Omukanda wa Vali Onohamba
2 Pweetyi Siovaa ehungi kokutwala Iliya+ meulu notyipepe,+ Iliya na Eliseu+ avatundu ko Silingale.+ 2 Iliya apopila Eliseu okuti: “Sala pano mbambavo mokonda Siovaa wanthuma ko Mbetele.” Mahi Eliseu emukumbulula okuti: “Na Siovaa umwe una omwenyo noove tatekulu una* omwenyo, ame himesala.” Avaende aveho ko Mbetele.+ 3 Ovana vovauli* vo ko Mbetele avaende ku Eliseu avemupulu okuti: “Ove utyii okuti hono Siovaa matwala tatekulu yove, onkhalamutwe yove?”+ Ngwe akumbulula okuti: “Ame ndyityii-ale. Muti vala filuu.”
4 Iliya pahe emupopila okuti: “Eliseu sala pano mbambavo mokonda Siovaa wanthuma ko Selikoo.”+ Mahi ngwe ati: “Na Siovaa umwe una omwenyo noove tatekulu una* omwenyo, ame himesala.” Avaende aveho ko Selikoo. 5 Ovana vovauli vo ko Selikoo avaende ku Eliseu avemupulu okuti: “Ove utyii okuti hono Siovaa matwala tatekulu yove, onkhalamutwe yove?” Ngwe akumbulula okuti: “Ame ndyityii-ale. Muti vala filuu.”
6 Iliya emupopila okuti: “Sala pano mbambavo mokonda Siovaa wanthuma ko Solondau.” Mahi ngwe ati: “Na Siovaa umwe una omwenyo noove tatekulu una* omwenyo, ame himesala.” Aveho avatwala-ko okwenda. 7 Ovana 50 vovauli avevelandula otyo vatalela kokule etyi vatalama aveho vevali po Solondau. 8 Iliya akwata otyinyanga tyae*+ etyiwingi avete natyo komaande aeliyapuka, amwe aende no kokumbili omakwavo aende no kokulio. Aveho vevali avayauka ondongi yakukuta.+
9 Etyi vayauka Iliya apopila Eliseu okuti: “Popia oityi ndyina okukulingila tyina nkhele neheneende.” Eliseu ati: “Mphevo ononthele onombali+ mbononkhono Huku ekwavela.”+ 10 Ngwe akumbulula okuti: “Ove waita otyipuka tyalema. Ine umona tyina mandyitwalwa, etyi waita motyipewa, mahi ine kumono, kumetyipewa.”
11 Pweetyi vekahi nokweenda nokutomphola, liwa-liwa akuya etemba liotupia nononkhambe+ mbotupia, avayapulwa pokati vevali. Iliya atwalwa meulu notyipepe.+ 12 Etyi Eliseu etyimona eliyavela, ati: “Tatiei, tatiei! Etemba lyo Isilayeli novanthu vokweendela kononkhambe!”+ Etyi ehemweete vali akwata ovikutu viae evitandula pokati.+ 13 Konyima, apolo-po otyinyanga+ tya Iliya tyemutoka, akondoka atalama ponthele yondongi yo Solondau. 14 Eliseu avete komaande notyikutu tya Iliya tyemutoka, ati: “Siovaa Huku ya Iliya uli-pi?” Etyi aveta komaande aeliyapuka pokati, amwe aende no kokumbili omakwavo aende no kokulio, pahe ayauka.+
15 Etyi ovana vovauli vo ko Selikoo vamonena Eliseu kokule, avati: “Ononkhono mba Iliya mbeya ku Eliseu.”+ Avaende kwe avelipetamena kotyipala tyae. 16 Avemupopila okuti: “Pano povaundapi vove pena ovalume 50 vafwapo. Mbambavo veyeka vaye vakataindye tatekulu yove. Hamwe Siovaa wemutyinda-po nononkhono mbae* ekemuyumba komphunda imwe ine hamwe omomulola.”+ Mahi ngwe ati: “Au mwehevetumei.” 17 Mahi, mokonda ankho vena vala nokumwiita, atyimulingi navi evepopila okuti: “Naina vetumei.” Ngootyo avatumu ovalume 50 vekemutaindye ononthiki ononthatu mahi avehemuvasi. 18 Pahe avakondoka ku Eliseu, uli ko Selikoo.+ Evepopila okuti: “Ame hemupopilile-ale okuti mwahayei?”
19 Etyi pakala, ovalume vomepunda-umbo avapopila Eliseu okuti: “Tatekulu ove utyeete okuti epunda-umbo likahi pomphangu ikahi nawa+ mahi omaande kaekahi nawa, eheke kalikwata ovikuna.”* 20 Evepopila okuti: “Pakei omongwa pokalindo okape amuweeta kuno.” Avemutwaila-o. 21 Aende pondyivi-ndyivi yomaande, ayumbu-po omongwa+ ati: “Siovaa wati: ‘Omaande aa mandyielingi nawa. Kamaakaeta vali ononkhia nokukalesa ovanthu tyehena olutyito.’”* 22 Omaande oo ekahi nawa atee hono, ngeetyi tyapopile Eliseu.
23 Atundu opo aende no ko Mbetele. Pweetyi ekahi nokwenda, mepunda-umbo amutundu ovana vamwe ovakwendye, avemulingi omukwele+ otyo vati: “Pita wepela! Pita wepela!” 24 Aleuka konyima evetale, eveteyela onkhano menyina lya Siovaa. Akuya omahambaungu evali+ atunda motyiteta aali-po ovana 42 povana ovo.+ 25 Etyi Eliseu atunda opo aende no Komphunda yo Kalumelu,+ akondoka ko Samaliya.