Omukanda wa Vali Ehipululo
10 Lombowau aende ko Sikei,+ mokonda ova Isilayeli aveho vaile ko Sikei opo vekemulinge ohamba.+ 2 Etyi Selombowau+ omona wa Nembate etyiiva (nkhele ankho uli ko Isitu, waile-nkholo mokonda yohamba Salomau akakala ko Isitu)+ ko Isitu atundu-ko. 3 Pahe avatumu okukemwihana. Selombowau nova Isilayeli aveho avaende ku Lombowau, avati: 4 “Tate yove walemesile okanga yetu.+ Mahi ine ove upepukisa ovilinga tate yove alemesile, nokanga yalema* atenthekele kwoonthwe, opo matukulingila.”
5 Ngwe evepopila okuti: “Endei, tyina pamalambe ononthiki ononthatu amuya.” Ngootyo, ovanthu avaende.+ 6 Ohamba Lombowau akapula kovakulu* vapakaililemo tate yae Salomau etyi nkhele ena omwenyo. Evepulu ati: “Nkhele nkhwatesei-ko, oityi mandyikumbulula ovanthu ava?” 7 Avemukumbulula okuti: “Tatekulu ine hono ulinga omuundapi wovanthu ava, olingi etyi vekwiita oveavela ekumbululo likahi nawa, apeho mavakala-kala ovaundapi vove.”
8 Mahi ehetavela etyi apakelwa-mo novakulu,* akaovola ovakwendye, omakula ae, pahe valinga ovakwatesiko vae.+ 9 Evepulu ati: “Nkhele nkhwateseiko, oñgeni matukumbulula ovanthu ava, vati: ‘Pepukisa okanga tate yove etutentheka’?” 10 Ovakwendye ovo omakula ae, avemupopila okuti: “Ovanthu vokwekupopila okuti: ‘Tate yove walemesa okanga yetu, tatekulu ipepukisa,’ vepopila uti: ‘Ame mandyiilemesa vali tyipona etyi tate alinga.* 11 Tate wemupakele okanga yalema, mahi ame mandyiilemesa vali. Tate wemumonesile ononkhumbi nongola, mahi ame mandyimumonesa ononkhumbi nongola yomankhwenya.”
12 Atyiti na Selombowau novanthu aveho avaende ku Lombowau monthiki ya tatu, aveketavela kohamba yevepopilile okuti: “Kondokei kuno nga palamba ononthiki ononthatu.”+ 13 Mahi ohamba aivekumbulula omapita. Mokwalinga ngootyo, ohamba Lombowau waanya etyi apakelwa-mo novakulu.* 14 Alandula etyi ovakwendye vemupopila ati: “Ame mandyilemesa okanga yenyi, mandyiilemesa vali. Tate wemumonesile ononkhumbi nongola, mahi ame mandyimulingi-tyo nongola yomankhwenya.” 15 Mahi ohamba ayehetavela etyi ovanthu vapopia, mokonda etyi tyili nokulingwa o Huku yotyotyili+ wetyilinga, tyaenda ngootyo opo onondaka Siovaa atumine Aiya+ omu Silo, apopilile Selombowau omona wa Nembate mbufwiswepo.
16 Mokonda ohamba kayetavelele kova Isilayeli, ovanthu aveho aveipopila avati: “Ku Ndaviti onthwe tupolako-tyi? Komona wa Sesee, onthwe tutupu-ko epingo! Onwe va Isilayeli kondokei kovika-huku vienyi! Ove Ndaviti, mwene pahe yunga eumbo liove.”+ Ova Isilayeli aveho avakondauka komaumbo* avo.+
17 Mahi Lombowau atwalako okutumina ova Isilayeli vakala momapunda-umbo o Sundaa.+
18 Pahe Lombowau evetumu Handolau+ omuyungi wo vokuundapa movilinga vialema, mahi ova Isilayeli avemwiipaa nomamanya. Ohamba Lombowau avelama ketemba liae liovilwa, akaholama ko Selusalei.+ 19 Ova Isilayeli avatyitukila-po eumbo lya Ndaviti atee na hono.