Omukanda wo Tete Ehipululo
13 Ndaviti akapula ononkhalamutwe mbovityita ekwii, no mbotyita, novatumini aveho.+ 2 Ndaviti apopila ewaneno aliho lyo Isilayeli okuti: “Ine kwoonwe tyaviuka, Siovaa Huku yetu wetyipanda, tutumei ovatumwa-ndaka ku vakwetu vokwehepo, konohika ambuho mbo Isilayeli, no kovanakwa, no vomuhoko wa Levii momapunda-umbo avo+ nomalihilo avo, opo veye okuliongiya noonthwe. 3 Tukapolei Otyikasa+ tya Huku yetu.” Mokonda pononthiki mba Saulu, ankho kavesuku natyo.+ 4 Ewaneno aliho alityitavela, mokonda ovanthu aveho ankho vetyihambukilwa. 5 Ngootyo, Ndaviti aongiya o Isilayeli aiho, okuhimbikila kondongi* yo Isitu atee ko Lembo-Hamate,*+ opo vakapole Otyikasa tya Huku yotyotyili ko Kiliyate-Seyalii.+
6 Ndaviti nova Isilayeli aveho, avaende ko Mbaalaa,+ ko Kiliyate-Seyalii, ankho yahula ko Sundaa, opo vakapole Otyikasa tya Huku yotyotyili Siovaa, upumphi kotyipundi tyae tyoutumini keulu lyo* no kelumbii,+ Otyikasa oku ovanthu vafendela Huku. 7 Mahi Otyikasa tya Huku yotyotyili, avetyipolo meumbo lya Ambinandambe avetyityindi kokatemba kamwe okape.+ Usaa na Aiyoo, ankho ovo vaombola.+ 8 Ndaviti nova Isilayeli aveho, ankho vekahi nokuhela ponthele ya Huku yotyotyili nononkhono mbavo ambuho, otyo vaimba, otyo vahika ovisandyi, novihumba nonopandelu,+ nomalata+ nononkhwino.+ 9 Mahi etyi vehika potyipale tyo Kindoo, Usaa atandaveka okuvoko akwate Kotyikasa, mokonda onongombe maa mbutyitokesa. 10 Siovaa anumanena unene Usaa, emwipaa mokonda wakwata Kotyikasa,+ ankhila ponthele ya Huku.+ 11 Mahi Ndaviti anumana,* mokonda Siovaa wakala nonyengo aipaa Usaa. Omphangu oyo itiwa o Pelesi-Usaa* atee hono.
12 Monthiki oyo, Ndaviti atili unene owoma Huku yotyotyili, ati: “Oñgeni mandyitwala Otyikasa tya Huku yotyotyili mepunda-umbo liange?”+ 13 Ndaviti ahatwala Otyikasa Mepunda-umbo lya Ndaviti omu ankho akala, mahi atumu tyitwalwe keumbo lya Ombende-Endoo womuhoko wa Ngate. 14 Otyikasa tya Huku yotyotyili atyikala meumbo lya Ombende-Endoo. Atyikala-mo onohanyi ononthatu. Siovaa atwalako okukwatesako veumbo lya Ombende-Endoo, novipuka aviho ankho ena.+