Isekiyele
32 Menima 12, mohanyi 12, monthiki yo tete kohanyi, ondaka ya Siovaa aindyendela vali aiti: 2 “Mona womulume, imbila Falaoo ohamba yo Isitu ongengeya,* mupopila uti:
‘Ove wali ngonkhulika yakola yelilumba pahe* yovanthu vovilongo,
Mahi pahe wati umwe puti.
Ove wali ngenyama enene liomelunga,+ otyo upinaunuka monondongi mbove,
Ovingalesa omeva nonomphai mbove, osilisa onondongi.’*
3 Etyi otyo tyapopia Tatekulu Ohamba Onene Siovaa, wati:
‘Mankhekutahela otyiumbe-umbe tyovanthu vovilongo ovinyingi mavekekuyumba owanda wange,
Mavekekukwatela mowanda wange wokukombolola.
4 Mandyikekusa pohi,
Mandyikekuyumba motyipembe.
Mandyikatuma oviila aviho viomeulu vikalapele kwoove,
Ovinyama viomohika kombanda yohi aiho mandyikevipa ove aviputuka.+
5 Ohitu yove mandyikeiyumba-yumba-hi monomphunda,
Omalola mandyikeeyulisa omankhipa ove.+
6 Otyilongo mandyiketyiyulisa ohonde yatunda mwoove, maikehika umwe konomphunda,
Oyo maikeyulisa onondongi.’*
7 ‘Tyina ove wamahanywa-ko, mandyikahika eulu, ononthungululu mbalio andyikembuyumba enthiki.
Ekumbi mandyikelinkhilimika omakaka,
Ei ohanyi kamaikaeta otyimimi tyayo.+
8 Mankhayumba enthiki ovimimi aviho viliaima meulu kombanda yove,
Otyilongo tyove mandyiketyinkhilimika nenthiki,’ o Tatekulu Ohamba Onene Siovaa wetyipopia.
9 ‘Mandyikahukaisa omitima viovanthu ovanyingi, tyina namatwala ovanthu vove koupika, kovanthu vovilongo ovikwavo,
Kovilongo ove wehei.+
10 Mandyikahanununa ovanthu vovilongo ovinyingi,
Ombu onohamba mbavo mambukateketa tyowoma kombanda yove, tyina namakwatela omutunga wange momaiho avo.
Mavakateketa ehimbwe, aveho tyatila owoma pomwenyo wavo,’
Monthiki ove motoko,
11 Mokonda, etyi otyo tyapopia Tatekulu Ohamba Onene Siovaa wati:
‘Omutunga wohamba yo Mbambilonia, mauya kwoove.+
12 Mandyikatokesa ovanthu vove nomutunga wovakwa-vita ovitevo,
Ovakalavi vatyo povanthu vovilongo, aveho-aveho.+
Mavakatokehila pohi omahuku o Isitu, ovanthu vamo aveho mavakanyimwa-ko.+
13 Mandyikahanya-ko ovipako viamo aviho vilila pomaande omanyingi.+
Onomphai mbovanthu kambukavingalesa* vali omaande, nii omakondyo ovinyama.’+
14 ‘Pomuvo watyo opo, mandyikasukula omaande avo,
Onondongi mbavo mandyikembweendesa ngomulela,’ o Tatekulu Ohamba Onene Siovaa wetyipopia.
15 ‘Tyina o Isitu nameityitula ekongola, ailingi otyilongo pahe tyapundwa ovipuka aviho viali-mo,+
Tyina namavange aveho vakala-mo,
Mavakankhola umwe okuti ame, ame Siovaa.+
16 Ei ongengeya, ovanthu aveho umwe mavekeiimba.
Ovana vovilongo ovakainthu, mavekeiimba.
Mavekeiimbila o Isitu, novanthu vatyo aveho,’ o Tatekulu Ohamba Onene Siovaa wetyipopia.”
17 Pahe menima 12, monthiki 15 kohanyi, ondaka ya Siovaa aindyendela vali aiti: 18 “Mona womulume, lila ovanthu vo Isitu, vetwala mombwelo, kohi yeheke, nayo novana vovilongo viokwapama ovakainthu, naava veli nokwenda no metoto.*
19 “‘Okuti ove umuwa vali ku vakwenyi? Lauka, kalangale naava vahapitile ekwendye!’
20 “‘Mavakatokela pokati ko vokwankhia komutunga.+ Yapakulwa* komutunga; ipolei-po apa, nayo novanthu vatyo aveho.
21 “‘Kohi kondyembo,* ovakwa-vita ovitevo viatyo, mavakapopia navo, nayo no vokwaama kuyo. Ngwe tyili mavalauka umwe, mavakalangala ngo vokwahapitile ekwendye, vokwankhia komutunga. 22 O Asilia omo ili omo, novanthu vatyo aveho. Omaendo avo, eliseta nae, aveho vatoka komutunga.+ 23 Omaendo avo, eli kohi metoto,* ovanthu vatyo aveho veliseta neendo liayo, aveho vavangwa nomutunga, mokonda vahukaisile otyilongo tyo vokuna omwenyo.
24 “‘Elau+ omo eli omo, novanthu vae aveho veliseta neendo liae, aveho vatoka komutunga. Valauka no kohi yeheke tyahapitile ekwendye, ovo vokwahukaisile otyilongo tyo vokuna omwenyo. Pahe mavakatyinda olukundo lwavo, navo no vokuli nokulauka no metoto.* 25 Vemuyalela oula pokati ko vokwankhia, nae novanthu vae aveho veliseta nomaendo ae. Aveho kavapitile ekwendye, vankhia komutunga, mokonda vahukaisile ovanthu motyilongo tyo vokuna omwenyo; mavakatyinda olukundo lwavo availa kumwe no vokulauka metoto.* Wapakwa pokati ko vokwaipawa.
26 “‘Omo muli Meseke omo na Tumbali,+ notyikumba tyavo.* Omaendo avo eliseta nae. Aveho kavapitile ekwendye. Vankhia komutunga, mokonda vahukaisile ovanthu motyilongo tyo vokuna omwenyo. 27 Okuti kamavakalangala novakwa-vita vahaile ekwendye vokwatoka, valauka no Meendo* nomauta avo ovilwa? Omitunga viavo mavikapakwa mombwelo yomitwe viavo,* ononkhali mbavo mambukapakwa komankhipa avo, mokonda ovakwa-vita ovo ovitevo vahukaisile ovanthu motyilongo tyo vokuna omwenyo. 28 Mahi ove, mokamiangulilwa pokati ko vokwahapitile ekwendye, okapakwa no vokwankhia komutunga.
29 “‘Endoo+ omo eli omo, nae nonohamba mbae, nonohongoi mbae, namphila vapamaine, mahi vapakwa pokati ko vokwankhia komutunga; navo mavakapakwa no vokwahapitile ekwendye,+ no vokulauka no metoto.*
30 “‘Ovatumini aveho vo* kombanda omo veli omo, aveho no votyilongo tyo Sindone,+ vokwalauka tyakunda no vokwaipawa, namphila vahukaisa ovanthu mokonda younene wavo. Mavakapakwa tyahapitile ekwendye no vokwankhia komutunga, mavakatyinda olukundo lwavo navo no vokulauka no metoto.*
31 “‘Falaoo mekevemona aveho ovo, matyikemuungumanesa okutala etyi tyalingwa otyikumba tyae;+ Falaoo novita viae aviho, mavakaipawa nomutunga,’ o Tatekulu Ohamba Onene Siovaa wetyipopia.
32 “‘Mokonda wahukaisile otyilongo tyo vokuna omwenyo, Falaoo notyikumba tyae atyiho, makapakwa no vokwahapitile ekwendye, no vokwaipawa nomutunga,’ o Tatekulu Ohamba Onene Siovaa wetyipopia.”