Omukanda wo Tete Onohamba

22 Pakalele omanima etatu otyo ova Silia nova Isilayeli vahalu vali. 2 Menima lya tatu Seosafaa+ ohamba yo Sundaa aende kohamba yo Isilayeli.+ 3 Ohamba yo Isilayeli aipulu ovaundapi vayo okuti: “Kamutyii okuti o Lamote-Sileyande+ otyilongo tyetu? Mahi no ngootyo, twalinga otyinkhe okwitambula kohamba yo Silia.” 4 Ngwe apulu ohamba Seosafaa ati: “Twenda atuho tukalwise o Lamote-Sileyande?” Seosafaa akumbulula ohamba yo Isilayeli okuti: “Ame noove twike vala, ovanthu vange no vove veke vala. Ononkhambe mbange+ o mbove.”

5 Mahi Seosafaa apopila ohamba yo Isilayeli ati: “Nkhele ovola+ okunoñgonoka ondaka ya Siovaa.”+ 6 Pahe ohamba yo Isilayeli ayongiya ovauli, vatuuka 400, aivepulu okuti: “Ndyende ndyikalwise o Lamote-Sileyande, ine nahaye?” Avakumbulula okuti: “Enda, Siovaa mevepakula pomavoko ove hamba.”

7 Seosafaa apulu okuti: “Muno mutupu omuuli wa Siovaa? Nae tumwovolei tutehelele mwe+ ondaka ya Huku.” 8 Ohamba yo Isilayeli aikumbulula Seosafaa aiti: “Nkhele pena omulume umwe tupondola okupula etyi Siovaa+ apopia, mahi ame ndyimuyele,+ mokonda kamphopila natyike otyiwa, upopia vala ovivi.+ Utiwa o Mikaiya omona wa Inilaa.” Mahi Seosafaa ati: “Hamba ove kupondola okupopia otyipuka ngootyo!”

9 Ohamba yo Isilayeli aiihana omuundapi umwe wo mombonge, aimupopila okuti: “Kanyauka,+ kaete Mikaiya omona wa Inilaa.” 10 Pahe ohamba yo Isilayeli nohamba yo Sundaa Seosafaa ankho vepumphi, ou upumphi kotyipundi tyae ou upumphi kotyipundi tyae, vavala ovikutu viavo viouhamba, veli potyipale tyikala kombundi yepunda-umbo lyo Samaliya, ovauli aveho veli nokuulila puvo.+ 11 Sendekiya omona wa Kenaana, elilingila onombinga mbotyivela, ati: “Etyi otyo tyapopia Siovaa, wati: ‘Ove mokavanga* ova Silia nonombinga ombu, ovehanye-ko.’” 12 Ovauli ovakwavo aveho ngatyo vaula ñgoo, avati: “Enda ko Lamote-Sileyande, kwoove mavatili-ko tatekulu; Siovaa mevepakula pomavoko ove hamba.”

13 Pahe omutumwa-ndaka wokwakaihanene Mikaiya emupopila okuti: “Ovauli aveho etyi vapopia o tyouwa wohamba. Onondaka mbove mbukale-vo ngo mbavo, popia etyi tyayemba kouwa+ wohamba.” 14 Mahi Mikaiya ati: “Natukaila umwe Siovaa una omwenyo, ame mandyipopi vala etyi Siovaa amamphopila.” 15 Pahe aende kohamba, ohamba aimupulu aiti: “Mikaiya twenda tukalwise o Lamote-Sileyande, ine twahaye?” Ngwe akumbulula ati: “Enda, kwoove mavatili-ko tatekulu; Siovaa mevepakula pomavoko ove hamba.” 16 Ohamba aimupulu aiti: “Tuñgapi ndyina okukwita waane wahamphopile vali natyike, omphopila vala otyili menyina lya Siovaa?” 17 Emuti: “Ndyeete ova Isilayeli aveho veliyandyana monomphunda,+ uti vala onongi mbehena omunthita.” Siovaa wati: “Vetupu hekulu. Munthu na munthu akondoke nombembwa keumbo liae.”

18 Ohamba yo Isilayeli aipopila Seosafaa aiti: “Ame hetyipopile-ale okuti kapopi natyike otyiwa tyayemba kwaame, upopia vala ovivi?”+

19 Mikaiya apopi vali ati: “Tehelela ondaka ya Siovaa! Ame namona Siovaa kotyipundi tyae+ nomambamba ae ovita vyo keulu, vitai ponthele yae, kokulio no kokumbili.+ 20 Siovaa apulu ati: ‘Olie mayondyo Akambe, opo ende ko Lamote-Sileyande ngako akankhila?’ Atyiti vala ou upopia etyi, ou upopia etyi. 21 Pahe oandyu*+ imwe aiya, aitalama pu Siovaa aiti: ‘Ame mandyimuyondyo.’ Siovaa eipulu ati: ‘Motyilingi ñgeni?’ 22 Ngwe aiti: ‘Mandyende, andyikapaka ondaka yomatutu momulungu wovauli vae aveho.’+ Huku ati: ‘Ove momuyondyo, motyivili umwe okumuyondya. Enda, kalinge etyi wapopia.’ 23 Pahe Siovaa wapaka ondaka yomatutu momilungu viovauli vove aveho,+ mahi mwene Siovaa wapopia okuti tatekulu ove momono onkhumbi.”+

24 Sendekiya omona wa Kenaana afwene pu Mikaiya, emuvete nolukuhi kepanda, ati: “Ñgaa uhanda okuti ononkhono mba Siovaa mbandyeka-po ambuya* okupopila mwoove?”+ 25 Mikaiya emupopila ati: “Ove motyitavela vala monthiki monyingila mondywo yove, okaholama koluhinyi.” 26 Ohamba yo Isilayeli aiti: “Mikaiya mupolei-po apa, mutwalei ku Amoo omunene wo mepunda-umbo, no ku Sowasi omona wohamba. 27 Vepopila uti: ‘Ohamba yati: “Pakei omulume oo mokalavoso,+ amumupa-apa vala katutu ombolo nomaande atee ame ndyikondoka nombembwa.”’” 28 Mahi Mikaiya ati: “Ine ove ukondoka nombembwa, opo nkhwali ha Siovaa-ko wapopia na ame.”+ Tupu ati: “Amuho-amuho mutyiivite!”

29 Ohamba yo Isilayeli na Seosafaa ohamba yo Sundaa, avainduka ko Lamote-Sileyande.+ 30 Ohamba yo Isilayeli aipopila Seosafaa aiti: “Mandyiliimbilisa andyende movilwa, mahi ove vala movikutu viove viohamba.” Ohamba yo Isilayeli ailiimbilisa,+ aiyende movilwa. 31 Ohamba yo Silia yatumine vomatemba ae ovilwa 32 eveti:+ “Mwahalwisei vali nawike, tyilinge omunene tyilinge omututu, lwisei vala ohamba yo Isilayeli.” 32 Vomatemba ovilwa vati vala monee Seosafaa, avati: “Tyotyili umwe ohamba yo Isilayeli oyo una!” Avaviuku kwe vemulwise. Seosafaa aulula onkhu veye vemuhukulule. 33 Etyi vomatemba ovilwa vetyimona okuti hae-ko ohamba yo Isilayeli, ambutalama ambehemutaata vali.

34 Mahi omulume umwe ayahe nonkhondyi yae, ohevo aiponyokela* mohamba yo Isilayeli, aimutomena apa pahonyena ovivela viotyikutu tyae tyondyakulilo. Pahe ohamba aipopila omwomboli wetemba liae aiti: “Kondoka, mphole movilwa,* navangwa omapita.”+ 35 Ovilwa avitokota unene monthiki oyo, avatalameka ohamba ketemba liae liovilwa onthiki aiho, tyapilukila kova Silia. Ohonde yatunda potyipute tyayo, aimomena ketemba liovilwa, tyina tyiti kokangulohi ainyimi.+ 36 Etyi ekumbi likahi nokukanyingila, akwivala omunthu walaveleya momafwalali wati: “Munthu na munthu aye kepunda-umbo liae! Munthu na munthu aye kotyilongo tyae!”+ 37 Etyi ohamba yanyima, aveitwala ko Samaliya, ngako vekeipaka. 38 Etyi vakoha etemba liovilwa popepi netangi lyo Samaliya, ovimbwa avityape ohonde yae, omakunga ngamo elikoha,* ngeetyi Siovaa apopile.+

39 Ovipuka ovikwavo viehipululo lya Akambe, ovipuka aviho alinga, nonondywo mbokwatungwa* nomayo ondyamba,+ nomapunda-umbo aeho atunga, kaviahonekelwe momukanda womahipululo o pononthiki mbonohamba mbo Isilayeli? 40 Akambe akapululukwa-po nonombwale mbae;+ omona wae Akasiya+ emupingi kovipundi.

41 Seosafaa+ omona wa Asa wakalele ohamba yo Sundaa menima lya kwana Akambe ohamba yo Isilayeli eli kovipundi. 42 Seosafaa wali nomanima 35 etyi akala ohamba, atumina omanima 25 mo Selusalei. Ina utiwa o Asumba omona wa Sili. 43 Atwalako okweendela mondyila ya Asa+ tate yae. Kayapukile-mo, walingile umwe etyi tyaviuka komaiho a Siovaa.+ Mahi onomphangu mbukola mbaya peulu+ kambahanyenwe-po, ovanthu opo nkhele vaavela ovilikutila, tupu valingila-po ovilikutila viokutunda omwihi. 44 Seosafaa wali nombembwa nohamba yo Isilayeli.+ 45 Ovipuka ovikwavo viehipululo lya Seosafaa, ovipuka ovinene alingile, novilwa viae, kaviahonekelwe momukanda womahipululo o pononthiki mbonohamba mbo Sundaa? 46 Tupu motyilongo wanyimine-mo ovalume valala novalume vakwavo+ mondywo ya Huku vokwahupile-po pononthiki mba Asa tate yae.+

47 Mo Endoo+ pononthiki opo mutupu ohamba, omutumini wo mepunda-umbo oe ulinga ngohamba.+

48 Seosafaa tupu watumine onombapolo mboko Talisi* mbende ko Ofili okukapola oolu,+ mahi ambuhehiki mokonda mbanyingilile kohi momaande etyi mbati ko Esioo-Sembele.+ 49 O pononthiki opo, Akasiya omona wa Akambe apopilile Seosafaa ati: “Ovaundapi vange vende novaundapi vove konombapolo,” mahi Seosafaa ehetavela.

50 Seosafaa akapululukwa-po nonombwale mbavo, akapakwa konombwale mbavo+ Kepunda-umbo lya he-mbwale yae Ndaviti; omona wae Seolau,+ emupingi kovipundi.

51 Akasiya+ omona wa Akambe, wakalele ohamba yo Isilayeli ko Samaliya menima 17 Seosafaa ohamba yo Sundaa eli kovipundi, atumina mo Isilayeli omanima evali. 52 Walingile ovipuka ovivi komaiho a Siovaa eheviyeke, aendela mondyila ya he+ na ina,+ no mondyila ya Selombowau omona wa Nembate, una walingisisile o Isilayeli onkhali.+ 53 Walingilile Mbaale+ elipetamena-po ku Mbaale, anumanesa Siovaa, Huku yo Isilayeli,+ nga he.