Omukanda wo Tete Ehipululo
5 Ava ovana va Lumbe,+ otyiveli tya Isilayeli. Oe otyiveli, mahi mokonda wasilisile oula* wa he,+ ouveli wae aupewa ovana va Susee,+ Susee omona wa Isilayeli. Otyo momikanda viomihoko kavalulilwe okuti oe otyiveli. 2 Namphila Sundaa+ omunene vali konondenge mbae, mwe omo mwatuka una makala omutumini,+ mahi ouveli o wa Susee. 3 Ovana va Lumbe otyiveli tya Isilayeli, tyati: o Hanoke, o Palu, o Hesiloo na Kalimi.+ 4 Ovana va Sowele, o Semaiya, Semaiya atyiti Ngonge, Ngonge atyiti Simei, 5 Simei atyiti Mika, Mika atyiti Leaya, Leaya atyiti Mbaale, 6 Mbaale atyiti Mbeelaa, wokwatwailwe koupika na Tilingate-Pilunesele+ Ohamba yo Asilia. Mbeelaa ohongoi yomuhoko wa Lumbe. 7 Onombunga mbavo mbahonekwa momukanda womihoko, omu velilandulila, velikwai na Seiyele onkhalamutwe, na Sakaliya, 8 na Mbela omona wa Asasi, Asasi omona wa Sema, Sema omona wa Sowele, vakala mo Alowele,+ atee ko Nembu, no ko Mbaale-Meoo.+ 9 Koutundilo, ohika yae yapita atee apa pahimbikila oluhandya lwokuli konthele Yondongi Eufalate,+ mokonda ovipako viavo vieliyawisile unene motyilongo tyo Sileyande.+ 10 Pononthiki mba Saulu, avakalwisa ova Angale, avevehanye-ko, avapingi momakaka avo mohika aiho yo Sileyande yokwahula koutundilo.
11 Vomuhoko wa Ngande, pahe ankho vakala ponthele yavo, motyilongo tyo Mbasaa mohika imwe yenda atee ko Salekaa.+ 12 Mo Mbasaa, Sowele oe onkhalamutwe, akulandula Safau, na Sanai, na Safate. 13 Vana velikwai navo, mombunga ko vo he, vena epandu-vali: O Mikaeli, na Mesulau, na Semba, na Solai, na Sakaa, na Siya na Embele. 14 Ovo, ovana va Ambiyaili omona wa Huli, Huli omona wa Salowa, Salowa omona wa Sileyande, Sileyande omona wa Mikaeli, Mikaeli omona wa Sesisai, Sesisai omona wa Sando, Sando omona wa Mbusi. 15 Ohongoi o Aii omona wa Ambindiyeli, Ambindiyeli omona wa Nguni. 16 Ankho vakala mo Sileyande,+ nomo Mbasaa,+ no monosandyala mbatyo, no monohika ambuho mbokulihila mbo ko Saloo, atee oku mbakahulila. 17 Aveho ovo, vahonekwa momikanda viomihoko, pononthiki mba Sotau+ ohamba yo Sundaa, no pononthiki mba Selombowau*+ ohamba yo Isilayeli.
18 Pomaswalali ova Lumbe nova Ngande, notyinthimbu tyo vomuhoko wa Manasesi, pena ovakwa-vita vokwapama 44.760, vatyinda onondyakulilo, nomitunga, vokumaneka ononkhondyi.* Ovalume vokwalongeswa unene okulwa. 19 Ovalume ovo, valwisile ova Angale,+ nomuhoko wa Setule, no wa Nafisi,+ no wa Nondambe. 20 Avakwateswako movilwa ovio. Ova Angale na vana vahula kuvo, avapakulwa pomavoko avo, vaita ku Huku opo evekwateseko movilwa. Huku wakumbululile etyi vaita mokonda vemuyumba onthumbi.+ 21 Avapundu ovipako viavo, omakamelu 50.000, nonongi 250.000, nomambulu 2.000, novanthu* 100.000. 22 Povita ovio, paipaelwe ovanthu ovanyingi, mokonda Huku yotyotyili wevekalele komutwe.+ Avakala monohika mbukala ovanthu ovo, atee pononthiki vatwalwa koupika.+
23 Otyinthimbu tyomuhoko wa Manasesi,+ vakala mohika ihimbikila motyilongo tyo Mbasaa atee ko Mbaale-Helemoo, no ko Senile, no komphunda Helemoo.+ Vali ovanyingi unene. 24 Onohongoi tyatile: O Efele, o Isi, o Eliyeli, o Asiliyele, o Selemiya, o Hondaviya na Sandiyeli. Ovalume ovo, ovakwa-vita vokwapama, vankhimana, ovo onohongoi. 25 Mahi, kavetavelele ku Huku yovakwaukulu vavo, vafenda ovika-huku viovanthu votyilongo,+ vana Huku anyima motyilongo, otyo vatala. 26 Huku yo Isilayeli alundu Puli, Ohamba yo Asilia+ (oyo, Ohamba Tilingate-Pilunesele+ yo Asilia,) opo atwale koupika vomuhoko wa Lumbe, no vomuhoko wa Ngande, notyinthimbu tyomuhoko wa Manasesi. Evetwala ko Alaa, no ko Hambole, no ko Ala, no kondongi Ngosaa,+ oku vakala atee hono.