko viova Isilayeli, avatumu ovalume ko vomuhoko auho wa Mbesamii vekevepopile okuti: “Etyi mwalinga oityi? 13 Pahe, twavelei vala ovalume omakongombanda omo Simbeaa+ tuveipae opo tunyime-mo otyivi etyi mo Isilayeli.”+ Mahi, vomuhoko wa Mbesamii avehetavela ku vana velilandula navo ova Isilayeli.

14 Vomuhoko wa Mbesamii avatundu momapunda-umbo, avekeliongiya ko Simbeaa, opo vakalwe novalume ova Isilayeli. 15 Monthiki oyo vomuhoko wa Mbesamii avapolo momapunda-umbo avo ovalume 26.000 vokwamaneka omitunga, tyahavalula ovakwa-vita 700 vokwapama vali voko Simbeaa. 16 Povakwa-vita ovo pena 700 vokwapama vali, aveho vayumba nokumbili. Vetyivila okuyumba nonthwala* atee umwe moluhuki kaaponyo.

17 Tyahapake-ko vomuhoko wa Mbesamii, ovalume vo Isilayeli vaongiyile omaswalali 400.000 okwamaneka omitunga,+ aeho omaswalali etyivila okulwa. 18 Avaende ko Mbetele avakapula ku Huku.+ Ova Isilayeli avapulu okuti: “Olie pwoonthwe metuhongolela tyina tukalwa no vomuhoko wa Mbesamii?” Siovaa akumbulula okuti: “O Sundaa memuhongolela.”

19 Komuhuka watyo ova Isilayeli avakatuka avakaonga onthanda valwise o Simbeaa.

20 Ovalume vo Isilayeli avaende vakalwise vomuhoko wa Mbesamii; aveliongo omutete popepi no Simbeaa opo valwe. 21 Pahe vomuhoko wa Mbesamii avatundu mo Simbeaa aveya, onthiki oyo avaipaa ova Isilayeli 22.000. 22 Mahi omaswalali ova Isilayeli aahatili owoma, aeya vali okulionga omutete wokulwa pomphangu opo, ngeetyi valingile onthiki yo tete. 23 Ova Isilayeli avaende ko Mbetele, aveliyave ku Siovaa, avapulu ku Siovaa okuti: “Tyitavela twende vali, tukalwise vana tulilandula navo, vomuhoko wa Mbesamii?”+ Siovaa akumbulula okuti: “Endei kevelwisei.”

24 Ova Isilayeli avaende no ko vomuhoko wa Mbesamii monthiki ya vali. 25 Vomuhoko wa Mbesamii avatundu ko Simbeaa, avekelivasa vali onthiki ya vali avaipaa ova Isilayeli 18.000,+ aveho vana vokwamaneka omitunga. 26 Ovalume vo Isilayeli aveho avaende no ko Mbetele. Ngako vakapumphama, aveliyave unene ku Siovaa;+ monthiki oyo avahali+ atee kwanthikovela, avalingi oviawa viokuyokwa,+ noviawa viombembwa+ kotyipala tya Siovaa. 27 Konyima ovalume vo Isilayeli avakapula ku Siovaa,+ mokonda pononthiki opo Otyikasa Tyomphango tya Huku yotyotyili, oko tyili. 28 Fineya+ omona wa Eliyasale, Eliyasale omona wa Alau pononthiki opo uundapa* potyikasa. Avapulu okuti: “Okuti twende vali tukalwise vana tulilandula navo, ovalume va Mbesamii ine tuyeke-ko?”+ Siovaa akumbulula okuti: “Endei mokonda muhuka ame mandyivepakula pomavoko enyi.” 29 Isilayeli atwala ovalume evepake+ okuliseta no Simbeaa veveyolamene.

30 Ova Isilayeli avakalwisa vomuhoko wa Mbesamii onthiki ya tatu, aveliongo omutete opo valwise o Simbeaa, ngeetyi valinga-lingale.+ 31 Etyi vomuhoko wa Mbesamii vakahonyena nomafwalali ova Isilayeli, avahondovoka unene kepunda-umbo liavo.+ Pahe ngeetyi valinga-lingale, avahimbika okuvelwisa, avaipaela vamwe momatapalo, pomatapalo oo limwe lienda no ko Mbetele, ekwavo lienda no ko Simbeaa, avaipaela motyipembe ovalume 30, ova Isilayeli.+ 32 Vomuhoko wa Mbesamii avati: “Vatila-ko vali kwoonthwe.”+ Mahi ova Isilayeli avati: “Tukondokei no konyima tyina vetulandula avahondovoka mepunda-umbo liavo atwende no momatapalo.” 33 Ovalume vo Isilayeli avatundu ponomphangu mbavo avakaonga omutete ko Mbaale-Tamale, ovalume vo Isilayeli vokweveyolamenene ponthele yo Simbeaa avatundu ponomphangu mbavo avevelwisa. 34 Omaswalali 10.000 ova Isilayeli okwamaneka, aehiki mo Simbeaa, ovilwa avitokota. Mahi vomuhoko wa Mbesamii kavetyii okuti kukahi nokuya ononkhumbi.

35 Siovaa akwatesako ova Isilayeli monthiki oyo avaipaa vomuhoko wa Mbesamii+ 25.100, ovalume aveho vokwamaneka omitunga.+

36 Vomuhoko wa Mbesamii vasokele okuti ova Isilayeli mavatili-ko mokonda vakondoka konyima yova Mbesamii,+ mahi vakondokele konyima mokonda vayumba onthumbi mu vakwavo vayolamena ovanthu vomo Simbeaa.+ 37 Ovalume vokwayolamenene ovanthu vomo Simbeaa aveilwisa liwa-liwa. Aveliyandyana, avanyingila mepunda-umbo aliho avavange ovanthu nomutunga.

38 Ovalume vo Isilayeli velipakelele-mo novalume vokwayolamena ovanthu vomo Simbeaa okuti mavakatula omwihi mepunda-umbo ngako vatalela.

39 Etyi ovalume vo Isilayeli vakondoka konyima movilwa, vomuhoko wa Mbesamii avahimbika okuvelwisa avaipaa ovalume ova Isilayeli 30.+ Avati: “Tukahi vali nokuveipaa ngeetyi twalingile-ale potete.”+ 40 Mepunda-umbo amukatuka omwihi omunyingi-nyingi. Etyi ovalume vomuhoko wa Mbesamii valeuka, avamono omutemo mepunda-umbo ukahi nokwenda no peulu. 41 Ovalume vo Isilayeli avakondoka, ovalume vomuhoko wa Mbesamii avasoyo, mokonda vetyimona okuti ononkhumbi mbavo mbehika-po. 42 Avaende-nkholo ova Isilayeli, okwenda no moluhandya, mahi avahahupu; mokonda ovalume vokukahi nokutundilila mepunda-umbo kaveveyekele. 43 Avakelela vomuhoko wa Mbesamii, avevetaata tyiheveyeke. Aveveniangaulila komutwe wo Simbeaa koutundilo wekumbi. 44 Avaipaa ovalume vomuhoko wa Mbesamii 18.000 aveho omaswalali okwapama.+

45 Ovalume vomuhoko wa Mbesamii avakondoka avakahateka no koluhandya konkhanda yo Limoo.+ Ova Isilayeli avaipaa* ovanthu 5.000 momatapalo avevelandula atee ko Sindoo; avaipaa vali ovalume 2.000. 46 Aveho vomuhoko wa Mbesamii vokwaipaelwe monthiki oyo vena 25.000 ovalume vokwamaneka omitunga,+ aveho omaswalali okwapama. 47 Mahi 600 avaende-nkholo no kotyipembe, tyonkhanda yo Limoo avakala monkhanda yo Limoo onohanyi ononkhwana.

48 Ovalume vo Isilayeli avalwisa vomuhoko wa Mbesamii, avavange aveho vokukala mepunda-umbo nomutunga, tyilinge ovanthu tyilinge ovinyama atyiho tyahupa-mo. Tupu avapake otupia komapunda-umbo aeho valambelele.