Omukanda wa Vali Ehipululo

32 Konyima yovipuka ovio, nevi Isekiya alingile noukwatyili,+ Senakelimbe Ohamba yo Asilia, aululila mo Sundaa. Elisete nomapunda-umbo okwapama, tyokwahanda umwe okuululila-mo eeteye-po, eekombola-ko.*+

2 Etyi Isekiya amona okuti Senakelimbe weya, wahanda okulwisa o Selusalei, 3 apate onondyivi-ndyivi mbomaande kondye yepunda-umbo,+ mahi nkhele akapula komunene wae no kovakwa-vita vae, avemukwatesako. 4 Akukongololwa ovanthu ovanyingi opo vapate onondyivi-ndyivi ambuho mbomeva, nondongi ikwata motyilongo, mokonda vati: “Opo onohamba mbo Asilia mbuhavase omaande omanyingi muno.”

5 Tupu, apindula-po otyimato atyiho tyokwatoka, kombanda yatyo atungu-ko omatala, kondye atungu-ko otyimato otyikwavo. Aviukisa Otyipunda*+ tyepunda-umbo lya Ndaviti, anthili omauta omanyingi* nonondyakulilo. 6 Akoyo ononkhalamutwe mbomafwalali ovanthu vae, eveongiya pana paombela ovanthu ovanyingi kombundi yepunda-umbo, evepameka,* ati: 7 “Kalei tyapama, amukolo omutima. Mwahatilei owoma mwahalingei otyiho mokonda yohamba yo Asilia,+ nii ovanthu ovanyingi-nyingi ena-vo, mokonda ava vahula kwoonthwe ovanyingi vali tyipona ava ena-vo.+ 8 Kuvo kuna okuvoko kwohitu,* mahi kwoonthwe kuna Siovaa Huku yetu, opo etukwateseko, nokutulwila-ko movilwa vietu.”+ Onondaka mba Isekiya, Ohamba yo Sundaa, ambupameka unene ovanthu.+

9 Konyima yotyo, pweetyi Senakelimbe Ohamba yoko Asilia, ekahi ko Lakisi+ novakwa-vita* vae aveho, atumu ovanthu vae ko Selusalei, ku Isekiya ohamba yo Sundaa no kovanthu aveho vo Sundeya vakala mo Selusalei+ opo vakapopie okuti:

10 “Senakelimbe Ohamba yo Asilia wati: ‘Omulie onwe mwayumba onthumbi tyina mutwalako okukala mo Selusalei ngwe yelisetwa nayo?+ 11 Kamutyiete okuti Isekiya ukahi nokumukemba, wahanda okumwipaa nondyala, nohunga, tyina ati: “Siovaa Huku yetu, metuyovola pomavoko ohamba yo Asilia”?+ 12 Ha Isekiya-ko wahanya-ko onomphangu mbukola mbokwaya peulu,+ nomitala viovilikutila+ vya Huku yenyi,* apopila o Sundaa no Selusalei okuti: “Onwe muna okulipetamena vala komutala wike wovilikutila, oko vala muna okulingila ovilikutila vienyi”?+ 13 Etyi ame novakwaukulu vange twalingile ovanthu aveho vovilongo, onwe kamutyii?+ Okuti ono huku mbovilongo ovio mbetyivilile okuyovola ovilongo viavo pomavoko ange?+ 14 Pono huku ombo mbovilongo viahanyenwe-ko novakwaukulu vange, o huku patyi wetyivilile okuyovola ovanthu vae pomavoko ange, opo Huku yenyi etyivile okumuyovola pomavoko ange?+ 15 Vakwe muhakembelwei-po na Isekiya, emuhongiliya ngootyo!+ Muhemuyumbei onthumbi, mokonda kutupu huku nawike wotyilongo ine wouhamba wetyivila okuyovola ovanthu vae pomavoko ange no pomavoko ovakwaukulu vange! Pahe Huku yenyi olie, opo emuyovole pomavoko ange?’”+

16 Ovaundapi va Senakelimbe, avapopi vali unene omapita Siovaa Huku yotyotyili, na Isekiya omuundapi wae. 17 Tupu ahoneka omikanda+ viokuleva Siovaa Huku yo Isilayeli,+ nokumupopia omapita, ati: “Ngeetyi ono huku mbovanthu vovilongo mbehetyivilile okuyovola ovanthu vambo peke liange,+ na Huku ya Isekiya kametyivili okuyovola ovanthu vae peke liange.” 18 Avatwalako okupopila unene peulu ovanthu vomo Selusalei vokuli kombanda yotyimato, melaka liova Sundaa, opo vatile owoma avateketa, opo vatambule epunda-umbo.+ 19 Avapopi omapita Huku yo Selusalei, ngeetyi vapopia omapita ovika-huku viovanthu vovilongo, viokwalingwa nomavoko ovanthu. 20 Mahi, Ohamba Isekiya nomuuli Isaiya,+ omona wa Amosi, avatwalako okulikwambela konthele yotyo, nokuliyava keulu, okwiita opo vakwatesweko.+

21 Siovaa atumu oandyu, aiipaa ovakwa-vita vokwapama,+ novatumini, nononkhalamutwe, monthanda yohamba yo Asilia, ngwe akondoka tyakunda kotyilongo tyae. Konyima, anyingila mondywo ya* huku yae, vamwe povana vae avemwipaa nomutunga.+ 22 Ngootyo, Siovaa ayovola Isekiya, novanthu vakala mo Selusalei pomavoko a Senakelimbe Ohamba yo Asilia, no pomavoko ovanthu aveho ovakwavo. Evepululukiswa-po kononthele ambuho. 23 Ovanyingi vaetelele Siovaa oviawa mo Selusalei. Tupu vaetelele Isekiya ohamba yo Sundaa+ ovipuka oviwa unene. Konyima yotyo, ovanthu aveho vovilongo avakala nonthilo onene na Isekiya.

24 Pononthiki opo, Isekiya avele unene tyokuhungi umwe kokunkhia, elikwambela ku Siovaa.+ Ngwe emukumbulula, emwavela enyingilikilo.*+ 25 Mahi Isekiya kapandulile oviwa alingilwa, mokonda omutima wae wakala nomalityindailo. Huku anumanena Isekiya no Sundaa no Selusalei. 26 Konyima, Isekiya no vokukala mo Selusalei, aveliolo omutima avayeke-po omalityindailo omomutima wavo.+ Onyengo ya Siovaa aiheya kuvo pononthiki mba Isekiya.+

27 Isekiya akala nomalumono amanyingi, nomunkhima omunene.+ Elitungila ovilimba+ viokupaka opalata noolu, nomamanya akolela, nomulela wombasamu, nonondyakulilo, novipuka aviho viokwankhimana. 28 Alingi ovilimba viokupaka ovilia, novinyu omphe, nomulela, novinyongo viovipako aviho vielikalaila, no vionongi. 29 Tupu elitungila omapunda-umbo, akala novipako ovinyingi, onongi, nonongombe, mokonda Huku wemupele omalumono amanyingi-nyingi. 30 Isekiya oe wapatele ondyivi-ndyivi onene yomeva+ o Siyoo,+ eelingila omukungu ulauka no koutakelo, atee Kepunda-umbo lya Ndaviti.+ Ovilinga aviho Isekiya alingile viaendele nawa. 31 Mahi, etyi ovatumini vo Mbambilonia vatuma ovatumwa-ndaka vakapule Isekiya konthele yenyingilikilo*+ liaenda motyilongo,+ Huku yotyotyili emuyeke alinge etyi mwene ahanda, opo emulole,+ atale atyiho tyikahi momutima wae.+

32 Ovipuka ovikwavo viehipululo lya Isekiya, novipuka alingile nolwembia olunene,+ viahonekwa memonekelo liomuuli Isaiya+ omona wa Amosi, Momukanda Wonohamba mbo Sundaa no mbo Isilayeli.+ 33 Pahe Isekiya akapululukwa-po nonombwale mbavo, avekemupaka potyilondeka tyokwenda no komalangalo ovana va Ndaviti.+ Etyi anyima, o Sundaa aiho no vokukala mo Selusalei, avemuhilivika. Manasesi omona wae emupingi kovipundi.