Omukanda Wa Vali wa Samuwele

15 Konyima yotyo, Ambisalau eliovolela okatemba kakokwa nononkhambe novalume 50 opo vakale komutwe wae otyo vahateka.+ 2 Ambisalau ankho upinduka-po komuhuka akakala ponthele yetapalo lienda no kombundi yepunda-umbo.+ Apeho tyina kwameya omunthu una omphela atwala kohamba opo ikatetwe,+ Ambisalau umwihana, emupulu okuti: “Ove watunda mepunda-umbo patyi?” Ngwe ankho ukumbulula okuti: “Omuundapi wove o umwe po vomuhoko wo Isilayeli.” 3 Ambisalau umuti: “Etyi wahanda tyaviuka, tyikahi nawa, mahi petupu nawike wohamba matehelela otyitateka tyove.” 4 Ambisalau apopi vali okuti: “Ine nakalele vala wokuteta onomphela motyilongo muno ñgeno hahe! Ñgeno omunthu una otyitateka, okuti hatyo una omphela, uya vala kwaame, ame andyimukwatesako opo ikoyeswe nouviuki.”

5 Tyina omunthu ankho afwena-ko opo elipetamene kwe, Ambisalau utandaveka okuvoko emukwata, emuhipi ombesu.+ 6 Ambisalau ulinga ngootyo ova Isilayeli aveho venda kohamba vahanda okukoyeswa nouviuki; tyina alinga ngootyo, Ambisalau ankho uvaka omitima viova Isilayeli.+

7 Etyi palamba omanima ekwana* Ambisalau apopila ohamba ati: “Ndyeke-vo ndyende ko Hemboloo+ ndyikafwisepo etyi napopila Siovaa. 8 Etyi omuundapi wove eli ko Sesule+ mo Silia wapopilile Huku okuti: ‘Ine ove Siovaa unkhondola ko Selusalei, mandyiave otyiawa kwoove* Siovaa.’” 9 Ohamba aimupopila okuti: “Enda nombembwa.” Pahe akatuka aende noko Hemboloo.

10 Ambisalau atumu ovalavi momihoko aviho viova Isilayeli vekevepopile okuti: “Nga mweiva vala onkhwino yahika kalavandyei okuti: ‘Ambisalau wakala ohamba mo Hemboloo!’”+ 11 Ovalume 200 voko Selusalei ankho vapita na Ambisalau. Oe wevekonga, avaende tyihalungilile natyike, ankho kavetyii etyi tyikahi nokweenda-po. 12 Tyihe-otyo vala, etyi aava ovilikutila, Ambisalau atumu okukaihana Aitofeli+ wokupakela-mo* Ndaviti,+ mepunda-umbo liae lyo Ngilo.+ Omphango ya Ambisalau aihimbika okweenda nawa, ovanthu vokwahula kwe ankho veliyawisa vala.+

13 Omunthu umwe apopila Ndaviti okuti: “Ova Isilayeli vaya noku Ambisalau.” 14 Ndaviti wati vala tyiivee apopila ovaundapi vae aveho vekahi mo Selusalei okuti: “Twendei tukaholame,+ nawike pwoonthwe mahupu ku Ambisalau! Hatekei haa metuvasi, etwetela otyitateka, ahanyepo epunda-umbo aliho nomutunga!”+ 15 Ovaundapi vohamba avemuti: “Atyiho tatekulu ohamba ahanda okulinga, onthwe vaundapi vove matutyilingi.”+ 16 Ohamba ayeende kumwe novanthu aveho vomeumbo liayo mahi aisi-po ononthawa mbayo+ 10 opo vesale meumbo.* 17 Ohamba ayeende aveho ankho veli monyima yayo, avakatalama ko Mbete-Melake.

18 Ovaundapi vae aveho aile navo,* nova Keleta, nova Peletita,+ nova Ngate,+ ovalume 600 vemulandula ankho vatunda ko Ngate,+ ankho veya kohamba otyo ivetala nawa.* 19 Ohamba aitolela Itai+ wo ko Ngate ati: “Omokonda yatyi wiila nonthwe? Kondoka, sala nohamba omphe, ove unthunda-vilongo, wahena kotyilongo tyenyi. 20 Ove wehika vala apa mongulo. Okuti hono tyipondola atwende noove otyo tuhamba-hamba atuho, okwenda oku ndyienda nako, monthiki ndyenda-ko? Kondoka, enda na vakwenyi mulilandula navo, Siovaa ekulinge olwembia olunene, akala omukwatyili kwoove!”+ 21 Itai apopila ohamba ati: “Na Siovaa umwe una omwenyo, noove umwe tatekulu hamba una omwenyo, oku ove wamaende nako, oko ame muundapi wove mandyikakala, tyilinge tyindyetela ononkhia tyilinge tyimpha omwenyo!”+ 22 Ndaviti apopila Itai ati:+ “Naina enda nthele-ina elola.” Itai omu Ngate atauluka omulola kumwe novalume novana ena-vo.

23 Ovanthu aveho motyilongo ankho vekahi nokulila unene, putyina ovo aveho vatauluka omulola, ohamba aisala popepi Nelola lyo Kindoloo;+ ovanthu aveho avatauluka okwenda no ketapalo lyo moluhandya. 24 Sandoke+ nae ankho opo eli kumwe no vomuhoko wa Levii aveho,+ vatyinda Otyikasa+ Tyomphango tya Huku yotyotyili,+ avapake pohi Otyikasa tya Huku yotyotyili. Ambiyatale+ wehika etyi ovanthu aveho vatunda mepunda-umbo, avatauluka elola. 25 Mahi ohamba aipopila Sandoke okuti: “Tyinda-po Otyikasa tya Huku yotyotyili, tyitwala mepunda-umbo.+ Ine ndyipandwa na Siovaa, naame mankhondola mepunda-umbo, andyeke ndyimone vali Otyikasa, na apa tyikala.+ 26 Mahi ine umphopila okuti: ‘Ove hekupandele vali,’ opo andinge etyi tyaviuka komaiho ae.” 27 Ohamba aipopila omunakwa Sandoke okuti: “Ove have mutali?+ Kondoka nombembwa kepunda-umbo. Ove na Ambiyatale kondokei nombembwa, endei nomona wove Aimaasi nomona wa Ambiyatale Sonataa.+ 28 Mandyikevela ponondyapu popepi noluhandya, atee onwe munthuma ondaka.”+ 29 Ovo Sandoke na Ambiyatale avatyindi-po Otyikasa tya Huku yotyotyili avetyikondola ko Selusalei, ngwe ngako vakala.

30 Ndaviti etyi ekahi nokulonda Omphunda* Yomindyambi,+ ankho ukahi nokulila. Ankho kavalele ononkhaku, welikuta komutwe. Aveho ena-vo avelikutu komutwe, tyina valondeka omphunda otyo valila. 31 Ndaviti avemupopila okuti: “Aitofeli nae uli pu vana velipaka kumwe+ na Ambisalau.”+ Ndaviti ati: “Mbambavo Siovaa,+ etyi Aitofeli amapopi* tyikale outyova!”+

32 Tyina Ndaviti ehika pokatanga-tanga komphunda, apa ovanthu vafendela* Huku, avasi-po Husai+ omu Alikita+ opo eli umukevela, wavala omuvalo wae omulaale watanduka, una eheke momutwe. 33 Ndaviti emuti: “Ove ine twenda atuho, momphwilisa vala. 34 Mahi ine ove ukondoka kepunda-umbo, opopila Ambisalau oti: ‘Ame ndyimuundapi wove hamba. Nali omuundapi wa tate yove kohale, mahi pahe ndyimuundapi wove,’+ monkhwatesako otyopola etyi tyamapopi Aitofeli.+ 35 Kumakakala kuna novanakwa, ovo Sandoke na Ambiyatale? Popila Sandoke na Ambiyatale atyiho weiva meumbo liohamba.+ 36 Tala! Kuna vena-ko ovana vavo vevali, Aimaasi+ omona wa Sandoke na Sonataa+ omona wa Ambiyatale, vetuma veye okumphopila atyiho weiva.” 37 Husai, epanga lya* Ndaviti,+ aende, ehiki mepunda-umbo pweetyi Ambisalau ekahi nokunyingila mo Selusalei.