Omukanda wa Vali Ehipululo

25 Amasiya wali nomanima 25 etyi akala ohamba, atumina omanima 29 mo Selusalei. Ina o Seoandaa, omu Selusalei.+ 2 Walingile etyi tyaviuka komaiho a Siovaa, mahi ketyilingile nomutima auho. 3 Wati vala pamekee ouhamba wae, aipaa ovaundapi vae vokwaipaele ohamba, tate yae.+ 4 Mahi ovana vatyo eheveipaa, mokonda walingile etyi tyipopia Otyitumino tyo momukanda wa Mwisesi, omu Siovaa atuma okuti: “Ovohe kavapondola okunkhia mokonda yovana vavo, ovana kavapondola okunkhia mokonda yovohe. Mahi munthu na munthu unkhila onkhali yae mwene.”+

5 Amasiya aongiya o Sundaa aiho, eveonganeka okutalela konohongoi, ononkhalamutwe mbovityita ekwii, no mbotyita vo Sundaa aiho no Mbesamii.+ Ahoneka vokuna omanima 20 okwenda nokomutwe,+ avasi-mo ovakwa-vita vena 300.000 vokwalongeswa nawa okwenda* movilwa, vetyivila okuyumba eonga, nokuyakula nondyakulilo onene. 6 Tupu alande ko Isilayeli ovakwa-vita vokwapama vena 100.000 nonotalendu* 100 mbopalata. 7 Mahi omunthu umwe wa Huku yotyotyili, eya kwe, emupopila okuti: “Ove hamba, wahaye nomafwalali o Isilayeli, mokonda Siovaa wayeka-po o Isilayeli,+ kekahi nomu Efalaii nawike. 8 Enda vala ove mwene. Kola omutima, olu. Huku yotyotyili upondola okukutokesila ponthele yondyale, mokonda Huku utyivila okukukwatesako,+ nokutokesa.” 9 Amasiya apopila omunthu wa Huku yotyotyili okuti: “Pahe onotalendu 100 naavela omafwalali o Isilayeli, mambulingwa ñgeni?” Omunthu wa Huku yotyotyili ati: “Siovaa upondola okukwaavela vali etyi tyilamba pu otyo.”+ 10 Ngootyo, Amasiya akondola omafwalali okwatundile ko Efalaii, evekondola kotyilongo tyavo. Mahi, avanumanena unene o Sundaa, avakondoka kotyilongo tyavo nonyengo onene.

11 Amasiya apame omutima, ahongolela omafwalali ae mwene atee Kelola Liomongwa,+ aipaa ovalume vena 10.000 vo ko Seili.+ 12 Ovalume vo Sundaa avakwata ovanthu vena 10.000. Avevetwala keulu-ulu lionkhanda, aveveyumbu pohi. Aveho avanyanyaukila mombwelo. 13 Mahi omafwalali ana Amasiya akondolele kovilwa,+ aakalwisa omapunda-umbo o Sundaa, okuhimbikila ko Samaliya+ atee ko Mbete-Oloo.+ Vaipaele ovanthu vena 3.000, avapundu ovipuka ovinyingi.

14 Mahi, etyi Amasiya akondoka, pokwakaipaele ova Endoo, aetelela ovika-huku viovalume vo ko Seili. Elipakela-vio, avikala ono huku mbae,+ ahimbika okuvifenda, nokuvilingila omwihi wotyilikutila. 15 Mokonda yotyo, Siovaa anumanena unene Amasiya, atumu omuuli umwe wemupopilile okuti: “Omokonda yatyi ove walandulila ovika-huku viovanthu vovilongo, viahayovolele ovanthu vavio pomavoko ove?”+ 16 Tyina omuuli nkhele ekahi nokupopia, ohamba aiti: “Okuti ove umwe twaavela otyilinga tyokupakaila-mo ohamba?+ Uti filuu!+ Wahanda okunkhia?” Omuuli nkhele ati filuu, pahe ayawisa-ko ati: “Ndyityii okuti, Huku watokola okukuhanya-ko mokonda yeetyi walinga, neetyi wehetavelele etyi napopia.”+

17 Etyi Amasiya Ohamba yo Sundaa aovola vokumupakaila-mo, atumu omutumwa-ndaka ku Seowasi omona wa Seowakasi, Seowakasi omona wa Seuu, ohamba yo Isilayeli, ati: “Endyu! Tuhonyene tulwe.”*+ 18 Seowasi ohamba yo Isilayeli atumu okukapopila Amasiya ohamba yo Sundaa okuti: “Otyinkhondo tyimwe tyomakete mo Limbanu tyatuma okukapopila omusendulu wo mo Limbanu okuti: ‘Mphevo omona wove anepwe nomona wange.’ Mahi otyinyama tyimwe tyo mohika mo Limbanu tyakwata apa pena otyinkhondo tyomakete atyityiliata-liata. 19 Ove wati: ‘Tala! Nahanya-po* o Endoo.’+ Otyo omutima wove welitumbilikila, wahanda okunkhimanekwa. Kala vala meumbo liove.* Wahanda okulietela ononkhumbi opo utoke, otwailila o Sundaa?”

20 Mahi Amasiya ehetavela,+ mokonda tyapangwale na Huku yotyotyili. Wahandele okuvepakula pomavoko ondyale,+ mokonda valandula ovika-huku vyo Endoo.+ 21 Seowasi Ohamba yo Isilayeli, elipake mondyila. Avahonyenena na Amasiya Ohamba yo Sundaa ko Mbete-Seme+ epunda-umbo limwe lyo Sundaa, ngako valwila. 22 Ova Sundaa avatili-ko kova Isilayeli avakahateka no komaumbo avo.* 23 Seowasi ohamba yo Isilayeli akwate-la Amasiya ko Mbete-Seme ohamba yo Sundaa, omona wa Seowasi, Seowasi omona wa Seowakasi.* Pahe emutwala ko Selusalei, atiula emphana lina onokovandu* 400 motyimato tyo Selusalei, liahimbikilile Kombundi ya Efalaii+ alikehika Kombundi yo Ponthomba.+ 24 Atyindi-po oolu aiho, nopalata, novityuma aviho viali mondywo ya Huku yotyotyili, neevi ankho vina* Ombende-Endoo, nomalumono o meumbo liohamba,*+ nononkhwatwa. Pahe akondoka ko Samaliya.

25 Etyi Seowasi+ omona wa Seowakasi ohamba yo Isilayeli+ anyima, Amasiya+ omona wa Seowasi ohamba yo Sundaa, nkhele akala-ko vali omanima 15. 26 Ovipuka ovikwavo viehipululo lya Amasiya, okuhimbikila konthyimbi atee konthyulilo, okuti kaviahonekelwe Momukanda Wonohamba mbo Sundaa no mbo Isilayeli? 27 Okuhimbikila pononthiki Amasiya ayeka-po okulandula Siovaa, avemutyitukila-po+ etyi eli ko Selusalei, ataulila ko Lakisi, mahi avatumu ovalume avemulandula atee ko Lakisi, ngako vemwipaela. 28 Avemupolo-ko avemutyindi kononkhambe, akapakwa komaendo ovakwaukulu vae mepunda-umbo lyo Sundaa.