Omukanda wa Vali Onohamba

18 Menima lya tatu Oseya+ omona wa Elaa ohamba yo Isilayeli eli nokutumina, Isekiya+ omona wa Akasi+ ohamba yo Sundaa akala ohamba. 2 Wali nomanima 25 etyi akala ohamba, atumina omanima 29 mo Selusalei. Ina utiwa o Ambi* omona wa Sakaliya.+ 3 Walingile etyi tyaviuka komaiho a Siovaa+ ngeetyi Ndaviti he-mbwale yavo alingile.+ 4 Wahanyene-po onomphangu mbukola mbaya peulu,+ atukaula-po onomphandyi mbukola, ateye-po otyipandyi tyikola.*+ Tupu atipaula onyoka yotyitasu Mwisesi alingile+ mokonda atee pononthiki opo ova Isilayeli ankho veilingila ovilikutila viomwihi, veiihana okuti otyilolo tyonyoka yotyivela otyitasu.* 5 Isekiya wayumbile onthumbi mu Siovaa+ Huku yova Isilayeli. Kakwakalele nawike welifwa nae ponohamba mbo Sundaa, tyilinge ombu mbatetekelele kwe tyilinge ombu mbalandulile kwe. 6 Ankho ukakatela mu Siovaa,+ kayekele-po okumulandula. Watwaileko okwendela movitumino Siovaa aavelele Mwisesi. 7 Siovaa ankho una-e. Ovipuka aviho ankho alinga uvilinga nounongo. Waanyene ohamba yo Asilia, ehetavela okuyuundapela.+ 8 Tupu waipaele ova Filisitiya+ okutuka ko Ngasa novilongo viayo, ahimbikila ketala liomulavi atee kepunda-umbo liokwapama.*

9 Menima lya kwana ohamba Isekiya eli nokutumina, menima lya pandu-vali Oseya+ omona wa Elaa ohamba yo Isilayeli eli nokutumina, Salumanesele ohamba yo Asilia eya okulwisa o Samaliya elisete nayo, eipake pokati.+ 10 Aveitambula+ etyi palamba omanima etatu. O Samaliya veitambula menima lya pandu Isekiya eli nokutumina, enima lya tyive Oseya ohamba yo Isilayeli atumina. 11 Pahe ohamba yo Asilia aitwala ova Isilayeli koukonde+ ko Asilia, aivepake ko Alaa no ko Hambole, ponthele pondongi Ngosaa no momapunda-umbo ova Mendia.+ 12 Valingwa ngootyo mokonda kavetavelele ondaka ya Siovaa Huku yavo, vatwaileko okuhafwisapo omphango Yae neetyi Mwisesi omuundapi wa Siovaa evetumine.+ Avehemutehelela nii okumutavela.

13 Menima 14 ohamba Isekiya eli kovipundi, Senakelimbe ohamba yo Asilia+ eya okulwisa omapunda-umbo aeho okwapama omo Sundaa, eetambula-ko.+ 14 Isekiya ohamba yo Sundaa, atumu ondaka kohamba yo Asilia ko Lakisi okuti: “Napengesa. Tunda motyilongo tyange, mandyikwavela etyi moiti.” Ohamba yo Asilia aiiti Isekiya ohamba yo Sundaa afete elilimu onotalendu* 300 mbopalata nonotalendu 30 mboolu. 15 Isekiya emwavela opalata aiho ankho ili mondywo ya Siovaa no momalumono omondywo yohamba.*+ 16 Pononthiki opo, Isekiya ohamba yo Sundaa apolo-po* omapito ondywo+ ya Siovaa nomiti viokukwata epito vina ohamba Isekiya ahotele,*+ evitumu kohamba yo Asilia.

17 Ohamba yo Asilia pahe aitumu Talataa* na Lambe-Sali,* na Lambisakee* kumwe nomafwalali omanyingi eli ko Lakisi+ aye ku Isekiya ko Selusalei.+ Avaende ko Selusalei, avatalama ponthele pomukungu wetangi liomaande liokwaya peulu likala metapalo lyo kepia liomukohi.+ 18 Etyi vaihana ohamba iye kuvo, akuya Eliyakii+ omona wa Hilikiya onkhalamutwe yeumbo* na Sembina+ omuhoneki, nomuhipululi Sowaa omona wa Asafe.

19 Lambisakee evepopila ati: “Popilei Isekiya muti: ‘Ohamba onene, etyi otyo tyapopia ohamba onene yo Asilia yati: “Opi ove wayumba onthumbi?+ 20 Ove uti: ‘Ame ndyina ounongo wokulwa, ndyina ononkhono mbokutyilinga.’ Mahi ombo onondaka vala, utupu-ale etyi molingi. Olie ove wayumba onthumbi, etyi walinga omahuku okunthyitukila-po?+ 21 Tala! Ove wayumba onthumbi motyingenge, tyina omunkhia, o Isitu+ otyingenge tyitoma peke lya una uliyeeka mutyo, atyitiula-po. Ongootyo Falaoo ohamba yo Isitu alinga vana vayumba onthumbi mwe. 22 Onwe mumphopila okuti: ‘Twayumba onthumbi mu Siovaa Huku yetu,’+ ha nomphangu mbae mbukola mbaya peulu nomitala viae viovilikutila Isekiya ahanya-po,+ apopila o Sundaa no Selusalei okuti: ‘O komutala ou wovilikutila wo Selusalei+ oko muna okwikila konongolo?’”’ 23 Pahe fiyalei na tatekulu yange ohamba yo Asilia: mandyikwavela ononkhambe 2.000, ove pahe taindya ovalume mavaendela kononkhambe ombo ambuho, ndyitale ine una-vo.+ 24 Oñgeni ove motyivili okutaata atee umwe omutumini wa tatekulu yange omututu vali, tyina ove uyumba onthumbi mu vana vaendela kononkhambe no komatemba ovilwa o Isitu? 25 Pahe okuti neya umwe vala okulwisa omphangu ei ndyiihanye-po tyahatuminwe na Siovaa? Siovaa mwene oe wamphopila okuti: ‘Enda kalwise otyilongo etyi, otyihanye-po.’”

26 Eliyakii omona wa Hilikiya na Sembina,+ na Sowaa avapopila Lambisakee+ okuti: “Tatekulu popia-vo novaundapi vove melaka lyo Alamaiku,*+ mokonda elaka olio tuliiva. Wahapopie noonthwe melaka liova Sundaa, mokonda ovanthu vekahi kotyimato+ oko vetyiivite.” 27 Mahi Lambisakee evepopila ati: “Okuti tatekulu yange watuma vala okupopila onondaka ombu tatekulu yove, noove? Tupu katumine okumbupopila ovanthu ava vepumphi kombanda yotyimato, mavakalia omatwii avo mwene avakanwa omahu avo mwene, kumwe noonwe?”

28 Pahe Lambisakee atalama, apopila peulu melaka liova Sundaa okuti: “Tehelelei onondaka ombu mbohamba onene, ohamba yo Asilia.+ 29 Etyi otyo tyapopia ohamba, yati: ‘Mwahakembwei na Isekiya, mokonda ketyivili okumuyovola pomavoko ange.+ 30 Isekiya ehemuhindile okuyumba onthumbi mu Siovaa, emupopila okuti: “Siovaa tyotyili metuyovola, kamayeke epunda-umbo eli lipakulwe peke liohamba yo Asilia.”+ 31 Mwahatehelelei ku Isekiya, mokonda ohamba yo Asilia yati: “Ovolei okukala nombembwa naame, amulipakula kwaame opo munthu na munthu akalie mwene komuti wae wonouva no komukuyu wae mwene, akanwa omeva omonyombo yae mwene 32 atee ndyiya, andyimutwala kotyilongo+ tyikahi ngo tyenyi, otyilongo tyovilia tyina ovinyu omphe, otyilongo tyokulia tyina omapia omiti vionouva, otyilongo tyokuna omindyambi nowiki. Onwe mamutwalako nomwenyo, amuhankhi. Muhatehelelei ku Isekiya ukahi nokumukemba tyina ati: ‘Siovaa metuyovola.’ 33 Okuti pena o huku imwe yovanthu vovilongo yayovola otyilongo tyayo peke liohamba yo Asilia? 34 Ono huku mbo Hamate+ no Alupande mbuli-pi? Ono huku mbo Sefalavaii+ nombo Hena nombo Iva mbuli-pi? Okuti mbayovola o Samaliya pomavoko ange?+ 35 Pono huku mbovilongo, oipi yetyivilile okuyovola otyilongo tyayo pomavoko ange? Pahe Siovaa oe mayovola o Selusalei peke liange?”’”+

36 Mahi ovanthu avati filuu, avehemupopila ondaka naike yokumukumbulula, mokonda otyitumino tyohamba tyati: “Muhemukumbululei.”+ 37 Pahe Eliyakii omona wa Hilikiya onkhalamutwe yeumbo* na Sembina omuhoneki nomuhipululi Sowaa omona wa Asafe, avaende kohamba Isekiya tyavala ovikutu viatandauka, avemupopila onondaka mba Lambisakee.