Sakaliya
7 Menima lya kwana Ohamba Ndaliu eli kovipundi, monthiki ya kwana yohanyi ya tyive, ohanyi ya Kisileu,* Siovaa wapopilile Sakaliya+ ati: 2 Ovanthu vo ko Mbetele, vatumine ovalume vo motyilongo tyavo na Salesele na Lesei-Meleke, vaye vekelivondele ku* Siovaa. 3 Avapopila ovauli novanakwa vo mondywo* ya Siovaa womambamba ovita, avati: “Okuti ndyina umwe okulila, nokwahali natyike mohanyi ya tano,+ ngeetyi ndyilinga-le momanima aa aeho?”
4 Siovaa womambamba ovita, amphopila vali, ati: 5 “Popila ovanthu aveho vo motyilongo, novanakwa uti: ‘Onwe mweliyavaile umwe, nokulia otyo mwahali natyike mohanyi ya tano no ya pandu-vali+ mokweenda kwomanima 70.+ Mahi okuti, ame umwe mwetyilingailile? 6 Tyina mulia na tyina munwa, hanwe vala mwene mutyilingila? 7 Ñgeno ankho mutavela onondaka Siovaa atumine ovauli vae+ vo kohale. Onondaka atumine, pweetyi nkhele mo Selusalei no momapunda-umbo akala popepi mukala ovanthu, pweetyi mwali nombembwa, no pweetyi mo Nengembe no mo Sefelaa mukala ovanthu.’”
8 Siovaa apopila vali Sakaliya ati: 9 “Siovaa womambamba ovita wati: ‘Onomphela mbukoyelei umwe omu mwene tyili mbaviukila,+ lilingei olwembia olunene,+ nokankhenda. 10 Mwahalingei onya omuhepe nii osona,*+ nii onthunda-vilongo+ nii wokwahepa.+ Mwahapangei momitima vienyi okulilinga onya.’+ 11 Mahi kavesukile neetyi napopile.+ Avanthyindamena umwe tyokwanthomba,+ avelipate momakutwi vehendyive.+ 12 Vatenekele omitima viavo, avilingi ngemanya liokwatena unene.*+ Kavetavelele ovitumino* no nondaka Siovaa womambamba ovita atumine mbaendelele momphepo yae ambupopiwa novauli vo kohale.+ Mokonda yotyo, Siovaa womambamba ovita anumana unene.”+
13 “‘Ngeetyi ame vahanthehelelele tyina ndyiveihana,*+ naame anehetyivili-vo okuvetehelela tyina vandyihana,’+ o Siovaa womambamba ovita wetyipopia. 14 Andyivehandaula aveho notyipepe tyimwe otyinene, avekehulila movilongo aviho vehei.+ Otyilongo vasile-po, atyihanyauka, nawike vali wakwataile-mo, nawike vali wakondokele-mo.+ Mokonda otyilongo otyiwa, vetyityitula otyilongo tyitilisa unene owoma.’”