Okutunda
22 “Ine omulume umwe uvaka ongi ike ine hamwe ongombe onthwei eipaa ine hamwe eilandesa, una okufeta ononthwei ononthano monthwei ike, ongi eifetela onongi ononkhwana.+
2 (“Ine otyimphulu+ tyivasiwa meumbo limwe tyikahi nokuvaka, avetyivange atyinkhi, wetyiipaa kapondola okukwatwa. 3 Ine uvasiwa tyina ekumbi litunda una wemwipaa una okukwatwa.)
“Otyimphulu matyifete. Ine utupu natyike, malandeswa afete etyi avaka. 4 Ine etyi avaka uvasiwa natyo katyankhile, tyilinge ongombe, tyilinge otyimbulu, tyilinge ongi, una okufeta vivali.
5 “Ine umwe ukalisa ovipako mepia limwe, no komiti vionouva, eviyeke viende mepia lya mukwavo, una okufetela ovipuka vikahi vali nawa mateye mepia liae, novinyango vikahi nawa manyange komiti viae vionouva.
6 “Ine omunthu umwe uyakesa otupia atwende no momikete avipi, aviyakesa ovipandi viovilia vimwe viateywa, atwende no moluhongo lwaamwene alupi nepia liatyo aliho alipi, wokwetuyakesa una okufeta aviho viapia.
7 “Ine omulume umwe waavela onombongo mukwavo, ine hamwe otyipuka otyikwavo etyipake nawa, atyivakwa meumbo liae, otyimphulu atyivasiwa, pu tyike avaka una okufeta-po vivali.+ 8 Ine otyimphulu katyivahiwa, hekulu yeumbo matwalwa ku Huku yotyotyili+ tyitalwe ine hae-ko wapola-po* ovipuka vya mukwavo. 9 Ine omunthu umwe uvahiwa notyipuka tyehe-tyae, tyilinge ongombe tyilinge otyimbulu tyilinge ongi, ine otyikutu, ine otyipuka otyikwavo tyavomba, apamoneka umwe ati: ‘Otyipuka otyo otyange!’ aveho vena okutwala omphela yavo ku Huku yotyotyili.+ Ku una Huku ati omphela oko yayembela, una okufeta mukwavo, potyipuka tyike avaka akondola-po vivali.+
10 “Ine omulume umwe upakesa mukwavo otyipako, tyilinge otyimbulu, tyilinge ongombe onthwei, tyilinge ongi, tyilinge otyipako otyikwavo tyo meumbo, atyinkhi, ine hamwe atyilivete, hamwe atyivakwa, mahi atyihamonwa nomunthu nawike, 11 aveho vena okwanena kotyipala tya Siovaa, avalekesa okuti omulume oo kavakele ovipako vya mukwavo; hekulu yotyipako etyitavela nomutima auho. Okulinga ngootyo, opo mukwavo kesukisa okutyipingiya-po.+ 12 Mahi omulume wokwapakeswa otyipako ine wetyivakwa, una okutyipingiya-po. 13 Ine otyipako tyaliwa-po notyinyama, ngwe una okutwala ombandwa ku hekulu. Kapondola okufetela otyipako tyaliwa notyinyama.
14 “Mahi, ine umwe uundila otyipako ku mukwavo, otyipako otyo atyikala notyipute ine hamwe atyinkhi otyo muhekulu ehepo, una wokwetyiundilile una okutyifeta. 15 Mahi ine muhekulu opo eli, ketyifete. Ine weile okutyipola tyikemuundapele haa afete, etyi maa afeta otyo tyipinga-po.
16 “Ine omulume ukengelela omufikwena wehena omphunga alala nae, una okumutonena* akale omukai wae.+ 17 Ine he waanya okumupa-e, omulume oo una okufeta etyi tyituuka moviitika.
18 “Omukai onganga wehemuhupise.+
19 “Aveho vana valala novinyama vena okwipawa.+
20 “Una ulingila ovilikutila ovika-huku ahalingila vala Siovaa, una okwipawa.+
21 “Wahalinge onya onthunda-vilongo nii weheimonese onkhumbi,+ tyeetyi noove wakakalele onthunda-vilongo motyilongo tyo Isitu.+
22 “Wahamonese emone omuhepe nii una wehena he.*+ 23 Ine uvemonesa emone aveliyave kwaame, mandyiivi etyi vandyita;+ 24 onyengo yange ainkhinduka, andyikwipaa nomutunga; omukai wove esala omuhepe, omona wove esala tyehena he.
25 “Ine ulevalesa onombongo omunthu umwe wahepa* pokati kovanthu vange, mukala nae mphangu ike, wehemulevalese haa otyitisa; wehemulinge oluli.+
26 “Ine mukwenyi wekulevala omwiti omanda yae isale opinyolo,+ mukondolela-yo tyina ekumbi linyingila, 27 oyo vala ena-yo, elifika. Opi mekelifika pokulangala-po?+ Tyina ameliyave kwaame, ame mandyimutehelela mokonda ndyina okankhenda.*+
28 “Wahalinge omutomba* Huku+ nii omutumini* wovanthu vove.+
29 “Mwehelityilikei okumpholela kovipuka mwateya, no kovinyu yenyi no komulela wenyi omunyingi ukahi nokunengauka ponomphangu mulingila.*+ Ove una okumpha omona wove wotyiveli.+ 30 Etyi otyo una okulinga ongombe yove, nongi yove:+ onkhembe ina okukala no ina ononthiki epandu-vali, nondyona ngatyo ikala. Monthiki ya tyinana amumbundyetela.+
31 “Kalei ovanthu vange ovasukuki;+ mwahaliei ohitu yotyinyama tyaliwa notyikwavo mofika.+ Iyumbilei ovimbwa.