Omukanda Wa Vali wa Samuwele
4 Etyi omona wa Saulu Isi-Mbosete,+ eiva okuti Ambinele wankhila ko Hemboloo,+ asosoloka,* ova Isilayeli aveho avatili owoma. 2 Ovalume vevali ankho vatumina ovifwanga viovana va Saulu ovava: umwe o Mbaanaa, omukwavo o Lekambe. Ovana va Limoo, omu Mbeelote womuhoko wa Mbesamii. (Mokonda otyilongo tyo Mbeelote+ ankho tyivalulilwa ku Mbesamii. 3 Ova Mbeelote ankho vakaholama ko Sitaii,+ oko vakala ngo nonthunda-vilongo atee hono.)
4 Sonataa omona wa Saulu+ ankho una omona walemana onomphai.+ Walemana pweetyi ena omanima etano etyi ondaka yokuti Saulu na Sonataa vanyima yehika mo Sesiliyeli.+ Wokumusisa* wemuvelekele-po, akahateka nae, mahi nokwateketa, emutokesa alemana. Enyina liomona oo, o Mefimbosete.+
5 Lekambe na Mbaanaa ovana va Limoo, omu Mbeelote avaende keumbo lya Isi-Mbosete komutenya watokota, ngwe ankho ukahi nokupululukwapo komutenya. 6 Avanyingila meumbo ngatyina vakapola otiliku, avemuvange meimo; pahe Lekambe na una velilandula nae, Mbaanaa,+ avakahateka. 7 Etyi vanyingila meumbo, vavasa Isi-Mbosete uli mondywo, ulangi koula. Avemuvange ankhi; konyima avemutete omutwe. Avatyindi-po omutwe wae avaende otyinthiki atyiho netapalo lyo ko Alambaa. 8 Avatwala omutwe wa Isi-Mbosete+ ko Hemboloo ku Ndaviti, avemupopila okuti: “Ou omutwe wa Isi-Mbosete, omona wa Saulu ondyale yove+ ankho wesuka noove wahanda okukwipaa.*+ Hono Siovaa wakondolela ohamba Saulu novana vae etyi vahanda okulinga tatekulu yange.”
9 Mahi Ndaviti apopila Lekambe na Mbaanaa una velilandula nae, ovana va Limoo omu Mbeelote, eveti: “Na Siovaa umwe una omwenyo, wandyovola* kovitateka,+ 10 etyi umwe eya amphopila okuti: ‘Saulu wankhia!’+ Wasokele okuti mandyihambukwa okwiva ondaka oyo, andyimukwata andyimwipaela+ ko Sikalange. Oyo, oyo ondyambi napele una waetele ondaka oyo! 11 Mandyinumana vali unene andyilingi ngootyo ovalume onondingavivi, vaipaela omulume omuviuki meumbo liae mwene, koula wae! Okuti hipondola okupula ohonde yae kwoonwe,+ kombanda yeheke andyimunyimi-ko?” 12 Ndaviti atumu omafwalali ae veveipae.+ Avevetyoko omavoko nonomphai,+ omalutu avo aveetulika ponthele petangi liomaande ko Hemboloo. Mahi omutwe wa Isi-Mbosete, aveuhihila peendo lya Ambinele ko Hemboloo.