Sombe
22 Elifasi+ watukile mu Temaa ati:
2 “Okuti Huku upondola umwe okusuka nomunthu?
Omunthu ngapunga-punga nawa ovipuka, upa-tyi Huku?+
3 Okuti Omuvili wa Atyiho, ove ngoviukaisa usuka* noove,
Ine wati hamwe tyina ulandula ondyila yotyili,+ una etyi apola-po?
4 Okuti mekukwata,
Ekutwala momphela ukwatelwe okumutila owoma?
5 Matyikukwatesa havivi ovinyingi walinga-linga,
Ha nonkhali ukalela vala okulinga?+
6 Soka ove ava mulikwai navo uveita opinyolo, avehena etyi vekulinga, ovepikula umwe,
7 Ou waponwa, nomeva vala okunwa kumupe,
Ou waliwa nondyala, nombolo vala umunumina-yo.+
8 Otyilongo, tyilinga tyomulume-lume,+
Ou uholwe oe ukala-mo.
9 Mahi ove ovahepe, wevetaata avaende mankhanya,
Onosona* wembuteya-teya omavoko.
10 Otyo wakalela potyitika-tika tyomaliva,*+
Ovihuna vitilisa owoma, vikweendela.
11 Otyo wakalela menthiki eli enene, nokumona-po ohamono-po vali,
Eli eulu-mbila liekutahela omeva amwe omanyingi, oombaila-mo.
12 Huku keli keulu-ulu?
Mahi nkhele tala vala apa peli ononthungululu, opeulu-ale.
13 Soka ove wati: ‘Pahe Huku wii-tyi?
Okuti Huku upondola okutetela omphela mepuputu?
14 Omakaka emuyuvikiya,
Emuyuvikiya tyina aenda-enda kelola lieulu.’
15 Pahe ove, mopolo-po umwe vala onondyila ononkhulu,
Onondyila ankho mbukwata onondingavivi,
16 Ovanthu vokwatyindwa-po* ngwe onthiki yavo nkhele kainehike-po,
17 Huku yotyotyili ankho vemuti: ‘Mwene tuyeke vala!
Pahe Omuvili wa Atyiho metulingi-tyi?’
18 Mahi ngwe oe weyulisile oviwa movitunge viavo.
(Okusoka patyi oko pahe!)
19 Onondingaviwa mavekelimonenako, avahambukwa,
Ava vokulinga evi viehevevelesa onombei, mavekevekwela, avati:
20 ‘Onondyale mbetu mbahanywa-ko,
Etyi vasa-po, matyipila motupia.’
21 Noñgonoka Huku, ukamone ombembwa,
Okulinga otyo, mokamona oviwa.
22 Tavela otyitumino tyitunda momulungu wae,
Paka momutima wove evi apopia.+
23 Ine ukondoka Komuvili wa Atyiho, mopinduka.+
Mopinduka vala ine upola ovivi mekaka liove,
24 Mopinduka ine uyumbahi oolu* yove meheke,
Oolu yo ko Ofili,+ keiyumbehi mononkhanda momalola,*
25 Okulinga ngootyo, Omuvili wa Atyiho oe malingi oolu* yove,
Malingi opalata yove, opalata ongwa yatyo.
26 Ove mokapola ehambu Momuvili wa Atyiho,
Mokapopia umwe na Huku otyo umutala.
27 Ove mokeliheka kwe, ngwe ekutehelela.
Evi upopia mokevilinga.
28 Evi upanga vikaviuka-viuka,
Omu mondyila yove mukamona otyimimi.
29 Wahatie tyina upopia upopia nomakamo, mokakunda,
Mahi Huku mayovola vokulikondola koututu.*
30 Makayovola ava valinga evi viehevevelesa onombei.
Omankhanya ove okusukuka, opo mokayovolwa.”