Omukanda Wa Vali wa Samuwele

3 Ovilwa vyo veumbo lya Saulu no veumbo lya Ndaviti viatwaileko ehimbwe; putyina Ndaviti akala tyapama,+ vomeumbo lya Saulu vakala vali unene tyahapamene.+

2 Mononthiki omo Ndaviti wakalele novana ko Hemboloo.+ Otyiveli tyatyo o Aminoo+ omona wa Ainowa+ wo ko Sesiliyeli; 3 wa vali o Kileyambe, omona wa Ambingaili+ omuhepe wa Nambale omu Kalumelu; wa tatu o Ambisalau,+ omona wa Maakaa, Maakaa omona wa Talumai,+ ohamba yo Sesule; 4 wa kwana o Andoniya+ omona wa Hasite; wa tano o Sefatiya omona wa Ambitale; 5 wa pandu o Itileyau, omona wa Engalaa, omukai wa Ndaviti. Ovo ovana va Ndaviti vokwatyitililwe ko Hemboloo.

6 Putyina ankho ovilwa vyo veumbo lya Saulu no veumbo lya Ndaviti vitwalako, Ambinele+ otyo apameka ounene wae meumbo lya Saulu. 7 Saulu wali nonthawa itiwa o Lisipa,+ omona wa Aiyaa. Onthiki imwe Isi-Mbosete+ apulu Ambinele okuti: “Omokonda yatyi walalela nombalehi ya tate?”+ 8 Ambinele anumana unene nonondaka mba Isi-Mbosete, emupulu okuti: “Okuti ame ndyityimbwa tyo Sundaa? Atee hono ndyina olwembia olunene neumbo lya Saulu tate yove na vana elilandula navo, nomapanga ae, hekupakulile pomavoko a Ndaviti. Pahe ove undyihana mokonda yotyivi nalinga nomukai? 9 Huku amonese ononkhumbi etyindinge nonya, ine ame hilingila Ndaviti ngeetyi Siovaa aana ku Ndaviti:+ 10 okupola outumini weumbo lya Saulu apake-ko Ndaviti koutumini opo atumine o Isilayeli no Sundaa, okutuka ko Ndaa atee ko Mbelesemba.”+ 11 Isi-Mbosete ahapopi vali ondaka naike opo akumbulule Ambinele, mokonda wemutila owoma.+

12 Liwa-liwa Ambinele atumu ovatumwa-ndaka ku Ndaviti opo vakapule okuti: “Otyilongo otya-lie?” Ayawisa-ko okuti: “Linga omphango naame, ame mandyilingi atyiho ndyivila* opo ndyiete ova Isilayeli aveho konthele yove.”+ 13 Ndaviti akumbulula okuti: “Tyikahi nawa! Mandyilingi omphango noove. Ndyikwita vala okuti tyina moya kwaame, weheye ohaetele tete Mikale,+ omona wa Saulu.” 14 Ndaviti atumu ovatumwa-ndaka vakapopile Isi-Mbosete+ omona wa Saulu okuti: “Mphe omukai wange Mikale, una wokwakalele omuhikwena wange etyi nakapolele ovikova 100 vyo komapita ova Filisitiya.”+ 15 Isi-Mbosete atumu vakapole Mikale komulume wae, Palitiyeli+ omona wa Laisi. 16 Mahi omulume wae emulandula otyo alila atee ko Mbaulii.+ Ambinele emupopila okuti: “Kondoka keumbo!” Akondoka.

17 Pononthiki mbatyo opo, Ambinele atumu onondaka ombu kovakulu vo Isilayeli: “Pakala-le ehimbwe onwe muhanda Ndaviti akale ohamba. 18 Pahe mutavelei ngohamba, mokonda Siovaa wapopila Ndaviti okuti: ‘Nokuvoko kwove muumbili wange Ndaviti,+ mandyiyovola ovanthu vange ova Isilayeli pomavoko ova Filisitiya, no pomavoko onondyale mbavo ambuho.’” 19 Ambinele apopi no vomuhoko wa Mbesamii.+ Tupu Ambinele aende ko Hemboloo opo akapopie na Ndaviti pokamphengi nokumupopila etyi ova Isilayeli novanthu aveho veumbo lya Mbesamii vahanda okulinga.

20 Etyi Ambinele novalume 20 vapita atee ko Hemboloo ku Ndaviti, Ndaviti alingila otyipito Ambinele novalume ena-vo. 21 Ambinele apopila Ndaviti okuti: “Ndyeke ndyende ndyikaongiye ova Isilayeli aveho ku tatekulu yange ohamba, opo valinge omphango noove, ove mokala ohamba ya atyiho wahanda.”* Ndaviti ayeke Ambinele ende, aende nombembwa.

22 Pononthiki opo, Sowambe nomafwalali a Ndaviti ankho vatunda kovilwa, vapundile ovipuka ovinyingi. Ambinele ankho kekahi vali na Ndaviti ko Hemboloo, mokonda Ndaviti wemuyekele aye nombembwa. 23 Etyi Sowambe+ nomafwalali aeho vehika, avapopila Sowambe okuti: “Ambinele+ omona wa Nele+ weile kohamba, ohamba aimuyeke aye, aende nombembwa.” 24 Sowambe aende kohamba apulu okuti: “Walingila-tyi ngootyo tatekulu? Ambinele weile okupopia noove, omuyeke ende ahupu? 25 Ove wii nawa Ambinele omona wa Nele! Weile vala kuno opo ekuyondye, nokunoñgonoka etyi wapanga okulinga neetyi ukahi nokulinga.”

26 Sowambe atundu pu Ndaviti atumu ovatumwa-ndaka monyima ya Ambinele. Avaende avekemupola konyombo yo Silaa, mahi Ndaviti otyo ehetyii. 27 Etyi Ambinele akondoka ko Hemboloo,+ Sowambe aende nae aike konthele kombundi yepunda-umbo, akatomphole nae pokamphengi. Mahi oko ngako Sowambe emutomena nomutunga meimo ankhi;+ wemulinga ngootyo mokonda waipaele* ondenge yae Asaeli.+ 28 Mahi etyi Ndaviti etyiiva apopi okuti: “Ame nouhamba wange katuvelwa onombei na Siovaa mokonda yohonde+ ya Ambinele omona wa Nele. 29 Omwenyo wae upulwe ku Sowambe+ no vomeumbo lya tate yae. Meumbo lya Sowambe muhakambe omulume nawike uvela otyitokotela,*+ ine uvela otyilunda,+ ine omulume uundapa nomakina yokunyika,* ine omunthu wiipawa nomutunga, ine omunthu una ondyala!”+ 30 Ngootyo Sowambe nondenge yae Ambisai,+ ovo vaipaa Ambinele+ mokonda yeetyi aipaele ondenge yavo Asaeli movilwa+ ko Simbeau.

31 Ndaviti apopila Sowambe novalume ankho ena-vo okuti: “Tandaulei ovikutu vienyi, amuvale onongosa, lilei Ambinele.” Ohamba Ndaviti, nae mwene alandula mo vokwatyinda otyinthandala* pokwenda mohika. 32 Ambinele akapakwa ko Hemboloo; ohamba aililila unene pelangalo lya Ambinele, ovanthu aveho navo avalili. 33 Ohamba aiimbi otyiimbo tyomutambo wa Ambinele aiti:

“Oityi walinga Ambinele wankhia ngotyihayo?

Ove watoka ngomunthu utokeswa novifwanga.”*+

Ovanthu aveho avemulili vali.

35 Ovanthu avatwaila Ndaviti ombolo opo vemuungumanese* mahi Ndaviti aane okuti: “Huku amonese ononkhumbi, etyindinge nonya ine ame ndyilia ombolo ine otyipuka otyikwavo tyina nkhele ekumbi lihenenyingile!”+ 36 Ovanthu aveho avetyimono, avetyipande. Ngeetyi ankho ohamba ilinga-lingale, atyihambukiswa ovanthu aveho. 37 Ngootyo omafwalali aeho nova Isilayeli aveho avetyimono okuti ohamba haeko uvelwa onombei mokonda yononkhia mba Ambinele omona wa Nele.+ 38 Ohamba aipulu ovaundapi vayo okuti: “Onwe kamutyii okuti hono mo Isilayeli mwankhia omulume umwe omunene omutumini?+ 39 Hono ame ndyitupu ononkhono, namphila nalembulwa opo ndyikale ohamba,+ ovalume ovo ovana va Seluya,+ kwaame onondingavivi unene.+ Siovaa akondolele ondingavivi ovivi viayo.”+