Omukanda wo Tete Onohamba
5 Etyi Hilau, ohamba yo ko Tilu,+ etyiiva okuti Salomau wavialekwa akale ohamba opo apinge pomphangu ya he, atumu ovaundapi vae ku Salomau, mokonda Hilau wali epanga lya* Ndaviti.+ 2 Salomau atumu vakapopile Hilau okuti:+ 3 “Ove utyii nawa okuti tate yange Ndaviti ankho kapondola okutunga ondywo yomunkhima wenyina lya Siovaa Huku yae, mokonda yovanthu vemulwisilile konomphangu ambuho atee Siovaa apaka onondyale mbae mombwelo yonomphai mbae.+ 4 Mahi pahe, Siovaa Huku yange wamphululukiswa-po kononthele ambuho.+ Petupu vali nawike undwisa, natyike vali otyivi tyikahi nokumoneka.+ 5 Otyo nahandela okutungila enyina lya Siovaa Huku yange ondywo, ngeetyi Siovaa apopilile tate yange Ndaviti etyi ati: ‘Omona wove, una makapumphama kotyipundi tyoutumini, una mekupingi, oe makatunga ondywo yomunkhima wenyina liange.’+ 6 Pahe tuma ovanthu vanthyokele omisendulu vyo ko Limbanu.+ Ovaundapi vange mavaundapa novaundapi vove, ame mandyifete ondyambi moiti yovaundapi vove. Ove utyii nawa okuti onthwe katutyivili okutyoka omiti ngova Sindone.”+
7 Etyi Hilau eiva onondaka mba Salomau, ahambukwa unene, ati: “Hono Siovaa ahilivikwe, mokonda waavela Ndaviti omona omunongo opo atumine ovanthu ava ovanyingi-nyingi!”*+ 8 Hilau atumu okukapopila Salomau okuti: “Ondaka wanthuma neiiva. Mandyilingi atyiho wahanda, mandyikwavela omavai omusendulu nomavai omungalaviya.+ 9 Ovaundapi vange maveetwala no kombwelo, okwepola ko Limbanu aveetwala kelunga, andyiekwatesa melunga tyakutwa aende no oku ove mondekesa. Tyina amehiki andyiekutulula, ove pahe oetyindi-po, oende nao. Ngondyambi yange, ove mondyavelela vo meumbo liange aveho okulia.”+
10 Hilau aave omavai aeho omusendulu no omungalaviya Salomau ankho ahanda. 11 Ngondyambi, Salomau aavela Hilau ono kolu* 20.000 mbotiliku, mbukale okulia kwo vomeumbo liae, nono kolu 20 mbomulela womundyambi watyo mwene.* Ovio ovipuka Salomau ankho aavela Hilau nima na nima.+ 12 Siovaa aavela Salomau ounongo ngeetyi emupopilile.+ Pahe ovo Hilau na Salomau ankho vena ombembwa, avalingi omphango.*
13 Ohamba Salomau aitaindya ovalume mo Isilayeli aiho, mavemuundapela; ovalume yaovola avatuuka 30.000.+ 14 Ankho utuma ko Limbanu ovanthu 10.000 mohanyi. Vakala ohanyi ike ko Limbanu, onohanyi onombali ankho vakala momaumbo avo. Andonilau+ oe uyunga vana vatumwa vaundapele ohamba. 15 Salomau wali novanthu vemuundapela* 70.000, novaundapi 80.000+ vokuteta omamanya monomphunda,+ 16 tyahavalula ononkhalamutwe 3.300+ ankho vahongolela otyilinga tyovaundapi. 17 Avatete omamanya omanene alanda onombongo ononyingi,+ ngeetyi vatumwa nohamba, opo omalisesu ondywo+ atungwe nomamanya okwaviuka.+ 18 Ovatungi va Salomau, novatungi va Hilau, nova Sembale+ ankho vateta omamanya, otyo vaviukisa omavai nomamanya okutunga ondywo.