Omukanda wa Vali Ehipululo
17 Omona wae Seosafaa+ akala ohamba emupingi kotyipundi. Apameka outumini wae, aupame vali ko wo Isilayeli. 2 Apake omafwalali momapunda-umbo aeho okwapama mo Sundaa, no motyilongo tyo Sundaa, no momapunda-umbo o Efalaii, tate yae Asa, apundile.+ 3 Siovaa watwaileko okukala na Seosafaa, mokonda waendelele monondyila mbo kohale mbomukwaukulu wae Ndaviti.+ Kakaovolele Mbaale. 4 Ankho woovola Huku ya tate yae+ weendela* movitumino viae. Kalandulile ovituwa vyo Isilayeli.+ 5 Siovaa wapamekele ouhamba ankho uli pomavoko+ a Seosafaa. Ova Sundaa aveho vemwavelele ovipuka, akala nolumono olunene, nomunkhima.+ 6 Wakolele omutima pokweendela monondyila mba Siovaa, atee umwe mo Sundaa ahanye-mo onomphangu mbokwaya peulu,+ novipandyi vikola.*+
7 Menima lya tatu lioutumini wae, waihanene ovakwatesiko vae, Mbeni-Haili, na Ombandiya, na Sakaliya, na Netaneli na Mikaiya opo valongese momapunda-umbo o Sundaa. 8 Avaende novana ava va Levii: Semaiya, na Netaniya, na Sembandiya, na Asaeli, na Semilamote, na Seyonataa, na Andoniya, na Tombiya, na Tombe-Andoniya. Tupu vaile novanakwa,+ Elisama na Seolau. 9 Avatyindi omukanda Wovitumino vya Siovaa,+ avahimbika okulongesa mo Sundaa. Avaenda-enda momapunda-umbo aeho o Sundaa, otyo valongesa ovanthu.
10 Onohamba ambuho mbovilongo vieliseta no Sundaa, ambutili owoma Siovaa, ambahalwisa Seosafaa. 11 Ova Filisitiya ankho vaetela Seosafaa oviawa, nonombongo mbelilimu. Ova Alambe vaetelele Seosafaa onongi ononthwei mbuna 7.700, novinkhombo ovitwei vina 7.700 vapola moviunda viavo.
12 Seosafaa atwalako okukala omunene,+ tupu atwalako okutunga onomphangu mbokwapama,+ nomapunda-umbo ovilimba+ mo Sundaa. 13 Walingile ovilinga ovinene momapunda-umbo o Sundaa, ankho una omafwalali, novakwa-vita vokwapama mo Selusalei. 14 Ovakwa-vita ovo vaonganekelwe ovikundyi-ovikundyi, momaumbo nomaumbo: Ko Sundaa kwali ononkhalamutwe mbovityita ekwii, onkhalamutwe Andinaa novakwa-vita 300.000 vokwapama.+ 15 Tupu, ankho uhongolela onkhalamutwe Seowanaa. Seowanaa ankho una ovakwa-vita 280.000. 16 Tupu ankho uhongolela Amasiya omona wa Sikili, weliavele opo aundapele Siovaa. Amasiya ankho una ovakwa-vita 200.000 vokwapama. 17 Ku Mbesamii+ ankho kuna Eliyanda omukwa-vita umwe wokwapama. Ankho una ovalume 200.000 vokumaneka ononkhondyi nonondyakulilo.+ 18 Tupu ankho uhongolela Seosambande. Seosambande ankho una ovalume 180.000 vafwapo opo vende kovilwa. 19 Ovo aveho ankho vaundapela ohamba, kumwe na vana ohamba ankho yapaka momapunda-umbo okwapamekwa mo Sundaa aiho.+